សាលាដំបូងរាជធានីភ្នំពេញបន្តចំណាត់ការរឿងក្តីប្រឆាំងលោក លឺ ឡាយស្រេង តាមបណ្តឹងលោក គី តិច ខណៈលោក លឺ ឡាយស្រេង នៅក្រៅប្រទេស។
ព្រះរាជអាជ្ញារងអមសាលាដំបូងរាជធានីភ្នំពេញលោក សៀង សុខ នៅរសៀលថ្ងៃទី០៦ វិច្ឆិកា នេះបានកោះអញ្ចើញមេធាវីរដ្ឋាភិបាលគឺលោក គី តិច ឲ្យចូលមកផ្តល់ចម្លើយបន្ថែមលើដំណើរឿងប្តឹងលោក លឺ ឡាយស្រេង ពីបទបរិហាកេរ្តិ៍ជាសាធារណៈនិងបទប្រមាថ។
បន្ទាប់ពីចេញពីផ្តល់ចម្លើយនៅរសៀលនេះលោក គឺ តិច ថាលោកនៅតែរក្សាជំហរដដែលក្នុងការប្តឹង និងទារសំណងពីលោក លឺ ឡាយស្រេង បើទោះបីលោកគ្មានវត្តមាននៅក្នុងប្រទេស និងមេធាវីការពារក្តីក៏ដោយ។
លោកថា៖ «អាហ្នឹងលើតុលាការគេអ្នកចាត់ចែងព្រោះនិតីវិធីមានគ្រប់ ទោះបីសាម៉ីខ្លួនគេចខ្លួនមិនចូលមិនមានមេធាវីក៏ដោយ ក៏នីតិវិធីរបស់អយ្យការ និងតុលាការគេមានវិធានការចាត់តាមហ្នឹងទៅគឺអត់ឲ្យមានការរាំងស្ទះនោះទេដំណើររឿង»។
ក្នុងកិច្ចសម្ភាសន៍ជាមួយវិទ្យុអាស៊ីសេរីកាលពីពេលកន្លងទៅលោក លឺ ឡាយស្រេង បានប្រកាសថាលោកនឹងមិនដាក់មេធាវីការពារក្តីលើបណ្តឹងនេះនោះទេ ដោយលោកថាតុលាការស្ថិតក្រោមអំណាចរបស់បក្សប្រជាជនកម្ពុជា។
គួររំលឹកផងដែរថា រដ្ឋាភិបាលកម្ពុជាកាលពីថ្ងៃទី២៤ តុលា បានសម្រេចដាក់ពាក្យប្តឹងលោក លឺ ឡាយស្រេង ទៅតុលាការដោយថាបានបរិហាកេរ្តិ៍បក្សប្រជាជនជាសាធារណៈចំពោះខ្លឹមសារដែលលោកបានសន្ទនាឯកជនតាមទូរស័ព្ទពាក់ព័ន្ធនឹងវិសោធកម្មច្បាប់បោះឆ្នោតចំនួន៤ និងការប្តឹងរំលាយបក្សសង្គ្រោះជាតិ ហើយត្រូវបានបែកធ្លាយតាមរយៈប្រព័ន្ធទំនាក់ទំនងសង្គម។
ទោះជាយ៉ាងណាចំពោះអ្នកច្បាប់និងអ្នកជំនាញផ្នែកប្រព័ន្ធព័ត៌មានវិទ្យាយល់ថា ការចោទប្រកាន់ដោយសំអាងទៅការបែកធ្លាយសំឡេងនោះគឺមិនត្រឹមត្រូវនោះទេ ហើយភស្ភុតាងដែលត្រូវបានយកដោយរូបភាពមិនស្របច្បាប់នោះគឺមិនអាចយកជាភស្ភុតាងកើតនោះទេ៕
