មេបញ្ជាការកងទ័ពជើងទឹកហ្វីលីពីន​ត្រូវដកតំណែង​

រដ្ឋមន្ត្រីក្រសួងការពារជាតិរបស់ហ្វីលីពីនបានប្រកាសដកតំណែងមេបញ្ជាការកងទ័ពជើងទឹក​​ដោយសារកំហុសនៃភាពយឺតយ៉ាវក្នុងការរៀបចំឲ្យក្រុមហ៊ុន​បរទេសកសាងនាវាចម្បាំងពីរគ្រឿង ដែលមានទឹកប្រាក់ជាង៣០០លានដុល្លារ។​

មេបញ្ជាការកងទ័ពជើងទឹក​លោក ​Ronald Joseph Mercado ត្រូវបានដកចេញពីតំណែងកាលពីថ្ងៃអង្គារម្សិលមិញ ដែលនាំឲ្យមានការភ្ញាក់ផ្អើលពីសាធារណជន។ នេះបើតាមសារព័ត៌មាន ​South China Morning Post។​

រដ្ឋមន្ត្រីក្រសួងការពារជាតិ​លោក​Delfin Lorenzana ថ្លែងប្រាប់អ្នកសារព័ត៌មាននៅថ្ងៃពុធនេះថា លោកទទួលបានការអនុញ្ញាតពីប្រធានាធិបតីឌូទើតេ ក្នុងការសម្រេចនេះ ពាក់ព័ន្ធនិងកំហុសក្នុងការកសាងនាវាចម្បាំងដែលជួលក្រុមហ៊ុនកូរ៉េខាងត្បូងធ្វើឲ្យ។​

រដ្ឋាភិបាលហ្វីលីពីន បានចុះហត្ថលេខាកាលពីឆ្នាំមុនជាមួយក្រុមហ៊ុន​ Hyundai ក្នុងការរៀបចំកសាងនាវាចម្បាំងពីរគ្រឿង ឲ្យហើយរួចរាល់​​នៅឆ្នាំ២០២០និង២០២១។​

រដ្ឋមន្ត្រីក្រសួងការពារជាតិបានលើកឡើងថា កិច្ចការនេះរៀបចំរួចរាល់ជាច្រើនខែមកហើយ ប៉ុន្តែមេបញ្ជាការកងទ័ពជើងទឹកមិនបានបំពេញការងារនេះទេ ដោយថា មានការពិនិត្យឡើងវិញជាញឹកញាប់លើគម្រោង និង ពន្យារពេល​ ធ្វើឲ្យក្រុមហ៊ុនមិនអាចដំណើរការបាន៕