អាជ្ញាធរខេត្តព្រះសីហនុកែតម្រូវឈ្មោះ​តំបន់​ឡើង​វិញ​ក្រោយ​រង​ការ​រិះគន់ពី​មហាជន

អគ្គិសនី​កម្ពុជា​នៅ​ខេត្ត​ព្រះសីហនុ បាន​កែ​តម្រូវ​សេចក្តី​ជូន​ដំណឹង​របស់​ខ្លួន​ ក្រោយ​រងការរិះគន់ពីអ្នកប្រើប្រាស់បណ្តាញសង្គម​ជុំវិញ​ការ​​ប្រើ​ឈ្មោះ​ «សមុទ្រ​ចិន» នៅ​ក្នុង​ដែន​សមុទ្រ​កម្ពុជា ខណៈ​ដែល​ជន​ជាតិ​បាន​ចូល​ទៅ​រស់​នៅ​ក្នុង​ខេត្ត​នេះ​កាន់​តែ​ច្រើន។

ក្នុងសេចក្តីជូនដំណឹងចុះថ្ងៃទី២៦ ខែមករា អគ្គិសនីកម្ពុជាខេត្តព្រះសីហនុ ប្រាប់ទៅប្រជាពលរដ្ឋអំពីការផ្អាកការ​ផ្គត់ផ្គងចរន្តអគ្គិសនីបណ្តោះអាសន្ននៅតំបន់មួយចំនួនក្នុងខេត្តនេះ ដោយក្នុងនោះ ចំណុចមួយនោះ អគ្គិសនីកម្ពុជាបានសរសេរថា ខ្លួននឹងផ្អាកការផ្គត់ផ្គង «ចា​ប់ពីតំបន់រាមចូលទៅសមុទ្រចិន»។

ការ​ប្រើ​ប្រាស់​ពាក្យ «សមុទ្រ​ចិន»​នៅ​ក្នុង​លិខិត​នោះ បាន​ជំរុញ​ឲ្យ​មាន​មតិ​រិះគន់​ព្រោង​ព្រាត​នៅ​លើ​បណ្ដាញ​ទំនាក់​ទំនង​សង្គម ដោយ​ថា វា​បាន​ធ្វើ​ឲ្យ​ប៉ះ​ពាល់​ដល់​អត្ត​សញ្ញាណ​កម្ពុជា។

ប៉ុន្តែ អគ្គិសនី​ខេត្ត​នេះ បាន​ចេញ​សេចក្ដី​ជូន​ដំណឹង​ថ្មី​កាល​ពី​ថ្ងៃ​ម្សិល​មិញ​នេះ ដោយ​បាន​កែ​តម្រូវ​ពាក្យ​នោះ​វិញ បន្ទាប់ពី​រងការរិះគន់។

នាយក​ប្រតិបត្តិ​នៃ​អង្គការ​តម្លាភាព​កម្ពុជា​ លោក ព្រាប កុល បានសរសេរលើហ្វេសប៊ុករបស់លោកថា រឿងបរទេសចង់បានឈ្មោះ ឬ​ចង់ដើរខ្សែលើខ្មែរ វាជារឿងធម្មតា ប៉ុន្តែ មិនគួរណាអាជ្ញាធរខ្មែរហ៊ានប្តូរឈ្នះតំបន់នោះតាមជនបរទេសនោះ។ លោកថា ការធ្វើបែបនេះ នឹងធ្វើប៉ះពាល់អត្តសញ្ញាណខ្មែរ និងសម្បត្តិរួមរបស់ជាតិ។

លោករៀបរាប់​ថា៖«តើនៅខេត្តព្រះសីហនុមានសមុទ្រចិន​ពីពេលណាមក? តើមន្ត្រីពាក់ព័ន្ធ និងរដ្ឋអំណាចខ្មែរកំពុងធ្វើអី? រឿងបរទេសចង់បានឈ្មោះ ឬ​ចង់ដើរខ្សែលើខ្មែរ វាជារឿងធម្មតា ប៉ុន្តែ រឿងរដ្ឋអំណាចខ្មែរយល់ព្រមឱ្យគេធ្វើអីបានតាមចិត្តអញ្ចឹង វាមិនមែនជារឿងធម្មតាទេ។ ក្នុងនាមជាពលរដ្ឋខ្មែរម្ចាស់ស្រុក យើងខ្ញុំត្រូវការចម្លើយនៃសំណួរខាងលើ»។

អ្នកប្រើប្រាស់បណ្តាញសង្គមមួយចំនួនទៀត បានបញ្ចេញមតិយោបល់លើលិខិតនោះ ដោយចោទថា វាជាកំហុសរបស់អាជ្ញាធរ ហើយពួកគេបានស្តីបន្តោស និងស្នើឲ្យអាជ្ញាធរអាជ្ញាធរការកែតម្រូវវិញ។

ប្រធាន​អង្គការ​សម្ព័ន្ធ​គណនេយ្យភាព​សង្គម​កម្ពុជា លោក សន ជ័យ ជាអ្នកចែកចាយលិខិតនេះនៅលើបណ្តាញសង្គមដែរនោះ បានប្រាប់វីអូឌីបន្ថែមពីលើការសរសេរលើបណ្តាញសង្គមថា បញ្ហានេះកើតឡើយដោយភាពកម្សោយ​នៃការធ្វើការងាររបស់មន្រ្តីរដ្ឋបាលខេត្តនេះ។

លោកបន្ថែមថា៖ «មន្រ្តីនៅកម្រិតរដ្ឋបាលថ្នាក់ក្រោមជាតិហ្នឹង ធ្វើការហាក់បីដូចជាខ្វះព័ត៌មានពីគ្នាទៅវិញទៅមក ហើយការសរសេរនេះនោះនឹងធ្វើឡើងដោយខ្វះព័ត៌មាន។ អញ្ចឹងខ្ញុំយល់ថា ព័ត៌មានទាក់ទងនឹងភូមិសាស្រ្តនេះ រដ្ឋបាលខេត្តគួរតែមានការរឹត​បន្តឹង និងត្រូវផ្សព្វផ្សាយឲ្យបានទូលំទូលាយ ចៀសវាងការប្រើទីកន្លែងឲ្យបានការយល់ច្រឡំ ហើយធ្វើការកែឡើងបន្ទាប់ពីមានការប្រតិកម្មយ៉ាងច្រើនហ្នឹង»។

ទោះជាយ៉ាងណា អគ្គិសនីកម្ពុជានៅខេត្តព្រះសីហនុ បានធ្វើការកែតម្រូវវិញ ដោយបាន​ប្តូរ​​ពាក្យ​«សមុទ្រចិន»ជំនួស​ដោយ​ពាក្យ​ «តំបន់ឆ្នេរកោះសំពោច» ឬ តំបន់វិស្សមកាល​ទេសចរណ៍អន្តរជាតិឆ្នេរមាស ឆ្នេរប្រាក់។

នេះ​មិន​មែន​ជា​លើក​ទី​មួយ​នោះ​ឡើយ​ដែល​មហា​ជន​បាន​ប្រតិកម្ម​ទៅ​នឹង​ការ​ប្ដូរ​ឈ្មោះ​ទីតាំង​សំខាន់ៗ​នៅ​កម្ពុជា។ កាលពីឆ្នាំ២០១៧ ក្រុមហ៊ុនរបស់លោកឧកញ៉ា សុខ គង់ បានផ្លាស់ប្តូរឈ្មោះរមណីយដ្ឋាន​ឋាន​សួគ៌​បូកគោទៅជា«សុខា ឋានសួគ៌» ប៉ុន្តែ ត្រូវបាន​លោកនាយករដ្ឋមន្រ្តី ហ៊ុន សែន បាន​បញ្ជា​ភ្លាមៗ​ទៅ​អតីតអភិបាល​ខេត្ត​កំពត ​លោក ចាន់ ចេស្ដា ឲ្យ​រុះរើ​ស្លាក​ឈ្មោះ​ថ្មី​នោះវិញ បន្ទាប់​ពី​ផ្ទុះ​ការ​រិះគន់​ពី​មហាជន៕

ចែករំលែកព័ត៌មាន
រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

ចុះឈ្មោះទទួលព្រឹត្តិបត្រព័ត៌មានវីអូឌី
តាមដានព័ត៌មាន វីអូឌី

VODEnglish.news

VODEnglish.news

Everybody Well-Informed, Everybody Empowered