ក្រុមគ្រួសារសាច់ញាតិ នៃសមាជិកដែលបានស្លាប់នៅលើស្ពានកោះពេជ្រ កណ្តាលរាជធានីភ្នំពេញ នៅតែចង់ដឹងពីមូលហេតុពិតនៃការស្លាប់បាត់បង់ជីវិត មនុស្សជាង៣០០នាក់ កាលពី៧ឆ្នាំមុន ដោយថា ពួកគេ មិនរំពឹងនិងទទួលបានយុត្តិធម៌នោះទេ ខណៈអាជ្ញាធរ ពុំមានការស៊ើបអង្តេតអ្វីទៀតឡើយ។
មានប្រសាសន៍ ក្នុងខួប៧ឆ្នាំ នៃព្រឹត្តិការណ៍មនុស្សជាន់គ្នាស្លាប់ នៅថ្ងៃទី២២ ខែវិច្ឆិកានេះ ឪពុកនៃអ្នកដែលបានស្លាប់ លោក ហ៊ុយ សំអុល ឲ្យដឹងថា វាជារឿង ដែលមិនអាចទៅរួចឡើយ ដែលនៅសុខៗ មនុស្សរាប់រយនាក់ ទៅរត់ជាន់គ្នា ដោយគ្មានមូលហេតុនោះ ហើយលោកហាក់មិនជឿទៅលើហេតុផល ដែលអាជ្ញាធរបានប្រាប់ថា «ជាការរត់ជាន់គ្នា» ហើយទទូចឲ្យអាជ្ញាធរ ផ្តល់ហេតុផលមួយសមរម្យ ដែលលោក រួមទាំងសាច់ញ្ញាតិទាំងអស់ផ្សេងទៀត អាចទទួលយកបាន។
លោកបន្ថែមថា «ខ្ញុំមិនចង់បានអ្វីទេ ទោះយ៉ាងណា ក៏កូនខ្ញុំមិនបានមកវិញដែរ តែសូមឲ្យអាជ្ញាធរ ពង្រឹងបន្ថែមរឿងសណ្តាប់ធ្នាប់ និងសន្តិសុខក្នុងពិធីបុណ្យអុំទូក និងពិធីបុណ្យធំៗផ្សេងៗទៀត»។
ឪពុក អ្នកដែលបានស្លាប់ម្នាក់ទៀត គឺលោក អ៊ុំ ប៊ុនរឿង បានឲ្យដឹងថា ទោះពេលវេលាកន្លងទៅ៧ឆ្នាំក្តី លោកនៅតែចង់ចាំ និងមិនអាចបំភ្លេចបាននៅហេតុការណ៍កើតឡើងនោះ ហើយលោកនៅតែមិនអស់ចិត្តនិងមូលហេតុនៃការស្លាប់នេះ។
លោកថា «ខ្ញុំមិននឹងស្មានថា ដល់ថ្នាក់ហ្នឹង មានគ្រោះថ្នាក់នៅលើស្ពាន ហើយរកមូលហេតុមិនឃើញ! ហើយចេះតែនឹក មិនគួរណាកូនស្រីខ្ញុំ យកជីវិតមកដោលនៅស្ពានកោះពេជ្រនេះទេ! តែរឿងនេះ ខ្ញុំមិនសន្និដ្ឋានបានដែរ បើជាន់គ្នា ដូចមិនប៉ុន្មានទេ បើមានឆក់ខ្សែរភ្លើង ឆក់អី ខ្ញុំមិនហានថា ព្រោះខ្ញុំមិនច្បាស់ណា»។
ប្រធានក្រុមប្រឹក្សារាជធានីភ្នំពេញ លោក ម៉ប់ សារិន ដែលដឹកនាំរៀបពីធីរំលឹកវិញ្ញាណក្ខន្ធជនរងគ្រោះនៅថ្ងៃនេះ បានលើកឡើងថា ឧប្បវហេតុ នៃការស្លាប់មនុស្សដ៏ច្រើននេះ គឺជាព្រឹត្តិការណ៍ប្រវត្តិសាស្រ្ត ហើយសម្រាប់សាលារាជធានីភ្នំពេញ ក៏ដូចជាប្រទេសកម្ពុជាទាំងមូល និងយកករណីនេះ ជាមេរៀនដើម្បីបង្កើនការយកចិត្តទុកដាក់។
លោកបន្ថែមថា «ឧប្បវហេតុនេះ គឺជាប្រវត្តិសាស្រ្តសម្រាប់រដ្ឋបាលរាជធានីភ្នំពេញ ហើយរដ្ឋបាលរាជធានីភ្នំពេញ ជម្រុញឲ្យរៀបចំធ្វើពីធីនេះជារៀងរាល់ឆ្នាំ ជាមួយក្រុមគ្រួសារសាច់ញាតិនៃជនរងគ្រោះ ដែលមិនអាចបំភ្លេចបាន ការបាត់បង់សាច់ញាតិកូនប្រុសស្រី ដោយសារការរត់ជាន់គ្នាស្លាប់នៅលើស្ពានកោះពេជ្រ»។
មនុស្សចំនួន ៣៥១នាក់ បានបាត់បង់ជីវិត និងជាង ៧០០នាក់ទៀតបានរងរបួស នៅក្នុងព្រឹត្តិការណ៍រត់ជាន់គ្នានៅស្ពានកោះពេជ្រ កាលពីថ្ងៃទី២២ ខែវិច្ឆិកា ឆ្នាំ២០១០ នៃពិធីបុណ្យអុំទូកយប់ចុងក្រោយ។ ក្រោយមានការស្លាប់មនុស្សដ៏ច្រើននេះ រដ្ឋាភិបាលបានផ្អាកពិធីបុណ្យអុំទូកចំនួន៣ឆ្នាំជាប់ៗគ្នា ដោយលើកឡើងពីមូលហេតុផ្សេងៗ។
កាលពីឆ្នាំ២០១០ និង ភ្លាមៗ ក្រោយពេលហេតុការណ៍នេះកើតឡើង លោកនាយករដ្ឋមន្ត្រី ហ៊ុន សែន បានប្រកាសកាលថា គ្មានមន្ត្រីរដ្ឋាភិបាលណាម្នាក់ ត្រូវបានដាក់ទណ្ឌកម្ម ឬ ដកចេញពីតំណែង ចំពោះឧបទ្ទវហេតុរត់ជាន់គ្នាស្លាប់នៅលើស្ពានកោះពេជ្រ ហើយ លោកបានហៅសោកនាដកម្មនេះ ថាជាកំហុសរួម ខណៈមជ្ឈដ្ឋានជាតិនិងអន្តរជាតិ ស្នើឲ្យមានការស៊ើបអង្គេតដោយឯករាជ្យលើរឿងនេះ៕