ប្រធានអង្គភាពប្រឆាំងអំពើពុករលួយ ហៅកាត់ថា ACU បានអះអាងថា សេចក្ដីព្រាងច្បាប់ការពារសាក្សី ត្រូវបានរៀបចំឡើងសម្រេចបាន ៩០ភាគរយហើយ ខណៈដែលអង្គការសង្គមស៊ីវិល បានជំរុញឲ្យពន្លឿនសេចក្ដីព្រាងច្បាប់នេះ។
ក្នុងសិក្ខាសាលា «អ្នកសារព័ត៌មាន និងការប្រយុទ្ធប្រឆាំងនឹងអំពើពុករលួយ» កាលពីម្សិលមិញ ប្រធាន ACU លោក ឱម យ៉ិនទៀង បានថ្លែងថា សេចក្តីព្រាងច្បាប់ការពារសាក្សី ត្រូវបានព្រាងឡើងបាន ៩០ភាគរយហើយ ដោយមានការចូលរួមពីភាគីពាក់ព័ន្ធជាច្រើន។ លោកបន្ថែមថា សប្តាហ៍ក្រោយនេះ លោក និងក្រសួងយុត្តិធម៌នឹងជជែកបន្ថែមលើមាត្រាទោសទណ្ឌ។
លោក ឱម យ៉ិនទៀង ថ្លែង៖ «ឥឡូវនេះជាដំណាក់កាលមួយថា យើងជជែកគ្នាចប់ហើយ នៅពាក់ព័ន្ធតែទោសទេ តើជាប់គុកប៉ុន្មាន? ហើយច្បាប់ស្រុកណា គឺដូចតែគ្នាទេ តែពាក់ព័ន្ធទោស គេប្រគល់ឲ្យក្រសួងយុត្តិធម៌មើលចុងក្រោយ ទើបយើងអាចស្នើទៅសភាបាន។ អញ្ចឹង ក្រសួងយុត្តិធម៌ក៏ចូលជាមួយយើងដែរ តែគាត់និយាយទូទៅទាំងអស់ ប៉ុន្តែ គ្រាន់អ្នកឯងខ្ចប់បានស្អាតហើយ ក្រសួងយុត្តិធម៌មើលពីរឿងផ្នែកទោស។ ហើយតាមខ្ញុំដឹង អាទិត្យក្រោយ រដ្ឋមន្ត្រីក្រសួងយុត្តិធម៌ និងខ្ញុំ ជួបគ្នានិយាយហើយ»។
អង្គការតម្លាភាពកម្ពុជា បានជំរុញឲ្យពន្លឿនច្បាប់ការពារអ្នករាយការណ៍អំពើពុករលួយ ដើម្បីទប់ស្កាត់អំពើពុករលួយ ដោយថា បើទោះជាមានក្របខណ្ឌគតិយុត្តិរឹងមាំ ប៉ុន្តែ ការអនុវត្តនៅមិនទាន់បានល្អនៅឡើយ។
ក្នុងរបាយការណ៍វាយតម្លៃអំពីសុចរិតភាពធរុកិច្ចថ្នាក់ជាតិ ដែលផ្សព្វផ្សាយកាលពីសប្តាហ៍មុន អង្គការតម្លាភាពកម្ពុជា បានឲ្យពិន្ទុសូន្យចំពោះការការពារសាក្សី ដោយរកឃើញថា ពុំមានកិច្ចការពារឯករាជ្យផ្លូវច្បាប់សម្រាប់អ្នករាយការណ៍ពីអំពើពុករលួយឡើយ។
ច្បាប់ការពារសាក្សី ដែលត្រូវបានផ្តួចផ្តើមធ្វើតាំងពីខែវិច្ឆិកាឆ្នាំ២០១៤ដោយអង្គភាពប្រឆាំងអំពើពុករលួយ និងគណកម្មការប្រឆាំងអំពើពុករលួយនៃរដ្ឋសភានោះ ត្រូវបានបំបែកជាពីរ គឺសេចក្តីព្រាងច្បាប់ការពារសាក្សី និងសេចក្តីព្រាងច្បាប់បុគ្គលរាយការណ៍៕
