អាណាព្យាបាល និងសិស្សមួយចំនួននៅវិទ្យាល័យមួយក្នុងស្រុកបវេលខេត្តបាត់ដំបង បានបង្ហាញក្តីបារម្ភពីផលប៉ះពាល់ដល់ការសិក្សា ខណៈក្រុមគ្រូបង្រៀន និងនាយកសាលានៅទីនោះ កំពុងមានជម្លោះនឹងគ្នា។
នាយកវិទ្យាល័យបវេល លោក ហូ វុទ្ធី បានប្រាប់វីអូឌីនៅថ្ងៃនេះថា លោកបានដាក់ពាក្យបណ្ដឹងប្រឆាំងនឹងលោក រ៉ាត់ សារ៉េត គ្រូបង្រៀនផ្នែកគណិតវិទ្យា និងគ្រូបង្រៀនម្នាក់ទៀត កាលពីថ្ងៃទី០៨ ខែធ្នូកន្លងមកនេះ ដោយចោទគ្រូបង្រៀនទាំង ២រូបនោះថា បានបំផ្លាញទ្រព្យសម្បត្តិសាធារណៈរបស់សាលា។
លោកបន្តថា លើសពីនេះលោកបង្រៀនផ្នែកគណិតវិទ្យាគឺ លោកគ្រូ រ៉ាត់ សារ៉េត បានផឹកស្រវឹង និងជេរប្រមាថទៅលើរូបគាត់រួមទាំងគ្រូផ្សេងៗទៀតផងដែរ។
លោកបន្ថែមថា៖ «រយៈកាលកន្លងមកហ្នឹង គាត់តែងតែប្រើពាក្យគំរាមកំហែងមកលើលោកគ្រូអ្នកគ្រូនៅក្នុងហ្នឹង។ ជួនកាលគាត់ជេរខ្ញុំអញ្ចឹងទៅ ហើយខ្ញុំចេះនៅអត់ធ្មត់ ប៉ុន្តែ រហូតមកដល់ថ្ងៃទី៧ និងទី៨នេះ គាត់បានទៅបំផ្លាញកន្លែងព័ត៌មាន គាត់បានគប់បែកកញ្ចក់អស់ បំបែកតុ ហើយនឹងកាប់ដើមក្នុងសាលាចោលអស់ចំនួន ៣ដើម ដល់អញ្ចឹង ខាងប៉ូលីសគេចុះមកស្រាវជ្រាវ ហើយគេឲ្យខ្ញុំប្តឹង ខ្ញុំក៏ប្តឹងទៅ»។
គ្រូបង្រៀនផ្នែកគណវិទ្យា លោក រ៉ាត់ សារ៉េត បានទទួលស្គាល់ថា លោកពិតជាបានបំផ្លាញទ្រព្យសាលាខ្លះមែន ប៉ុន្តែថា មិនច្រើនដូចការលើកឡើងរបស់នាយកសាលានោះទេ ដោយថា លោកបានធ្វើខូចខាតបង់អង្គុយលេងចំនួនពីរប៉ុណ្ណោះ។
លោកប្រាប់ថា លោកខឹងនឹងនាយកសាលាខ្លាំងពេក ដោយចោទ នាយកសាលារូបនោះថា តែងតែជេរប្រមាថមកលើលោកគ្រូអ្នកគ្រូ និងគាបសង្កត់លើសិស្សជាដើម។
លោកបន្ថែមថា៖ «គាត់[នាយកសាលា]តែងតែប្រមាណមើលងាយជេរដល់ក្មេងៗ ជាពិសេសហ្នឹង គ្រូៗបង្រៀននៅក្នុងសាលាហ្នឹង។ គាត់គ្រូនៅក្នុងសាលាហ្នឹង សុទ្ធតែពួកល្មើសគុណ សុទ្ធតែពួកឈាមខ្មៅ ដល់ពេលអញ្ចឹង ខ្ញុំទ្រាំអត់បាន ខ្ញុំធ្វើអញ្ចឹង ចង់ឲ្យមហាជនគេដឹង ចង់ជួយដល់ក្មេងៗ ហើយខ្ញុំធ្វើអញ្ចឹងបានប្រយោជន៍អីមកខ្ញុំ? ខ្ញុំតែងខាតបង់ មានតែខ្មាស់គេ តែខ្ញុំសុខចិត្តខូចឈ្មោះ ឲ្យបានជួយក្មេងៗ»។
ទោះជាយ៉ាងណា ក្រុមអាណាព្យាបាល និងសិស្សានុសិស្ស បានស្នើឲ្យមានការសម្របសម្រួលគ្នារវាងនាយកសាលា និងគ្រូបង្រៀន ដោយថា មិនចង់ឲ្យវិវាទនោះ ប៉ះពាល់ដល់ការសិក្សារបស់សិស្សានុសិស្សនៅទីនោះ។
អាណាព្យាបាលសិស្សម្នាក់ លោក ព្រំ ពិសិដ្ឋ មានប្រសាសន៍ថា លោកមិនបានដឹងថា ភាគីខាងណាខុស ឬត្រូវនោះទេ តែលោកមិនចង់ឲ្យមានការប្តឹងផ្តល់គ្នា និងឃាត់ខ្លួនគ្រូបង្រៀនណាម្នាក់ដែរ។
លោកបន្ថែមថា៖ «ប្រសិនបើមានការចាប់ ឬឃាត់ខ្លួនគាត់[លោកគ្រូ] វាធ្វើឲ្យប៉ះពាល់ដល់សិស្សរាប់រយនាក់ ហើយពួកគាត់ អត់សប្បាយចិត្ត ព្រោះប៉ះពាល់ដល់កាសិក្សារបស់គាត់។ ម្សិលមិញនេះ ខាតអស់ចំនួន ២ម៉ោង ដោយសារនាយកសាលា នឹងដាក់គំនាប ហៅសិស្សទៅប្រជុំថា ក្នុងនាមជាសិស្ស កុំចេះដឹងការងាររបស់គ្រូ ទុកឲ្យគ្រូដោះស្រាយគ្រូនឹងគ្រូ ប៉ុន្តែ ឧទាហណ៍ ប្រសិនដោះស្រាយគ្រូនឹងគ្រូមានការដាក់គំនាប មានការឃាត់ខ្លួន ចាប់ខ្លួនណាមួយ សិស្សប្រហែលពួកគាត់អត់សប្បាយចិត្តទេ គាត់គាំទ្រគ្រូរបស់គាត់ ពីព្រោះលោកគ្រូរបស់គាត់មានវិធីសាស្ត្រ និងស្នាដៃច្រើនក្នុងការបង្រៀនសិស្ស»។
សិស្សថ្នាក់ទី១២ម្នាក់ដែលសុំបញ្ចេញឈ្មោះ បាននិយាយថា សិស្សានុសិស្សប្រហែល ១០០នាក់ បានប្រមូលផ្ដុំគ្នាក្នុងថ្នាក់រៀនរបស់ពួកគេ និងបង្ហាញក្ដីបារម្ភខ្លាចមានការចាប់ ឬឃាត់គ្រូបង្រៀនទាំង ២រូបនោះ។
យុវតីរូបនោះ ប្រាប់ថា ប្រសិនបើមានការឃាត់ខ្លួនលោកគ្រូបង្រៀនផ្នែកគណវិទ្យា និងសលីធម៌មែន ពួកគេនឹងនាំគ្នាតវ៉ា ដោយថា លោកគ្រូទាំងពីរនាក់នោះ មិនមានកំហុសអ្វីដល់ថ្នាក់ចាប់ ឬឃុំខ្លួននោះទេ។
កញ្ញាបន្ថែមថា៖ «គ្រាន់តែថា ចង់ឲ្យពួកគាត់សម្របសម្រួលគ្នា ដើម្បីឲ្យគាត់នៅបង្រៀនពួកខ្ញុំដូចធម្មតា។ ខ្ញុំឃើញសិស្សភាគ ច្រើន គេរៀនអត់ចូលជាមួយគ្រូផ្សេង ប៉ុន្តែ គាត់បង្រៀនល្អ យើងឆាប់យល់អញ្ចឹង ហើយបើមានគាត់នៅបង្រៀនអញ្ចឹងទៅ ពួកខ្ញុំមានសង្ឃឹមប្រឡងថ្នាក់ទី ១២ជាប់ បើថាអត់ពីគាត់ទៅយ៉ាប់ដែរ»។
អនុប្រធានការិយាល័យអប់រំយុវជននិងកីឡាស្រុកបវេល លោក សួង វេង មានប្រសាសន៍ថា រឿងនេះជាជម្លោះផ្ទៃក្នុងសាលា តិចតួចប៉ុណ្ណោះមិនដល់ថ្នាក់ចាប់ ឬឃុំខ្លួននោះទេ ហើយថា ការិយាល័យអប់រំយុវជន និងកីឡាស្រុកកំពុងធ្វើការសម្របសម្រួលដោះស្រាយបញ្ចប់ជម្លោះនេះហើយ៕
