អតីតអ្នករិះគន់រដ្ឋាភិបាលឥតសំចៃមាត់ លោក ម៉ម សូណង់ដូ ប្រកាសឈប់ធ្វើនយោបាយ និងលាលែងពីតំណែងប្រធានវិទ្យុសំបុកឃ្មុំ ខណៈតុលាការបង្គាប់ឲ្យចូលបំភ្លឺនៅខែនេះ ក្នុងសំណុំរឿងចោទប្រកាន់ លោក កឹម សុខា។
ចៅក្រមស៊ើបសួរសាលាដំបូងរាជធានីភ្នំពេញ លោក គី ឫទ្ធី កាលពីថ្ងៃទី២២ ខែធ្នូកន្លងមកនេះ បានចេញដីកាបង្គាប់ឲ្យអតីតប្រធានគណបក្សសំបុកឃ្មុំសង្គមប្រជាធិបតេយ្យ លោក ម៉ម សូណង់ដូ ចូលទៅបំភ្លឺនៅតុលាការ នៅថ្ងៃទី១១ ខែមករា ក្នុងនាមជាសាក្សីក្នុងសំណុំរឿងចោទប្រកាន់លោក កឹម សុខា ថា«ក្បតិជាតិ»នោះ។
ប៉ុន្តែ លិខិតចុះថ្ងៃទី១ ខែមករា លោក ម៉ម សូណង់ដូ បញ្ជាក់ថា ការប្រកាសឈប់ធ្វើនយោបាយ និងលាលែងពីប្រធានវិទ្យុសំបុកនេះ លោកថា ដើម្បីទុកឱកាសឲ្យមនុស្សជំនាន់ក្រោយជាអ្នកបន្តវេន។
VOD មិនអាចទាក់ទងលោក ម៉ម សូណង់ដូ ដើម្បីចង់ដឹងថា តើលោកនឹងបង្ហាញខ្លួននៅតុលាការតាមដីកាកោះរបស់សាលាដំបូងរាជធានីភ្នំពេញ ឬក៏យ៉ាងណានោះទេ ដោយទូរស័ព្ទរបស់លោកមិនអាចទាក់ទងបាន។
លោក ម៉ម សូណង់ដូ ត្រូវបានគេស្គាល់លោកតាមរយៈការផ្សាយសំឡេងរបស់វិទ្យុសំបុកឃ្មុំ ការធ្វើបទសម្ភាសន៍ទាក់ទិននឹងព្រឹត្តិការណ៍នយោបាយ បញ្ហាទំនាស់ដីធ្លី និងបញ្ហាព្រំដែនជាដើម ជាពិសេស តាមរយៈកំណាព្យរបស់លោកដែលមានចំណងជើងថា “តើខ្ញុំអាចរស់បានដល់ពេលណា?“។
ប៉ុន្តែ បុរសដែលមានអាយុជាង ៧០ឆ្នាំរិះគន់រដ្ឋាភិបាលឥតសំចៃមាត់រូបនេះ ត្រូវបានតុលាការចាប់ដាក់ពន្ធនាគារចំនួន ៣ដងរួចមកហើយ ក្នុងសំណុំរឿងកុប្បកម្មប្រឆាំងថៃនៅកម្ពុជាអំឡុងឆ្នាំ២០០៣ សំណុំរឿងសន្ធិសញ្ញាព្រំដែនបំពេញបន្ថែមឆ្នាំ២០០៥ និងចុងក្រោយ គឺសំណុំរឿងតំបន់អប្បគមន៍នៅឃុំប្រម៉ាក្នុងខេត្តក្រចេះ៕
