យុវជនមួយក្រុមបានអំពាវនាវឲ្យសប្បុរសជនចូលរួមបរិច្ចាគសៀវភៅចាស់ៗ សៀវភៅអានហើយ ឬសៀវភៅថ្មី ដើម្បីយកទៅដាក់ក្នុងបណ្ណាល័យមួយក្នុងខេត្តកំពង់ចាម ដោយពួកគេថាជាការជំរុញការអានដល់សិក្សានុសិស្សកម្ពុជា។
ក្រុមយុវជនអ្នកនិពន្ធវ័យក្មេង បានផ្ដួចផ្ដើមធ្វើកម្មវិធីមួយនាថ្ងៃទី ១៤ ខែ មករាខាងមុខនេះនៅឯសកលវិទ្យាល័យបញ្ញាសាស្ត្រ ដោយពួកគេថា ដើម្បីគៀងគរឲ្យមានការចូលរួមបរិច្ចាគសៀវភៅ យកទៅដាក់នៅក្នុងបណ្ណាល័យជាតិមួយក្នុងខេត្តកំពង់ចាម។
ប្រធានយុវជនអ្នកនិពន្ធវ័យក្មេងលោក លី ដារ៉ា បានឲ្យដឹងថាក្រុមរបស់លោកបានផ្ដួចផ្ដើមគំនិតជំរុញឲ្យមានការចែករំលែកសៀវភៅនេះ គឺលើកទឹកចិត្តឲ្យយុវជន និង សិក្សានុសិស្សបង្កើនការអាន ដើម្បីអភិវឌ្ឍខ្លួនវិស័យការងារ និងអភិវឌ្ឍផ្នត់គំនិតផងដែរ។
ក្រៅពីការប្រមែប្រមូលសៀវភៅ ក្រុមនេះក៏នឹងដាក់លក់សៀវភៅមួយចំនួនដែលជាស្នាដៃនិពន្ធរបស់ពួកគេ ដើម្បីយកប្រាក់ទៅទិញសៀវភៅថ្មីដែលជាតម្រូវការរបស់អ្នកអានសម្រាប់ដាក់ក្នុងបណ្ណាល័យជាតិនោះផងដែរ។
ក្រុមយុវជនអ្នកនិពន្ធវ័យក្មេងនេះបង្កើតឡើងនៅថ្ងៃទី ០១ ខែ មិថុនា ឆ្នាំ ២០១៧ ដោយយុវជនអ្នកស្រលាញ់ការអាន ការសរសេរ និងក្រុមអ្នកតស៊ូមតិមកពីសកលវិទ្យាល័យផ្សេងៗ ក្នុងគោលបំណងបង្កើនវប្បធម៌នៃការអាន ការសរសេរ ចែករំលែកវប្បធម៌នៃការរៀន និង លើកទឹកចិត្តអ្នកមានក្ដីសុបិន្តក្នុងការសរសេរផងដែរ៕
