ក្រសួងគមនាគមន៍ឥណ្ឌូនេស៊ី បាននិយាយនៅថ្ងៃនេះថា ក្រសួងនឹងបន្តបិទព្រលានយន្តហោះអន្តរជាតិមួយនៅលើកោះបាលីរយៈពេល ២៤ម៉ោងទៀត ដោយសារតែកម្ទេចផេះភ្នំភ្លើងអាហ្កុង។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
Reuters បានចុះផ្សាយបន្តថា ក្រសួងដដែលនេះ បាននិយាយនៅក្នុងសេចក្ដីប្រកាសព័ត៌មានមួយថា ផេះភ្នំភ្លើងបានគ្របដណ្ដប់លើបណ្ដាញជើងហោះហើរ។
ការបិទព្រលានយន្តហោះនោះ គ្រោងនឹងបញ្ចប់នៅម៉ោង ៧ព្រឹកថ្ងៃទី២៩ ខែវិច្ឆិកា។ អាជ្ញាធរឥណ្ឌូនេស៊ី បានជូនដំណឹងផងដែរថា ព្រលានយន្តហោះលុមបូក បានបើកដំណើរការឡើងវិញហើយ បន្ទាប់ពីបិទកាលពីយប់មិញនេះ ដោយសារតែបន្ទុះភ្នំភ្លើងនោះ។
ព្រលានយន្តហោះ ១០ផ្សេងទៀត ត្រូវបានគេរៀបចំសម្រាប់បង្វែរជើងហោះហើរចូលទៅប្រទេសឥណ្ឌូនេស៊ី ក្នុងនោះមានទាំងព្រលានយន្តហោះនៅតាមបណ្ដាខេត្តនៅជាប់នឹងកោះបាលី។
កាលពីថ្ងៃម្សិលមិញនេះ អាជ្ញាធរឥណ្ឌូនេស៊ីបានបញ្ជាទៅប្រជាជន ១សែននាក់ ដែលរស់នៅជិតភ្នំភ្លើង ឲ្យជម្លៀសខ្លួនជាបន្ទាន់ ដោយព្រមានថា ភ្នំភ្លើងអាហ្គុងអាចនឹងផ្ទុះជះកំអ៊ែរផេះរបស់វាដល់ចម្ងាយ ៨ ទៅ ១០គីឡូម៉ែត្រជុំវិញទីនោះ៕
