សេចក្ដីរាយការណ៍បានឲ្យដឹងថា ប្រទេសអារ៉ាប៊ីសាអ៊ូឌីត បានបាញ់ស្កាត់ និងបំផ្លាញគ្រាប់មីស៊ីលមួយគ្រាប់នៅរដ្ឋធានីរីយ៉ាដ បន្ទាប់ពីគេដឹងថា គ្រាប់មីស៊ីលនោះត្រូវបានបាញ់ចេញពីប្រទេសយ៉េមែន ដែលកំពុងហែកហួរដោយជម្លោះ។
បើយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP បានឲ្យដឹងថា បំណែកគ្រាប់មីស៊ីលនោះ បានខ្ទាតធ្លាក់ទៅលើព្រលានយន្តហោះអន្តរជាតិនៅទីក្រុងរីយ៉ាដ បន្ទាប់ពីវាត្រូវបានបាញ់ស្កាត់កម្ទេចចោលរួចមក។
សេចក្ដីរាយការណ៍នានា បានឲ្យដឹងថា គ្រាប់មីស៊ីលនោះ ត្រូវបានក្រុមបះបោរស៊ីអ៊ីតហ៊ូធី ប្រកាសទទួលខុសត្រូវ ហើយក្រុមនេះទទួលបានការគាំទ្រពីប្រទេសអ៊ីរ៉ង់ ដែលជាសត្រូវជាមួយនឹងប្រទេសអារ៉ាប៊ីសាអូឌីត។
បន្ទាប់ពីការវាយប្រហារដោយគ្រាប់មីស៊ីលតែមិនបានសម្រេចបែបនេះ អារ៉ាប៊ីសាអ៊ូឌីត បានចាប់ផ្ដើមកាន់តែច្បាស់អំពីកម្លាំងគំរាមកំហែងកាន់តែខ្លាំងកើតចេញពីជម្លោះនៅក្នុងប្រទេសយ៉េមែន។
នៅឯទីក្រុងរីយ៉ាដ ប្រជាជនបានប្រាប់ថា ពួកគេបានលឺសំឡេងផ្ទុះលាន់លឺខ្លាំងនៅជិតព្រលានយន្តហោះអន្តរជាតិ King Khalid ដែលស្ថិតនៅជាយភាគខាងជើងរដ្ឋធានីរីយ៉ាដ។
ពុំមានមហន្តរាយធំធំធេង ឬការបាត់បង់ជីវិតមនុស្សណាម្នាក់ ត្រូវបានអាជ្ញារអារ៉ាប៊ីសាអ៊ូឌីតរាយការណ៍នោះឡើយ៕
