រដ្ឋាភិបាលបារាំង បានក្រើនរំឭកជាថ្មីដល់រដ្ឋាភិបាលកម្ពុជា ឲ្យងាកទៅដើរតាមគន្លងប្រជាធិបតេយ្យឡើងវិញ បន្ទាប់ពីបក្សប្រឆាំងដ៏ធំនៅកម្ពុជា ត្រូវបានរំលាយចោល ប៉ុន្តែមន្ត្រីជាន់ខ្ពស់កម្ពុជា អះអាងថា កម្ពុជាប្រកាន់ខ្ជាប់តាមគោលការណ៍ប្រជាធិបតេយ្យ។
គណបក្សសង្គ្រោះជាតិ ដែលទទួលបានសំឡេងឆ្នោតប្រហែល ៣លាននាក់នៅក្នុងការបោះឆ្នោតជាតិកាលពីឆ្នាំ២០១៣នោះ ត្រូវបានតុលាការកំពូលសម្រេចរំលាយចោលកាលពីថ្ងៃទី១៦ ខែវិច្ឆិកា ហើយថ្នាក់ដឹកនាំ ១១៨រូបរបស់បក្សនេះ ត្រូវបានហាមឃាត់មិនឲ្យធ្វើនយោបាយរយៈពេល ៥ឆ្នាំ ខណៈដែលមេដឹកនាំបក្សនេះ លោក កឹម សុខា កំពុងស្ថិតក្រោមការឃុំខ្លួនក្នុងពន្ធនាគារនៅឡើយ ក្រោមការចោទប្រកានពីរដ្ឋាភិបាលថា «ក្បត់ជាតិ»។
ថ្លែងក្នុងកិច្ចប្រជុំមួយនៅវិមានព្រឹទ្ធសភាកាលពីថ្ងៃទី២៣ វិច្ឆិកាកន្លងទៅ រដ្ឋលេខាធិការក្រសួងការបរទេសបារាំង លោក Jean-Baptiste Lemoyne បានមានប្រសាសន៍ថា រដ្ឋាភិបាលបារាំង នឹងមិនព្រងើយកន្តើយទៅនឹងស្ថានការណ៍នយោបាយចុងក្រោយនៅកម្ពុជានោះទេ ក្នុងឋានៈខ្លួនជាអតីតសហប្រធាននៃសន្និសីទទីក្រុងប៉ារីសឆ្នាំ១៩៩១។
លោក Jean-Baptiste Lemoyne បន្ដថា កម្ពុជាគួរងាកទៅគោរពសិទ្ធិមនុស្ស លទ្ធិប្រជាធិបតេយ្យ និងធានាឲ្យមានការបោះឆ្នោតមួយ ដែលមានភាពសេរី ត្រឹមត្រូវ និងយុត្ដិធម៌។
លោក Jean-Baptiste Lemoyne ថ្លែងថា៖ «ការចាប់ខ្លួនលោក កឹម សុខា ហើយក៏ដូចជាអវត្តមានរបស់បក្សប្រឆាំង សម្រាប់ការបោះឆ្នោតនៅឆ្នាំក្រោយ ជាក្ដីបារម្ភយ៉ាងខ្លាំង នៅក្នុងក្របខណ្ឌនេះ។ ប្រទេសបារាំង ជាធម្មតា បានយកចិត្តទុកដាក់ក្នុងការចូលរួម និងបង្ហាញដល់រដ្ឋមន្ដ្រីអឺរ៉ុប និងរដ្ឋមន្ដ្រីក្រសួងការបរទេសកម្ពុជា លោក ប្រាក់ សុខុន នៅថ្ងៃទី២០ វិច្ឆិកា ក្នុងជំនួបវេទិកាអាស៊ាន […] ជាចុងក្រោយ ក្នុងបរិបទនៃសហភាពអឺរ៉ុប ដែលច្បាស់ណាស់ថា របបនេះ បានទទួលការអនុគ្រោះពន្ធយ៉ាងច្រើន ហើយនៅកម្ពុជា ត្រូវតែអមដោយការគោរពសិទ្ធិទាំងឡាយ គោរសិទ្ធិជាមូលដ្ឋាន…»។
លោក Jean-Baptiste Lemoyne បានបញ្ជាក់ពីជំហររដ្ឋាភិបាលបារាំងបែបនេះ បន្ទាប់ពីសមាជិកព្រឹទ្ធសភាបារាំង លោក André Gattolin បានបង្ហាញក្ដីកង្វល់ជាថ្មី អំពីបញ្ហាគោរពសិទ្ធិមនុស្ស និងលទ្ធិប្រជាធិបតេយ្យក្នុងប្រទេសកម្ពុជា។
VOD មិនអាចទាក់ទងអ្នកនាំពាក្យក្រសួងការបរទេសកម្ពុជា លោក ជុំ សុន្ទរី បានទេ។
អ្នកនាំពាក្យគណបក្សកាន់អំណាច លោក សុខ ឥសាន មានប្រសាសន៍ថា ភាគីបារាំងបានសន្យាថា នឹងមិនលូកដៃជ្រៀតជ្រែកកិច្ចការផ្ទៃក្នុងរបស់កម្ពុជាឡើយ។ ចំពោះការជំរុញឲ្យគោរពសិទ្ធិមនុស្សនោះ លោកថា នេះគ្រាន់ជាការបញ្ចេញទស្សនៈមួយ មិនឆ្លុះបញ្ចាំងការពិតក្នុងសង្គមកម្ពុជា ខណៈលោកថា រដ្ឋាភិបាលបាន និងកំពុងអនុវត្តច្បាប់ និងពង្រឹងលទ្ធិប្រជាធិបតេយ្យរួចទៅហើយ។
លោក សុខ ឥសាន មានប្រសាសន៍ថា៖ «តាមព័ត៌មានដែលខ្ញុំទទួលបាន គឺបារាំងមិនលូកដៃផ្ទៃក្នុងកម្ពុជាទេ នៅពេលដែលសហគមន៍អឺរ៉ុប ក៏ដូចជាតំណាងសភាសហគមន៍អឺរ៉ុប មកគំរាមដាក់គំនាប ឬដាក់ទណ្ឌកម្ម មកលើរដ្ឋាភិបាលកម្ពុជា គឺបារាំង គាត់អត់មានមាត់ទេ ការមានវិធានការផ្លូវច្បាប់ ចំពោះមេបក្សប្រឆាំង ក៏ដូចជាក្រុមមេដឹកនាំបក្សប្រឆាំង ខ្ញុំយល់ថា អាហ្នឹងជាការអនុវត្តច្បាប់ ពីព្រោះគាត់ ប្រព្រឹត្តល្មើសច្បាប់»។
បារាំង ដែលជាសមាជិកសំខាន់មួយនៅក្នុងសហភាពអឺរ៉ុប សហរដ្ឋអាមេរិក និងចក្រភពអង់គ្លេស ថ្កោលទោសទៅលើរដ្ឋាភិបាលលោក ហ៊ុន សែន បន្ទាប់ពីបក្សប្រឆាំងដ៏ធំនៅកម្ពុជា ត្រូវបានរំលាយចោល ហើយព្រមានដាក់ទណ្ឌកម្មសេដ្ឋកិច្ចលើប្រទេសកម្ពុជា។
អ្នកជំនាញផ្នែកសេដ្ឋកិច្ច លោក ង៉ែត ជូ យល់ថា អ្នកនយោបាយខ្មែរ គួរវិលទៅរកតុចរចា មុននឹងសហគមន៍អន្ដរជាតិដាក់ទណ្ឌកម្ម ហើយអ្នកដែលរងគ្រោះខ្លាំងជាងគេ គឺប្រជាពលរដ្ឋខ្មែររាប់លាននាក់។
លោកថា៖ «យើងគិតថា មានតែការចរចា ពិភាក្សាគ្នា យ៉ាងណាក៏ដោយ រដ្ឋាភិបាលក៏គាត់ឈរលើជំហរផលប្រយោជន៍កម្មករ និងកសិករជាធំ ហើយខាងសហគមន៍អឺរ៉ុប និងខាងសហរដ្ឋអាមេរិកក្ដី ក៏ត្រូវគិតគូពីបញ្ហាមនុស្សធម៌ បញ្ហាជីវភាពរបស់ពលរដ្ឋក្រីក្រ…»។
ទោះជាយ៉ាងណា ប្រទេសកុម្មុយនីស្ដចិនតែមួយប៉ុណ្ណោះ បានការពារចំណាត់ការរបស់រដ្ឋាភិបាលកម្ពុជា ដោយចាត់ទុកជាការពារសន្តិភាព និងស្ថេរភាពជាតិ៕
