អភិបាលកិច្ច

អាជ្ញាធរថា ម្សៅទឹកដោះគោបារាំងមួយប្រភេទមានគ្រោះថ្នាក់ ហាមពលរដ្ឋទិញ

លោក ហួត វុទ្ធី
| ០៤ មករា ២០១៨
ម៉ោង ១៣:៥៦

អគ្គនាយកដ្ឋានកាំកុងត្រូល បានហាមពលរដ្ឋ មិនឲ្យទិញម្សៅទឹកដោះគោសម្រាប់កូនក្មេងមួយប្រភេទដែលនាំចូលពីប្រទេសបារាំង ដោយថា ទឹកដោះគោនោះមានមេរោគធ្វើឲ្យប៉ះពាល់ដល់សុខភាព។

បើតាមសេចក្តីប្រកាសព័ត៌មានកាលពីថ្ងៃម្សិលមិញនេះ អគ្គនាយកដ្ឋានកាំកុងត្រូល បានឲ្យដឹងថា ក្រុមហ៊ុន GROUPE LACTALIS បានប្រកាសប្រមូលត្រឡប់ទៅវិញទាំងអស់នូវម្សៅទឹកដោះសម្រាប់ទារក និងកុមារតូចៗ និងផលិតផលចិញ្ចឹមទារក និងកុមារដែលផលិតឡើងដោយរោងចក្រ Craon។

សេចក្តីជូនដំណឹងបន្តថា ក្រុមហ៊ុននេះ កំពុងប្រមូលត្រឡប់មកវិញនូវផលិតផល ដែលមានបញ្ហាពីទីផ្សារបារាំង និងបណ្តាប្រទេសនានាដែលក្រុមហ៊ុនបានចែកចាយ ព្រោះផលិតផលម្សៅទឹកដោះគោទាំងនោះមានចម្លងបាក់តេរី Salmonella Agona ដែលបង្កគ្រោះថ្នាក់ដល់សុខភាពទារក និងកុមារតូចៗ ដោយបង្កឱ្យមានជំងឺប្រព័ន្ធរំលាយអាហារ និងគ្រុនពោះវៀនជាដើម។

សេចក្តីប្រកាស បានបញ្ជាក់ទៀតថា ការចម្លងបាក់តេរីនេះ មានចំពោះតែលើផលិតផលដែលមានអត្តសញ្ញាណដូចជា ក្រុមផលិតផល ( Groupe) ឈ្មោះផលិតផល ( Norm Commercial ) លេខឡូត៍ (Lot Four) កាលបរិច្ឆេទជាអប្បបរមា ( Date of Minimum Shelf Life: DLC ) ដែលស្ថិតក្នុងបញ្ជីនៃលិខិតប្រកាសព័ត៌មានរបស់ក្រុមហ៊ុន ដូចមានជូនភ្ជាប់មកជាមួយតែប៉ុណ្ណោះ។

សេចក្តីប្រកាសដដែលនេះ បានអំពាវនាវដល់ប្រជាពលរដ្ឋ កុំឲ្យទិញផលិតផលដែលមានអត្តសញ្ញាញដូចបានជម្រាបជូនខាងលើ និងសូមជួយសហការផ្តល់ព័ត៌មានដល់មន្ត្រីមានសមត្ថកិច្ច ក្នុងករណីបានជួបប្រទះឃើញការចរាចរផលិតផលទាំងនេះ តាមទូរស័ព្ទលេខ (០១២) ២៧៨ ៧៨៩ (០៩២) ៩៩៩ ៨៦៧ និង (០១២) ៩៨៥ ៥៧៧។

ករណីបែបនេះ ក្រសួងពាណិជ្ជកម្មក៏ធ្លាប់បានជូនដំណឹងម្តងរួចមកហើយកាលពីចុងឆ្នាំ២០១៧ កន្លងទៅ៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។