លោកនាយករដ្ឋមន្ត្រី ហ៊ុន សែន ឲ្យមន្ត្រីក្រោមបង្គាប់ហៅប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធលោក វន់ ពៅ មកបង្កើតមូលនីធិជាមួយលោក ដើម្បីគំាពារអ្នកធាក់ស៊ីក្លូ។
លោក ហ៊ុន សែន ក្នុងពិធីជួបកម្មករ ក្នុងរាជធានីភ្នំពេញ នៅថ្ងៃនេះ បានប្រកាសថា អ្នកធាក់ស៊ីក្លូទាំងអស់នឹងត្រូវទទួលបានការព្យាបាលជម្ងឺដោយអត់បង់ថ្លៃ នៅមន្ទីរពេទ្យរដ្ឋទាំងអស់ ចាប់ពីថ្ងៃទី៣ខែមករានេះទៅ។
លោក ហ៊ុន សែន ថ្លែងទៀតថា ដើម្បីជួយអភិរក្សាស៊ីក្លូ និងជួយដល់ជីវភាពអ្នកធាក់ស៊ីក្លូ លោកថានឹងបង្កើតមូលនិធិមួយដើម្បីគាំពារ នឹងបានរំឭកមន្ត្រី ឲ្យហៅលោក វន់ ពៅ មកចូលរួម ។
លោកថា៖ «ទោះបី វន់ ពៅ យ៉ាងម៉េចក៏ដោយ។ ប៉ុន្តែ វន់ ពៅ មានបំណងជួយដល់កម្មករ។អញ្ចឹងអាចអញ្ជើញ វន់ ពៅ មកផ្តល់មតិបន្តិចបន្តួចមក។ យើងមិនមែនខ្វះធាតុចូលទេ ប៉ុន្តែយើងហៅប្រធានសមាគមស៊ីក្លូ យើងអាចហៅ វន់ ពៅ មកចូលរួម ហើយយើងអ្នកសម្រេចតើ!។ លក្ខន្តិកៈនេះត្រូវយកទៅតម្កល់នៅក្រសួងមហាផ្ទៃ។ខ្ញុំនឹងដាក់ទុនដំបូង១០០លានរៀល ហើយក្នុងមួយខែដាក់១០លានទៀត។ ដូច្នេះក្នុង១ឆ្នាំ ខ្ញុំត្រូវចេញ១២០លានរៀល»។
លោក វន់ ពៅ ជាមន្ត្រីឃ្លាំមើលការរំលោភសិទ្ធិមនុស្ស និងជាអ្នកសកម្មក្នុងការចេញតវ៉ាទាមទាររកយុត្តិធម៌ជូន អ្នកមានមុខរបរតូចតាច ដែលពួកគេ រងការរំលោភបំពាន ដូចជាជួយអ្នកលក់ដូរតាមដងផ្លូវ អ្នករត់តាក់ស៊ី រត់ម៉ូតឌុប និងទាមទារឲ្យតម្លើងប្រាក់ឈ្នួលកម្មករជាដើម។
ប៉ុន្តែនៅថ្ងៃទី៣ខែមករា ឆ្នាំ២០១៤ ក្រុមលោក វន់ ពៅ ត្រូវកងកម្លាំងប្រដាប់ដោយអាវុធ ចាប់ខ្លួន និងវាយនឹងដំបណ្តាលឲ្យ លោក វន់ ពៅ បែកក្បាល និងមានឈាមហូរស្ទើរពេញដងខ្លួន។
ចំណែការអំពាវនាវរបស់លោក ហ៊ុន សែន នេះធ្វើឡើងចំខួប៤ឆ្នាំនៃថ្ងៃដែលលោក វន់ ពៅ ថា រងការធ្វើទារុណ្ឌកម្ម មុនគេបញ្ជូលទៅឃុំខ្លួននៅពន្ធនាគារ។
លោក វន់ ពៅ បានស្វាគមន៍ទៅនឹងការផ្តួចដើម របស់រដ្ឋាភិបាល ដោយថា ជារបត់ថ្មីមួយ ដែលរដ្ឋាភិបាលចាប់ដឹងពីទុក្ខលំបាក របស់អ្នកមានមុខរបរតូចតាច ។
លោកថា៖ «លក្ខន្តិកៈរបស់សមាគមមិនអាចឲ្យនរណាធ្វើការងារពីរស្ថាប័នបានទេ អញ្ចឹងចំនុចនេះខ្ញុំពិចារណាពីលក្ខន្តិកៈរបស់ខ្ញុំ និងប្រជុំក្រុមការងារ របស់ខ្ញុំសិន។ ខ្ញុំមិនទាន់សម្រេចថាយ៉ាងណាទេ ក៏ប៉ុន្តែយើងគ្រាន់តែសារទរទៅនឹងការបង្កើតមូលនីធិនេះ»។
ប៉ុន្តែលោក វន់ ពៅ អះអាងថា បើទោះបីជាពេលនេះ លោកត្រូវបាននាយករដ្ឋមន្ត្រី អំពាវនាវឲ្យចូលរួមជាក្រុមការងារក៏ដោយ តែថាលោករបួសផ្លូវចិត្តដែលរងការវាយដំដោយដំបងឫស្សីនៅតែមិនអាចបំភ្លេចបាន។
លោកាថា៖ «រឿងបង្កើតមូលនិធិការពារប្រយោជន៍ដល់អ្នកធាក់ស៊ីក្លូ។ ក៏ប៉ុន្តែសម្រាប់រឿងខ្ញុំជារឿងផ្សេង ដែលយើងឃើញថាស្លាកស្នាមរបួសនៃការឈឺចាប់របស់ខ្ញុំ គឺមិនទាន់អាចរលុបបាននៅឡើយទេ? ហើយជាពិសេសបន្សល់ទុក នូវស្នាកស្លាមនៅលើក្បាលខ្ញុំដែលវាយដោយទាហានឆ័ត្រយោង៩១១ និងជម្ងឺសុខភាពរបស់ខ្ញុំគឺត្រូវព្យាបាលនៅប្រទេសថៃរៀលរាល់២ខែម្តង។ អញ្ចឹងខ្ញុំគិតថារឿងនេះវាដាច់ពីគ្នា»។
អ្នកនាំពាក្យសមាគមអាដហុក លោក សឹង សែនករណា មានប្រសាសន៍ថា ជាការល្អដែលរដ្ឋាភិបាល បានសហការណ៍ជាមួយសង្គមស៊ីវិលដែលសកម្មឃ្លាំមើលសិទ្ធិមនុស្ស និងជួយដល់អ្នកធាក់ស៊ីក្លូជាដើម។ ប៉ុន្តែលោកជំរុញ ឲ្យអ្នកនយោបាយគួរយកចិត្តទុកដាក់ ដោះស្រាយបញ្ហាជូនប្រជាពលរដ្ឋជារៀងរហូត ជាជាងយកយកចិត្តទុកដាក់តែពេលបោះឆ្នោតមកដល់។
លោកថា៖ «ខ្ញុំគ្រាន់តែកត់សម្គាល់ថាមួយរយៈចុងក្រោយនេះថ្នាក់ដឹកនាំរបស់រដ្ឋាភិបាលហាក់ដូចជាយកចិត្តទុកដាក់ជាមួយប្រជាពលរដ្ឋគ្រប់ស្រទាប់វណ្ណៈ ជាពិសេសយើងមើលឃើញទៅវណ្ណៈកម្មករ ហើយឥឡូវនេះ គាត់ងាកមករកអ្នកដែលមានជីវភាពខ្សត់ខ្សោយ អ្នកធាក់ស៊ីក្លូវ ឬអ្នកធ្វើសេដ្ឋកិច្ចក្រៅប្រព័ន្ធហ្នឹង ។ខ្ញុំយល់ថាបើការយកចិត្តទុកដាក់បែបនេះ មានប្រសិទ្ធភាពជាបន្តបន្ទាប់ ហើយគោលនយោបាយច្បាស់លាស់ ដោយភាពស្មោះត្រង់ខ្ញុំជឿថា វាជារឿងប្រសើរ។ យើងបារម្ភថា ខ្លាចមានការបង្ហាញការយកចិត្តទុកដាក់តែជិតការបោះឆ្នោតមកដល់។ ហើយក្រោយការពីបានកាន់អំណាចហើយ មានការគាបសង្កត់វិញ អាហ្នឹងវាផ្ទុយនឹងការធ្វើឡើងដោយស្មោះត្រង់»។
សូមរំឭកថា លោក វន់ ពៅ និងជនសង្ស័យ២២នាក់ ផ្សេងទៀត បានជាប់ពន្ធនាគារ ប្រពាំងផ្លុង ជិតព្រំដែនវៀតណាម ក្នុងខេត្តត្បូងឃ្មុំ ជាង២ខែ ទើបសាលាដំបូងរាជធានីភ្នំពេញសម្រេចឲ្យនៅក្រៅឃុំ បណ្តោះអាសន្ន ក្រោយសម្ពាធតវ៉ា ប្រឆាំងពីសហគមន៍ជាតិ និងអន្តរជាតិ។
ប៉ុន្តែបច្ចុប្បន្ន លោក វន់ ពៅ បានប្តឹង ករណីនេះទៅតុលាការជាន់ខ្ពស់ ឲ្យទម្លាក់បទចោទ និងទាមទារឲ្យស្វែងរកជនដៃដល់មកផ្តន្ទាទោស ដើម្បីស្វែងរកយុត្តិធម៌៕
