ប្រធានព្រឹទ្ធសភាអូស្ត្រាលីត្រៀម​លាលែងតំណែងដោយសារសញ្ញាតិពីរ

ប្រធានព្រឹទ្ធសភាអូស្ត្រាលី លោក​ Stephen Parry ថ្លែងថា លោក​នឹងប្រកាសពីការលាលែងពីតំណែង បន្ទាប់ពីការបញ្ជាក់ពីតុលាការជាន់ខ្ពស់ថា លោកពិតជាមានកំហុសពាក់ព័ន្ធការមានសញ្ញាតិអូស្ត្រាលីផង និងមានសញ្ញាតិ​អង់គ្លេសផង។​

លោក​ Parry ថ្លែងថា តុលាការជាន់ខ្ពស់មានបកស្រាយបានត្រឹមត្រូវល្អ ដើម្បីការពារច្បាប់ពាក់ព័ន្ធអ្នកមានសញ្ញាតិពីរ និង ការបោះឆ្នោត។ ​នេះបើតាមសារព័ត៌មាន ​BBC។​

កាលពីថ្ងៃសុក្រសប្តាហ៍មុន​ តុលាការកំពូលបានសម្រេចដកតំណែងអ្នកនយោបាយជាន់ខ្ពស់ចំនួន​៥រូបក្នុងនោះរួមមានទាំងលោក Barnaby Joyce ផងដែរ ដោយសារពួកគេមានសញ្ញាតិលើសពីរមួយ។​

លោក Parry ចូលទៅផ្តល់ចម្លើយដល់តុលាការជាន់ខ្ពស់ពាក់ព័ន្ធបញ្ហាសញ្ញាតិកាលពីម្សិលមិញ។ លោកថ្លែងថា លោកសម្រេចចិត្តទាំងមានអារម្មណ៍ក្រៀមក្រំ បន្ទាប់ពីការិយាល័យរដ្ឋាភិបាលអង់គ្លេសបញ្ជាក់ថា លោកមានសញ្ញាតិអង់គ្លេសតាមរយៈឪពុក។​

តួនាទីប្រធានព្រឹទ្ធសភារបស់អូស្ត្រាលី បានដោយសារការបោះឆ្នោតនៅក្នុងសំឡេងសភាជាន់ខ្ពស់នេះ ហើយនឹងមានការរាប់សន្លឹកឆ្នោតឡើងវិញដើម្បីរៀបចំតំណែងបន្ទាប់ទៀតនេះ៕