មនុស្ស១៦នាក់ស្លាប់ និង ជាង១០០នាក់ផ្សេងទៀតរងរបួស ក្នុងករណីផ្ទុះឆេះ រោងចក្រថាមពលធ្យូងថ្ម នៅក្នុងរដ្ឋ Uttar Pradesh ប្រទេសឥណ្ឌានៅថ្ងៃនេះ។
មន្ត្រីរដ្ឋាភិបាលបានថ្លែងថា មនុស្សប្រមាណ៨០នាក់ ក្នុងចំណោមអ្នករងរបួសជាង១០០នាក់នោះ ត្រូវបញ្ជូនមន្ទីរពេទ្យជាបន្ទាប់ដើម្បីជួយសង្គ្រោះ។នេះ បើតាមសារព័ត៌មានBBC។
មន្ត្រីបាននិយាយថា នៅពេលដែលមានឮសំឡេងផ្ទុះឡើងភ្លាម ពួកគេបានរៀបចំបញ្ជូន ឧស្ម័ន និង សារធាតុដែលងាយឆេះផ្សេងទៀតចេញពីកន្លែងកើតហេតុនេះ។ ក្រុមហ៊ុនបានប្រកាសពីការស៊ើបអង្កេតរកមូលហេតុដែលបង្កឲ្យមានការផ្ទុះឆេះនេះ ដែលចាប់ផ្តើមស៊ើបពីចំណុចនៅក្បែរទីក្រុង Unchahar។
មន្ត្រីនគរបាលជំនាញថ្លែងថា ក្រុមការងារកំពុងតែបន្តស៊ើបអង្កេត តាមរយៈការប្រមូលផេះ និង សម្ភារជាភស្តុតាងមួយចំនួនទៀតនៅក្បែរនោះ ដើម្បីធ្វើការវិភាគរកមូលហេតុ។
ក្រោយកើតហេតុ អភិបាលរដ្ឋ Uttar Pradesh បានផ្ញើសាររំលែកទុកដល់ដល់ក្រុមគ្រួសារ អ្នកស្លាប់ និង រងរបួស និង មានផ្តល់ជាសំណងដល់ពួកគេ។
