ហាងលក់អាហារ ភេសជ្ជៈ និងរបស់របរប្រើប្រាស់នៅក្នុងបរិវេណស្ថានីយ៍ប្រេងសាំងកាល់តិច (Caltex Station) ជាប់ភ្លើងស្តុបបូកគោ កែងផ្លូវព្រះមុនីវង្ស និងផ្លូវម៉ៅសេទុង ដែលជាកន្លែងឃាតកម្មលើ លោក កែម ឡី បានផ្លាស់ប្តូរស្លាកសញ្ញាថ្មីបន្ទាប់ពីបិទមួយរយៈ។
កាលពីដើមសប្តាហ៍នេះ ស្តារម៉ាតកាល់តិចស្តុបបូកគោបានដំណើរការឡើងវិញ ដោយឃើញមានរចនាស្លាកសញ្ញាថ្មីជារូបផ្កាយនៅចន្លោះអក្សរអង់គ្លេស Star និង Mart។ ចំណែកនៅខាងក្នុងហាង មានការកែប្រែទីតាំងទូតាំងទំនិញ និងតុឆុងកាហ្វេផង។
អតីតកូនសិស្ស និងជាអ្នកបានរួមការងារស្រាវជ្រាវជាមួយ លោក កែម ឡី តាំងពីឆ្នាំ២០១៤ កញ្ញា លីវ វ៉ារី យល់ថា ករណីឃាតកម្មលោក កែម ឡី មិនទាន់មានយុត្តិធម៌នៅឡើយ ហើយកញ្ញាមិនចង់ឲ្យមានការផ្លាស់ប្តូរ ឬ កែលម្អទីតាំងនេះទេ ព្រោះបារម្ភបាត់ភស្តុតាង។
កញ្ញាថ្លែងថា «នៅពេលដែលយើងដូរទីតាំង ឬក៏យើងរុះរើ វាស្មើនឹងការមិនទទួលខុសត្រូវចំពោះឃាតកម្មមួយហ្នឹង អញ្ចឹងធ្វើឲ្យអ្នកដែលស្លាប់ទៅ និងប្រជាពលរដ្ឋជាច្រើនដែលគាត់គិតថាអយុត្តិធម៌ ដោយសារមិនទាន់បានវែកញែក ឬមិនទាន់មានការស៊ើបអង្កេតច្បាស់់លាស់ផង»។
VOD នៅថ្ងៃនេះ មិនទាន់ទទួលបានការឆ្លើយបំភ្លឺពីក្រុមហ៊ុន Chevron (Cambodia) Limited នៅឡើយទេ បើទោះជាអ្នកយកព័ត៌មានបានចុះទៅដល់ទីកន្លែងស្តុបបូកគោ ហើយបានបន្តទៅទៀតទៅការិយាល័យរបស់ក្រុមហ៊ុននេះនៅជាន់ទី៤នៅអគារភ្នំពេញសិនធឺ និងបានផ្ញើរសំណួរតាមអ៊ឺម៉ែល។
ទោះយ៉ាងណាបុគ្គលិកក្រុមហ៊ុននេះថ្លែងក្នុងលក្ខខណ្ឌមិនបញ្ចេញឈ្មោះថា ក្រុមហ៊ុនកំពុងតែកែប្រែទម្រង់និងសោភ័ណភាពនៃស្ថានីយ៍លក់ប្រេងរបស់ខ្លួននៅតាមសាខាទូទាំងពិភពលោក។
លោកបណ្ឌិត កែម ឡី អ្នកវិភាគសង្គមល្បីឈ្មោះមួយរូបនៅក្នុងប្រទេសកម្ពុជា ត្រូវបានខ្មាន់កាំភ្លើងបាញ់សម្លាប់នៅក្នុងម៉ាតលក់ទំនិញមួយក្បែរស្តុបបូកគោ កណ្តាលរាជធានីភ្នំពេញ កាលពីថ្ងៃទី១០ កក្កដា ឆ្នាំ២០១៦។ ឃាតកដែលហៅខ្លួនឯងថាឈ្មោះ ជួប សម្លាប់ ត្រូវចាប់បានភ្លាមៗបន្ទាប់ពីឃាតកម្មនេះ។
នៅខែមីនា ឆ្នាំ២០១៧ សាលាដំបូងរាជធានីភ្នំពេញសម្រេចផ្តន្ទាទោសឲ្យបុរស អឿត អាង ហៅ ជួប សម្លាប់ ជាប់ពន្ធនាគារអស់មួយជីវិត។ ប៉ុន្តែភរិយាលោក កែម ឡី ដែលបច្ចុប្បន្ននាំកូន៥នាក់ចាកចេញពីប្រទេស និង អ្នកឃ្លាំមើលមួយចំនួនថ្លែងថា ឃាតកពិត ឬអ្នករៀបចំឃាតកម្មនេះឡើងមិនត្រូវបានកាត់ទោសនៅឡើយ។
កន្លងមកគ្រួសារលោក កែម ឡី ធ្លាប់បានទាមទារឲ្យក្រុមហ៊ុននេះ បង្ហាញវិឌីអូទាំងស្រុងដែលថតដោយកាមេរ៉ាសុវត្ថិភាពនៅកន្លែងកើតហេតុ ប៉ុន្តែក្រុមហ៊ុនឆ្លើយតបកាលពីខែមីនាឆ្នាំ២០១៧ថា ក្រុមហ៊ុនមិនមានទេ គឺបានប្រគល់ឲ្យសមត្ថកិច្ចតាំងពីក្រោយកើតហេតុឡើងភ្លាម៕
