អង្គការអន្ដរជាតិមួយ ដែលតំណាងឲ្យបណ្តុំអង្គរជាតិចំនួន១១៩ បានថ្កោលទោសប្រមុខរដ្ឋាភិបាលកម្ពុជា ដែល បានថ្លែងសារព្រមានបិទអង្គការសិទ្ធិមនុស្ស កាលពីពេលថ្មីៗនេះ ប៉ុន្ដែមន្ដ្រីជាន់ខ្ពស់រដ្ឋាភិបាល ឆ្លើយតបថា សេចក្ដីថ្លែងការណ៍នោះ គ្មានឥទ្ធិពលមកលើកម្ពុជាឡើយ។
កាលពីថ្ងៃទី២៦ខែវិច្ឆិកា ក្នុងពិធីជួបជាមួយក្រុមកម្មកររោងចក្រ លោកនាយករដ្ឋមន្ដ្រី ហ៊ុន សែន បានបញ្ជាផ្ទាល់មាត់ ឲ្យក្រសួងមហាផ្ទៃ ពិនិត្យផ្លូវច្បាប់ ដើម្បីបិទមជ្ឈមណ្ឌលសិទ្ធិមនុស្ស ហៅកាត់ថា CCHR ដោយចោទថា អង្គការមួយនេះ បានបម្រើបរទេស និងមានជាប់ពាក់ព័ន្ធ នឹងអតីតមេដឹកនាំគណបក្សសង្គ្រោះជាតិ លោក កឹម សុខា។
ក្នុងសេចក្ដីថ្លែងការណ៍ ចេញផ្សាយនៅថ្ងៃទី២៨ វិច្ឆិកាម្សិលមិញ បណ្ដាញអង្គការសកល ដើម្បីការពារ និងលើកកម្ពស់សេរីភាពបញ្ចេញមតិ ហៅកាត់ថា “IFEX” ដែលមានមូលដ្ឋាននៅទីក្រុងតូរ៉ុនតូ ប្រទេសកាណាដា និងតំណាងឲ្យអង្គការចំនួន១១៩ស្ថាប័ននោះ បានថ្កោលទោសយ៉ាងខ្លាំងចំពោះការព្រមាននេះថា ពុំមានមូលដ្ឋានច្បាស់លាស់ និងថា អាចឈានទៅបង្កើតឲ្យមាននូវបរិយាកាសមួយ រឹតត្បិតសេរីភាពសារព័ត៌មាន នៅមុនការបោះឆ្នោតនាឆ្នាំក្រោយ។
បើតាមសេចក្ដីថ្លែងការណ៍ បណ្ដាញអង្គការសកលដើម្បីការពារ និងលើកកម្ពស់សេរីភាពបញ្ចេញមតិ ជឿជាក់ថា មជ្ឈមណ្ឌលសិទ្ធិមនុស្ស បានប្រកាន់ខ្ជាប់នូវឯករាជ្យភាពរបស់ខ្លួន ដោយមិនប្រកាន់គណបក្សនយោបាយ និងធ្វើការ ដើម្បីលើកកម្ពស់សិទ្ធិមនុស្សនៅក្នុងប្រទេសកម្ពុជា។
សេចក្ដីថ្លែងការណ៍របស់អង្គការ IFEX បន្ដថា ចំណាត់ការរបស់រដ្ឋាភិបាល នឹងប្រាប់ទៅពិភពលោកថា កម្ពុជា មិនបានគោពតាមអ្វី ដែលខ្លួនបានសន្យា ដោយធានាឲ្យមានការបញ្ចេញមតិ និងការប្រមូលផ្តុំដោយសេរីនោះទេ។
នាយិកាប្រតិប្រតិអង្គការ IFEX លោកស្រី Annie Game មានប្រសាសន៍ក្នុងសេចក្ដីការណ៍នោះថា ការបញ្ជាឲ្យបិទអង្គការ CCHR នឹងធ្វើឲ្យស្ថានភាពសិទ្ធិមនុស្សនៅកម្ពុជាកាន់តែយាប់យឺន ខណៈក្រុមអង្គការសង្គមស៊ីវិល និងសំឡេងឯករាជ្យមួយចំនួនទៀត ក៏កំពុងទទួលរងការរឹតត្បិតសិទ្ធិសេរីភាព។
អ្នកនាំពាក្យក្រសួងមហាផ្ទៃ លោក ខៀវ សុភ័គ្រ មានប្រសាសន៍ថា សេចក្ដីថ្លែងការណ៍នេះ មិនមានឥទ្ធិពលលើកម្ពុជានោះទេ និងថា រដ្ឋាភិបាល កំពុងបន្ដការស៊ើបអង្កេតលើអង្គការ CCHR នេះ។
លោកថា៖ «អង្គការហ្នឹង មិនមែនជាអ្នកគ្រប់គ្រងរដ្ឋកម្ពុជាទេ មិនមែនជាអ្នកថែរក្សាសន្ដិសុខរដ្ឋកម្ពុជាទេ គ្រាន់ជាអង្គការស៊ីឈ្នួល ការព្រមានអីនេះ គឺអត់មានប្រសិទ្ធិភាពទេ ហើយក្នុងករណីបើអង្គការណុង រឹងទទឹង អង្គការហ្នឹង ក៏មិនអាចចូលកម្ពុជា យើងកំពុងតែដំណើរការស៊ើបអង្កេត ព្រោះកន្លងមក អង្គការ CCHR ហ្នឹង បានធ្វើអីខ្លះ? បានជួយអីខ្លះដល់សង្គម ក្រៅតែពីការជេរ តិះទៀន និងកាន់ជើងបក្សប្រឆាំង ដូចជាយើងគ្មានឃើញ អង្គការហ្នឹងធ្វើអីទេ»។
នាយិកាអង្គការសីលការ លោកស្រី ធីតា ឃឹះ បង្ហាញក្ដីបារម្ភខ្លាំង ដោយថា ការព្រមានបិទអង្គការសិទ្ធិមនុស្សនេះ នឹងធ្វើឲ្យបណ្ដុំអង្គការសង្គមស៊ីវិលផ្សេងទៀត មានការភិតភ័យ និងមិនហ៊ានធ្វើសកម្មភាពចូលរួមក្នុងសង្គមដូចមុន។
លោកស្រីថា៖ «យល់ឃើញថា តែកាលណាប៉ះពាល់ដល់អង្គការមួយ វាធ្វើឲ្យយើងមានអារម្មណ៍ដូចគ្នាជាមួយអង្គការរបសយើងដែរ ចំពោះអង្គការដទៃទៀត ក៏ដូចគ្នា»។
ក្រោយបញ្ជាដោយផ្ទាល់មាត់ពីលោកនាយករដ្ឋមន្ដ្រី ហ៊ុន សែន មជ្ឈមណ្ឌលសិទ្ធិមនុស្សកម្ពុជា បានអះអាងថា ខ្លួនប្រកាន់ខ្ជាប់នូវជំហរឯករាជ្យរបស់ខ្លួនពីគណបក្សនយោបាយទាំងអស់ ហើយប្ដេជ្ញា បន្តលើកកម្ពស់សិទ្ធិមនុស្សនៅក្នុងប្រទេសកម្ពុជា។
ការព្រមានពីលោកនាយករដ្ឋមន្ដ្រី ហ៊ុន សែន គឺមិនដល់រយៈពេល៣ខែផង បន្ទាប់ពីរដ្ឋាភិបាល បានសម្រេចបិទអង្គការសង្គមស៊ីវិល និងបណ្ដាញសារព័ត៌មានមួយចំនួន ដែលដំណើរការក្នុងប្រទេសកម្ពុជា។
មជ្ឈមណ្ឌលសិទ្ធិមនុស្ស CCHR ត្រូវបានបង្កើតឡើងដោយអតីតប្រធានគណបក្សប្រឆាំង លោក កឹម សុខា នៅឆ្នាំ២០០២ ហើយក្រោយមកលោកបានលាឈប់ និងត្រូវបានដឹកនាំបន្ដដោយលោក អ៊ូ វរៈ ពីឆ្នាំ២០០៧ ដល់ឆ្នាំ២០១៣។ ហើយលោកស្រី ចក់ សុភាព បានដឹកនាំស្ថាប័នសិទ្ធិមនុស្សនេះ បន្ដរហូតដល់ពេលបច្ចុប្បន្ន៕
