ខណៈដែលវិបត្តិជនជាតិភាគតិចរ៉ូហ៊ីងយ៉ានៅតែគ្មានដំណោះស្រាយនៅឡើយនោះ ប្រទេសចិននៅថ្ងៃនេះបានស្នើឡើងនូវផែនការ ៣ជំហ៊ាន សម្រាប់វិបត្តិសិទ្ធិមនុស្សមួយនេះ ដែលជំហ៊ានដំបូងនោះ គឺបទឈប់បាញ់ដែលទទួលបានការគាំទ្រពីភូមា និងបង់ក្លាដែស។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មានអន្តរជាតិ Reuters។
បើតាម Reuters ជនជាតិមូស្លីមរ៉ូហ៊ីងយ៉ាជាង ៦០ម៉ឺននាក់ហើយ បានរត់ភៀសខ្លួនទៅប្រទេសបង់ក្លាដែសចាប់តាំងពីចុងខែសីហាមក ដោយសារតែប្រតិបត្តិការបោសសម្អាតពីសំណាក់កងទ័ពភូមា នៅក្នុងរដ្ឋរ៉ាក់ឃីន។ ការរំលោភបំពានទៅលើសហគមន៍ជនជាតិភាគតិចរ៉ូហ៊ីងយ៉ា បានជំរុញឲ្យមានការថ្កោលទោសពីសហគមន៍អន្តរជាតិ។
ខណៈពេលបំពេញទស្សនកិច្ចនៅរដ្ឋធានីណៃពិដោរ រដ្ឋមន្ត្រីការបរទេសចិន លោក វ៉ាង យី បានថ្លែងថា ចិនជឿថា បញ្ហានេះអាចត្រូវដោះស្រាយបានតាមរយៈដំណោះស្រាយមួយដែលភូមា និងបង់ក្លាដែសអាចទទួលយកបានតាមរយៈការពិភាក្សាគ្នា។
ប្រមុខកាទូតចិនរូបនេះ ត្រូវបានដកស្រង់សម្ដីចុះផ្សាយលើវេបសាយក្រសួងការបរទេសចិនកាលពីល្ងាចថ្ងៃម្សិលមិញ ដែលបាននិយាយថា បទឈប់បាញ់មួយ គួរតែកើតចេញពីកិច្ចសន្ទនាទ្វេភាគី ដើម្បីស្វែងរកដំណោះស្រាយដែលអាចដំណើរការបាន។ ជំហ៊ានទី ២ និងទី ៣ គួរតែធ្វើការឆ្ពោះទៅរកដំណោះស្រាយរយៈពេលយូរអង្វែង។
ទោះជាយ៉ាងណា លោក វ៉ាង ថ្លែងថា បទឈប់បាញ់គ្នា បានកើតឡើងនៅនឹងកន្លែងរួចហើយ ហើយវាបានបង្ការកុំឲ្យអំពើហិង្សាឆាបឆេះឡើងទៀត៕