ពលរដ្ឋអះអាងថា អ្នកយាមក្រុមហ៊ុនស្ករអំពៅនៅកោះកុងបាញ់ក្របីបណ្ដាលឲ្យងាប់អស់ ១២ ក្បាល ហើយទាមទារឲ្យអាជ្ញាធរជួយអន្តរាគមន៍រកដំណោះស្រាយផ្ដល់សំណង។
ពលរដ្ឋរស់នៅភូមិតាធង ឃុំដងពែង ស្រុកស្រែអំបិល ខេត្តកោះកុងអ្នកស្រី ងែ ឡាង បានលើកឡើងថាកាលពីព្រឹកថ្ងៃទី ០២ខែកុម្ភៈម្សិលមិញក្រុមហ៊ុនស្ករអំពៅបានបាញ់បណ្ដាលឲ្យងាប់ក្របីរបស់ខ្លួនអស់ ១២ ក្បាល ខណៈដែលក្របីទាំងនោះត្រូវបានព្រលែងឲ្យស៊ីស្មៅនៅក្នុងត្រពាំងក្បែរដីដែលមានទំនាស់ជាមួយក្រុមហ៊ុនស្ករ អំពៅ។
អ្នកស្រីបានអះអាងថាក្របីរបស់អ្នកស្រីមិនបានចូលទៅស៊ីអំពៅរបស់ក្រុមហ៊ុននោះទេ ហើយថាការបាញ់ប្រហារ នេះគឺជាការគំរាមកំហែងដល់ពលរដ្ឋ។
អ្នកស្រីជំរុញឲ្យអាជ្ញាធរជួយវែកមុខរកជនដៃដល់ ដើម្បីដោះស្រាយសំណងជូនដល់ក្រុមគ្រួសារអ្នកស្រីវិញ។
ករណីបាញ់ក្របីស្លាប់នោះ លោកស្រី មិថុនា ភូថង អភិបាលខេត្តកោះកុង បានផ្សព្វផ្សាយនៅលើទំព័រហ្វេសប៊ុកថា នឹងចាត់ឲ្យអាជ្ញាធរធរមានសមត្ថកិមូលដ្ឋានចុះស្វែងរកមូលហេតុពិត និងពិនិត្យករណីនេះជាបន្ទាន់៕
