ក្រសួងយុត្តិធម៌ បានបង្កើតក្រុមការងារពិសេសមួយទៀត បន្ថែមទៅលើក្រុមការងាររបស់រដ្ឋាភិបាល ដើម្បីសរសេររបាយការណ៍អំពីស្ថានភាពសិទ្ធិមនុស្សនៅកម្ពុជា ដាក់ជូនទៅអង្គការសហប្រជាជាតិ។
លោកនាយករដ្ឋមន្ត្រី ហ៊ុន សែន កាលពីថ្ងៃទី១៨ធ្នូកន្លងមកនេះ បានសម្រេចចាត់តាំងមន្ត្រីដល់ទៅ ៨៣រូបមកពីស្ថាប័នចម្រុះ សម្រាប់ទទួលខុសត្រូវសរសេររបាយការណ៍ស្ដីពីស្ថានភាពសិទ្ធិមនុស្សកម្ពុជា ដាក់ទៅអង្គការសហប្រជាជាតិ ហើយក្រុមការងារនោះ ត្រូវបានដាក់ឲ្យស្ថិតក្រោមការដឹកនាំរបស់ប្រធានគណៈកម្មាធិការសិទ្ធិមនុស្សកម្ពុជា លោក កែវ រ៉េមី។
ក្នុងសេចក្ដីសម្រេចកាលពីថ្ងៃម្សិលមិញនេះ រដ្ឋមន្ដ្រីក្រសួងយុត្តិធម៌ លោក អង្គវង្ស វឌ្ឍានា បានចាត់តាំងមន្ត្រីមួយក្រុមទៀតមានសមាសភាព ២០រូប និងដឹកនាំដោយអនុរដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក ជិន ម៉ាលីន សម្រាប់សរសេររបាយការណ៍ដាក់ទៅអង្គការសហប្រជាជាតិ។
បើតាមសេចក្ដីសម្រេចនេះ ក្រុមការងារពិសេសនេះ ត្រូវបានចាត់តាំងឲ្យសរសេរសេចក្ដីព្រាងរបាយការណ៍ស្ដីពីស្ថានភាពសិទ្ធិមនុស្សកម្ពុជាដាក់ទៅអង្គការសហប្រជាជាតិ និងពិនិត្យមើលរបាយការណ៍នានាដែលចេញដោយអង្គការសហប្រជាជាតិ ជុំវិញបញ្ហាសិទ្ធិមនុស្សនៅកម្ពុជា។
ក្រុមការងារបែបនេះ ត្រូវបានចាត់តាំងឡើង បន្ទាប់ពីសហគមន៍អន្តរជាតិ បានថ្កោលទោសរដ្ឋាភិបាលកម្ពុជា ជុំវិញការរំលាយគណបក្សសង្គ្រោះជាតិ ការដកហូតអាសនៈជាប់ឆ្នោតរបស់បក្សនេះ ការហាមឃាត់សិទ្ធិធ្វើនយោបាយរយៈពេល ៥ឆ្នាំលើថ្នាក់ដឹកនាំ ១១៨រូបរបស់បក្សប្រឆាំង និងការចាប់ខ្លួនមេដឹកនាំបក្សប្រឆាំង លោក កឹម សុខា ព្រមទាំងការបិទអង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យមួយចំនួន។
VOD មិនអាចសុំការពន្យល់បន្ថែមពីអ្នកនាំពាក្យក្រសួងយុត្តិធម៌ លោក ជិន ម៉ាលីន និងលោក គឹម សន្ដិភាព បានទេនៅថ្ងៃនេះ ជុំវិញការបង្កើតក្រុមការងារមួយនេះ។
ទោះជាយ៉ាងណា នាយិកាអង្គការសីលការ លោកស្រី ធីតា ឃឹះ យល់ថា រដ្ឋាភិបាលគួរអនុញ្ញាតឲ្យអង្គការសង្គមស៊ីវិល និងភាគីពាក់ព័ន្ធ ចូលរួមផ្ដល់របាយការណ៍ និងយោបល់របស់ពួកគេផងដែរ ដើម្បីបង្ហាញពីភាពត្រឹមត្រូវនៃស្ថានភាពសិទ្ធិមនុស្សនៅកម្ពុជា។
លោកស្រីបន្ថែមថា ក្រុមអង្គការសង្គមស៊ីវិលភាគច្រើន មានក្ដីព្រួយបារម្ភ ខណៈស្ថានការណ៍នយោបាយបច្ចុប្បន្ន ត្រូវបានគេចាត់ទុកថា មានភាពតានតឹង។
លោកស្រីថា៖ «ធម្មតា បើសិនណាគេចង់ឆែកព័ត៌មាន គេអាចឆ្លងការពិភាក្សាមកខាងសង្គមស៊ីវិលដែរ ដើម្បីឲ្យសង្គមស៊ីវិលមានយោបល់ក្នុងការធ្វើរបាយការណ៍ ក៏ដូចជាលទ្ធផល។ សង្គមស៊ីវិលភាគច្រើន មួយចំនួនធំ មិនសូវហ៊ាននិយាយ ហើយបានចេញទៅក្រៅខ្លះអីអញ្ចឹង។ ខ្ញុំមិនដឹងថា ការប្រមូលផ្ដុំគ្នា នឹងធ្វើទៅដោយរបៀបណាទេ តែប្រហែលជាមានមនុស្សនៅប្រមូលគ្នាធ្វើតទៅទៀត»។
អ្នកវិភាគនយោបាយលោកបណ្ឌិត មាស នី យល់ថា បញ្ហាសិទ្ធិមនុស្សនៅកម្ពុជា បានឈានដល់កម្រិតមួយ ដែលធ្វើឲ្យសហគមន៍អន្ដរជាតិ ជាពិសេស អង្គការសហប្រជាជាតិ ចាប់ផ្ដើមបង្ហាញក្ដីកង្វល់ខ្លាំង។
លោក មាស នី លើកឡើងថា បើរដ្ឋាភិបាលកម្ពុជាបង្ហាញរបាយការណ៍មិនឆ្លុះបញ្ចាំងការពិត ឬមិនបន្ទន់ជំហររបស់ខ្លួនទេនោះ លោកថា វារឹតតែធ្វើឲ្យអតីតគណបក្សប្រឆាំងកាន់តែមានឥទ្ធិពលលើឆាកអន្ដរជាតិ ដែលអាចនាំឲ្យមានការព្យួរអាសនៈរបស់កម្ពុជានៅអង្គការសហប្រជាជាតិ ក៏អាចថាបាន។
លោកថា៖ «ខ្ញុំមិនទាន់មានជំនឿថា រដ្ឋាភិបាលនឹងប្ដូរជំហរទេ។ ជួនកាលជំហរចាស់នៅតែមានដដែល គ្រាន់តែរាយការណ៍បន្លំភ្នែកគេ ចេះតែការពារខ្លួន រាយការណ៍ដើម្បីការពារ មិនមែនដើម្បីការពិត ហើយបើសិនជាការរំលោភសិទ្ធិមនុស្ស មិនមានការថមថយ ហើយមានរឿងថ្មីៗកើតឡើងច្រើនទៀត ជួនកាលវានឹងអាចជំរុញឲ្យគេស្គាល់កម្ពុជា កាន់តែច្រើនឡើង តែមិនមែនស្គាល់ដោយអំពើល្អទេ។ ក្នុងហ្នឹង វានឹងអាចជំរុញឲ្យការប្ដឹងរបស់គណបក្សប្រឆាំងទៅលើការព្យួរកៅអីនៅអង្គការសហប្រជាជាតិ វាកាន់តែធ្វើឲ្យភាសារបស់គេកាន់តែមានទឹកមាត់ប្រៃក្នុងការទាមទារ ឬតស៊ូមតិទៅលើការព្យួរកៅអីនេះ»។
ក្រោយរំលាយអតីតគណបក្សប្រឆាំង ដែលមានអ្នកគាំទ្រជិតពាក់កណ្ដាលប្រទេស កាលពីខែវិច្ឆិកានោះ សហគមន៍អន្ដរជាតិ នាំមុខដោយសហភាពអឺរ៉ុប និងសហរដ្ឋអាមេរិក បានព្រមានដាក់ទណ្ឌកម្មជាបន្ដបន្ទាប់ ទាំងផ្នែកការទូត និងសេដ្ឋកិច្ច ដោយថា កម្ពុជា កំពុងដើរចេញពីគន្លងប្រជាធិបតេយ្យ និងផ្ទុយពីស្មារតីនៃកិច្ចព្រមព្រៀងក្រុងប៉ារីស។
ចំណែក អតីតគណបក្សសង្គ្រោះជាតិ កាលពីថ្ងៃទី១៩ខែធ្នូ ក៏បានស្នើទៅអង្គការសហប្រជាជាតិ ឲ្យព្យួរអាសនៈរបស់កម្ពុជាជាបណ្ដោះអាសន្ន និងស្នើបញ្ជូនអ្នកសង្កេតពិសេស UN ឲ្យចុះមកតាមដាន និងត្រួតពិនិត្យបញ្ហាសិទ្ធិមនុស្សនៅកម្ពុជា៕
