នាយករដ្ឋមន្ត្រីកម្ពុជា លោក ហ៊ុន សែន បានរំឭកឡើងវិញ ពីតម្លៃនៃថ្ងៃ២ធ្នូ ដែលលោកហៅថា ថ្ងៃនោះហើយបានផ្តល់កំណើតថ្មី ដល់ប្រជាពលរដ្ឋរាប់លាននាក់ និងថាជាថ្ងៃរំលាយអង្គការចាត់តាំងរបស់ខ្មែរក្រហម នាំសន្តិភាពពេញលេញដល់កម្ពុជា។
លោក ហ៊ុន សែន ក្នុងពិធីជួបកម្មករ នៅរាជធានីភ្នំពេញ នៅថ្ងៃពុធនេះ បានថ្លែងថា ការរីកចម្រើនផ្នែកវិស័យកាត់ដេរ ដែលជំរុញឲ្យកម្មករមានប្រាក់ខែ សម្រាប់ដោះស្រាយបញ្ហាជីវភាព ដូចពេលនេះ លោកថា បានពីការខំប្រឹងប្រែងរបស់គណបក្សប្រជាជនកម្ពុជា។
លោក ហ៊ុន សែន បានរំឭកពីតម្លៃនៃថ្ងៃ២ធ្នូ ដែលគណបក្សនេះ បង្កើតចលនាតស៊ូប្រឆំាំង រហូតផ្តួលរំលំរបបខ្មែរក្រហម រំដោះពលរដ្ឋរាប់លាននាក់ចេញពីការកាប់សម្លាប់ និងរំឭកពីការខំប្រឹងប្រែង បន្តជាមួយសម្តេព្រះនរោត្តមសីហនុ បង្កើតឲ្យមានកិច្ចព្រមព្រៀងសន្តិភាពទីក្រុងប៉ារីសជាដើម ដែលលោកថា កិច្ចខំប្រឹងប្រែងទាំងនោះ បាននាំមកនូវសន្តិភាពពេញលេញជូនពលរដ្ឋកម្ពុជា។
លោកថា៖ «ខៀវ សំផន ដែលជាប្រមុខរដ្ឋ និងជានាយករដ្ឋមន្ត្រី។ នួន ជា ដែលជាប្រធានរដ្ឋសភា និងគណរដ្ឋមន្ត្រីរបស់ខ្មែរក្រហមទាំងអស់ មកចុះចូលដល់ផ្ទះរបស់ខ្ញុំនៅឯតាខ្មៅ។ នៅលើពិភពលោកមិនទាន់មានប្រទេសណាមួយដែលរលុតភ្លើងសង្គ្រាមដោយគ្មានប្រើគ្រាប់កាំភ្លើងមួយគ្រាប់ ហើយមានប្រធានាធិបតីនិងនាយករដ្ឋមន្ត្រីចុះចូលដល់ផ្ទះដែលជាគូបដិបក្ខក្នុងសង្គ្រាមប្រដាប់អាវុធនោះទេ។ មិនទាន់មានស្ថានភាពបែបនេះទេ»។
ការដែលលោក ហ៊ុន សែន រំឭកពីប្រវត្តិតស៊ូរបស់គណបក្សប្រជាជននេះ ចំពេលដែលប្រទេសលោកសេរី មានសហរដ្ឋអាមរិក និងសភាពអឺរ៉ុបជាដើម កំពុងគំរាមដាក់ទណ្ឌកម្មនានា និងជាពិសេសផ្នែកសេដ្ឋកិច្ច ដោយសារតែរំលាយគណបក្សសង្គ្រោះជាតិ និងចាប់ខ្លួនលោក កឹម សុខា។
ពួកគេព្រមានផងដែរថា នឹងមិនទទួលស្លាល់ រដ្ឋាភិបាលកើតក្រោយបោះឆ្នោតឆ្នាំ២០១៨ បើរដ្ឋាភិបាលកម្ពុជា មិនបើកផ្លូវឲ្យបក្សប្រឆាំងដ៏ធំ ដែលបានរំលាយទៅហើយនោះ មានឱកាសបានចូលរួមប្រកួតប្រជែងការបោះឆ្នោតឡើងវិញ និងដោះលែងលោក កឹម សុខានោះ។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍនិងសន្តិភាព លោក យង់ គិមអេង លើកឡើងថា ស្នាដៃពីអតីតកាលជារឿងល្អមួយ។
ប៉ុន្តែ លោកថា បើបច្ចុប្បន្នអ្នកនយោបាយនោះ មិនអាចធ្វើឲ្យមានការបង្រួបបង្រួមជាតិទេ លោកថា អំពើល្អកន្លងទៅនឹងអាចបាត់ទៅវិញ។
លោកថា៖ «ប៉ុន្តែបើយើងមិនអាចធ្វើឲ្យមានការរួបរួមជាតិបានទេ បានន័យថាមិនអាចធ្វើឲ្យយើងរស់នៅបានសុខសាន ហើយមិនអាចធ្វើ ឲ្យគុណសម្បត្តិនឹងវាឆ្លុះបញ្ចាំងពីតថភាព ក៏ដូចជាឆ្លុះបញ្ចាំងពីចក្ខុវិស័យវែងឆ្ងាយទៅមុខទៀតសម្រាប់ជាតិ។អញ្ចឹងខ្ញុំគិតថាពេលនេះយើងឆ្លុះបញ្ចាំងពីអតីតកាល។ ប៉ុន្តែយើងអាចស្វែងយល់ពីអនាគតកាល ហើយអាចធ្វើម៉េចឲ្យសាមគ្គីនិងការរួបរួមជាតិហ្នឹងវាស្ថិតនៅយូអង្វែងជាអមតៈ អាហ្នឹងបានប្រសើថ្លៃថ្លា»។
យ៉ាងណាក៏ដោយ អ្នកតាមធ្លាប់ព្រមានថា ស្ថានការនយោបាយនៅពេលនេះ ឈានដល់ភាពផុយស្រួយនៃការបែកបាក់ជាតិ បើរដ្ឋាភិបាលមិនទទួលយកអនុសាសន៍ របស់សហគមន៍អន្តរជាតិ នៃប្រទេសលោកសេរី ដែលកំពុងដាក់សម្ពាធឲ្យរដ្ឋាភិបាលបើកលំហរ ប្រជាធិបតេយ្យឡើងវិញនោះ៕
