អាជ្ញាធរឧតុនិយមកម្ពុជា ឲ្យដឹងថា ប្រទេសកម្ពុជានឹងចុះត្រជាក់ចាប់ពីចុងសប្ដាហ៍នេះ រហូតដល់ដើមសប្ដាហ៍ក្រោយ ដោយថា តំបន់មួយចំនួន អាកាសចុះត្រជាក់ដល់ ១៤អង្សា។
ក្នុងសេចក្ដីប្រកាសព័ត៌មានចេញផ្សាយនៅថ្ងៃនេះ ក្រសួងធនធានទឹក និងឧតុនិយម ឲ្យដឹងថា កម្ពុជាកំពុងទទួលរងឥទ្ធិពលខ្យល់មូសុងឦសាន និងជ្រលងសម្ពាធខ្ពស់ខ្សោយពីប្រទេសចិន ដោយឥទ្ធិពលនៃបាតុភូតទាំងពីរនេះ នឹងបង្កឲ្យកម្រិតសីតុណ្ហភាពនៅកម្ពុជាធ្លាក់ចុះជាបន្តបន្ទាប់ចាប់ពីថ្ងៃទី១២ ដល់ថ្ងៃទី១៥ ខែមករា។
ក្រសួងបានបញ្ជាក់បន្ថែមថា នៅចន្លោះពេលនោះ នៅតាមបណ្តាខេត្តមួយចំនួនដូចជា ខេត្តមណ្ឌលគិរី រតនគិរី ស្ទឹងត្រែង ឧត្តរមានជ័យ ព្រះវិហារ និងប៉ៃលិន សីតុណ្ហភាពនឹងធ្លាក់ចុះនៅចន្លោះពី ១៦ ទៅ ១៨អង្សា ខណៈនៅតំបន់ភ្នំដងរែកធ្លាក់ដល់ ១៤អង្សា៕
