លោកនាយករដ្ឋមន្ត្រី ហ៊ុន សែន ប្រកាសរកអ្នកភ្នាល់គ្នា ជាមួយលោក ដោយថា១សងត្រលប់វិញ១០០ ករណីរំលាយគណបក្សសង្គ្រោះជាតិ ខណៈតុលាការកំពូលនឹងបើកសវនាការលើករណីនេះ នៅថ្ងៃទី១៦ខែវិច្ឆិកាខាងមុខនេះ។
នៅក្នុងពិធីជួបជាមួយកម្មករ នៅតំបន់ចំការដូង ខណ្ឌដង្កោ រាជធានីភ្នំពេញ នៅថ្ងៃនេះ លោកនាយករដ្ឋមន្ត្រីថ្លែងថា អ្នកនៅតាមហាងកាហ្វេកំពុងតែភ្នាល់គ្នា ករណីរំលាយគណបក្សសង្គ្រោះជាតិ។ លោកបន្តថា លោកហ៊ានភ្នាល់គ្នា ១សងវិញ១០០ បើសិនជាមិនរំលាយ ឲ្យទៅយកលុយពីលោក។
លោកថ្លែងថា «ខ្ញុំបានអំពាវនាវថា អ្នកទំាងឡាយ ខ្ញុំចង់ផ្តល់ឱកាសឲ្យបន្តធ្វើជាមេឃុំ ចៅសង្កាត់ ឬក៏ជំទប់ ឬក៏ក្រុមប្រឹក្សាបន្តទៅទៀត គេថាអត់ទេ អត់មានរំលាយ[គណបក្ស]ទេ ឥឡូវចាក់ភ្នាល់ បើអត់រំលាយស៊ីតែ១ទេ បើអត់រំលាយសង១០០ អ្នកណាចាញ់មកទារពីខ្ញុំ»។
តំណាងរាស្ត្រគណបក្សសង្គ្រោះជាតិលោក ម៉ៅ មុនីវណ្ណ យល់ថា លោកនាយករដ្ឋមន្ត្រីហ៊ុន សែន កំពុងព្យាយាមបំបែកបំបាក់ផ្ទៃក្នុងគណបក្សសង្គ្រោះជាតិ តាមរយៈការអំពាវនាវឲ្យសមាជិកគណបក្សប្រឆំាងចុះចូលជាមួយគណបក្សកាន់អំណាច។
ទោះជាយ៉ាងណា លោកថា ដំណាក់កាលនេះ អ្នកនយោបាយគួរតែយកបញ្ហាជាតិដាក់លើតុកជជែកគ្នារកដំណោះស្រាយ ជាជាងយកបញ្ហាជាតិភ្នាល់គ្នាបែបនេះ។
លោកនិយាយថា៖ «បើសិនជារំលាយគណបក្សសង្គ្រោះជាតិ តើស្ថានការណ៍ វានិងវិវត្តន៍ទៅរកអី? វាទៅរកទសវត្សទី៨០វិញ វាធ្វើឲ្យខាតប្រយោជន៍ប្រជាពលរដ្ឋខ្មែរយើងច្រើន ដូច្នេះអ្នកនយោបាយ ខ្ញុំយល់ថា គួរតែមករកចំណុចណាមួយ ដែលជាដំណោះស្រាយ ដើម្បីដោះស្រាយជូនជាតិមាតុភូមិរបស់យើងវិញ វាប្រសើរជាង»។
នាយកប្រតិបត្តិអង្គការណិចហ្វិចលោក សំ គន្ធាមី មានប្រសាសន៍ថា ការលើកឡើងរបស់លោក ហ៊ុន សែន មុនតុលាការកំពូលកាត់សេចក្តីបែបនេះ មិនមានអ្វីចំឡែកទេ។ ប៉ុន្តែលោកថា បើតុលាការកំពូលសម្រេចរំលាយគណបក្សសង្គ្រោះជាតិតាមការចង់បានរបស់លោក ហ៊ុន សែន មែន នឹងធ្វើឲ្យប៉ះពាល់ដល់ដំណើរការលិទ្ធិប្រជាធិបតេយ្យ និងសេដ្ឋកិច្ចជាតិជាដើម។
លោកមានប្រសាសន៍ថា «ប៉ះពាល់ដល់ប្រជាធិបតេយ្យ ប៉ះពាល់ដល់ការអភិវឌ្ឍន៍ ហើយបញ្ហាជាតិច្រើន ណាស់ ព្រោះរឿងប្រទេសជាតិដែលដោះស្រាយ រឿងព្រំដែន បោះបង្គោលទំាងអស់ច្រើនណាស់ ហើយបញ្ហាអភិវឌ្ឍន៍ទៀត អាចសេដ្ឋកិច្ចទៀត បើសិនជាមានបញ្ហាអីគេផ្តាច់ជំនួយកូដតា សេដ្ឋកិច្ចនាំចេញទៅអឺរ៉ុប…វាប៉ះពាល់ច្រើនណាស់ដល់ផលប្រយោជន៍ជាតិ ជាពិសេសអ្នករងគ្រោះប្រជាពលរដ្ឋតែម្តង»។
នៅថ្ងៃទី១៦ខែវិច្ឆិកាខាងមុខនេះ តុលាការកំពូលនឹងបើកសវនាការ តាមបណ្តឹងរបស់ក្រសួងមហាផ្ទៃដែលប្តឹងសុំឲ្យរំលាយគណបក្សសង្គ្រោះជាតិ។ ជុំវិញករណីនេះ គណបក្សសង្គ្រោះជាតិ ថា មិនបានដាក់ឯកសារតតាំងក្តីនៅតុលាការនោះទេ ដោយបញ្ជាក់ថា នេះជារឿងនយោបាយ និងចាំដោះស្រាយតាមផ្លូវនយោបាយ។
សហគមន៍អន្តរជាតិ ជាពិសេសប្រទេសមហាអំណាចខាងលោកសេរី បានថ្កោលទោសជាបន្តបន្ទាប់ ជុំវិញការឃុំខ្លួនមេបក្សប្រឆាំង និងការប៉ុនប៉ង រំលាយគណបក្សនេះ ហើយពួកគេព្រមានពីហានិភ័យនានា នៃការដើរថយក្រោយនៃលទ្ធិប្រជាធិបតេយ្យនៅកម្ពុជា។ ប៉ុន្តែ ភាគីរដ្ឋាភិបាល ជាញឹកញ៉ាប់ ហៅសកម្មភាពទាំងនោះ គឺគ្រាន់ជាការអនុវត្តច្បាប់តែប៉ុណ្ណោះ៕
