មនុស្សជិត ១០០នាក់ ត្រូវបានរាយការណ៍ថា បានស្លាប់ ហើយរាប់សិបនាក់ទៀតរងរបួស បន្ទាប់ពីការបំផ្ទុះគ្រាប់បែកដ៏ធំមួយលាក់នៅក្នុងរថយន្តសង្គ្រោះបន្ទាន់មួយគ្រឿង នៅទីក្រុងកាប៊ុល ប្រទេសអាហ្វហ្កានីស្ថាន នៅថ្ងៃនេះ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
ទីភ្នាក់ងារនេះ បានរាយការណ៍ថា មនុស្សយ៉ាងតិច ៩៥នាក់ ត្រូវបានសម្លាប់ ហើយ ១៩១នាក់ទៀត បានរងរបួស នៅក្នុងការវាយប្រហារមួយនៅវេលាថ្ងៃត្រង់ថ្ងៃនេះ។
បើតាម AFP ក្រុមតាលីបង់ បានប្រកាសទទួលខុសត្រូវចំពោះការវាយប្រហារនេះ ដែលបង្កភាពតក់ស្លុតនៅក្នុងទីក្រុងកាប៊ុល ដែលហែកហួរដោយសង្គ្រាម។
នេះគឺជាការវាយប្រហារលើកទី២ទៅលើទីក្រុងមួយនេះ ដែលបង្កឡើងដោយពួកតាលីបង់នៅក្នុងរយៈពេលតែមួយសប្ដាហ៍ប៉ុណ្ណោះ។
មេដឹកនាំអាមេរិក លោក ដូណាល់ ត្រាំ និងមេដឹកនាំអន្តរជាតិដទៃទៀត បានថ្កោលទោសចំពោះការវាយប្រហារនេះ និងបានអំពាវនាវឲ្យមានចំណាត់ការដាច់ខាតមួយប្រឆាំងនឹងពួកតាលីបង់ជុំវិញការវាយប្រហារនេះ៕