កម្មករសំណង់ជនជាតិចិនដែលធ្វើការនៅក្នុងខេត្តព្រះសីហនុ ប្រមូលផ្តុំគ្នាតវ៉ានៅមុខស្ថានទូតក្នុងរាជធានីភ្នំពេញនៅថ្ងៃសុក្រនេះដោយអះអាងថា ថៅកែរត់ចោលមិនបើកប្រាក់ខែឲ្យពួកគេជាង១ខែមកហើយ។
កម្មករជាង៤០នាក់ដែលប្រមូលផ្តុំលើកបដានោះ មិនចេះនិយាយភាសាខ្មែរទេ ប៉ុន្តែមន្ត្រីទូតថ្លែងប្រាប់អ្នកសារព័ត៌មានថា កម្មករទាំងនេះ ធ្វើការនៅក្រុមហ៊ុនសំណង់ក្នុងខេត្តព្រះសីហនុ ហើយថៅកែមិនទាន់បើកលុយឲ្យ ខណៈពួកគេត្រូវការលុយចូលឆ្នាំចិននៅពេលខាងមុខនេះ។
ក្រោយការប្រមូលផ្តុំប្រមាណ១ម៉ោង មន្ត្រីទូត ឲ្យកម្មករទាំងនោះធ្វើដំណើរទៅ ការិយាល័យប្រឹក្សាផ្នែកសេដ្ឋកិច្ច និងពាណិជ្ជកម្ម នៃស្ថានទូតសាធារណរដ្ឋប្រជានិចចិន ប្រចាំកម្ពុជា នៅផ្លូវព្រះមុនីវង្សក្បែរស្តុបបូកគោ ដើម្បីដោះស្រាយ។ ប៉ុន្តែនៅពេលពួកគេទៅដល់ការិយាល័យនោះ មន្ត្រីការិយាល័យអនុញាតឲ្យពួកគេចូលទៅក្នុង ដើម្បីសួរនាំ រហូតដល់ម៉ោង១២ថ្ងៃត្រង់នេះ មិនទាន់មានដំណោះស្រាយនៅឡើយ។
VOD មិនអាចសុំការបំភ្លឺពីអ្នកនាំពាក្យក្រសួងការងារលោក ហេង សួរ បានទេនៅថ្ងៃនេះ។
ប្រធានមន្ទីរការងារខេត្តព្រះសីហនុ លោក យ៉ូវ ខេមរ៉ា ថ្លែងថា លោកមិនបានដឹងរឿងនេះទេ ដោយសារកម្មករទាំងនោះមិនបានប្តឹងទៅមន្ទីរការងារ។
អនុប្រធានសម្ព័នសហជីពប្រជាធិបតេយ្យកម្មករកាត់ដេរកម្ពុជា ស៊ីខាវឌូ លោក គង់ អាទិត្យ យល់ថា បើកម្មករជនជាតិចិនទាំងនោះ មានកិច្ចសន្យាការងារជាមួយក្រុមហ៊ុនស្របតាមច្បាប់កម្ពុជា លោកថា ក្រសួងការងារត្រូវកោះហៅភាគីនិយោជិត និងនិយោជក ដោះស្រាយគ្នា ដោយមិនប្រកាន់ជាតិសាសន៍។
លោកយល់ថា «ក្រសួងគាត់អាចមើលថា អ្នកណាដែលជាអ្នកកុងត្រាជាមួយ ក្រុមហ៊ុនអី ហើយអាចស្រាវជ្រាវមើលនៅចិនវិញបានថា វាទាក់ទងជាមួយក្រុមហ៊ុនណា ហើយអាចទាក់ទងកុងស៊ុលចិន ទាក់ទងប្រវត្តិក្រុមហ៊ុនដែល[ថៅកែ]រត់ចោល ដើម្បីឲ្យរកទ្រព្យសម្បត្តិសងលុយកម្មករ វាអត់មានស្អីដែលរើសអើងទេ អ្នកណាក៏ដោយ ឲ្យតែគាត់មកធ្វើការនៅ[កម្ពុជា] កម្មករអន្តោប្រវេសន៍អីក៏ដោយ ថៅកែត្រូវមានកាតព្វសងគាត់[កម្មករ]»។
តាមរបាយការណ៍ក្រសួងមហាផ្ទៃបានឲ្យដឹងថា ជនជាតិបរទេសនៅក្រុងព្រះសីហនុ មានជាង៣ម៉ឺននាក់ មកពី៤០ប្រទេសផ្សេងគ្នា។
បើតាមរបាយការណ៍ ចុះកាលពីថ្ងៃទី២៤ខែមករាឆ្នាំ២០១៨ ដែលផ្ញើទៅរដ្ឋមន្ដ្រីក្រសួងមហាផ្ទៃ គឺ អភិបាលខេត្តព្រះសីហនុ លោក យន្ដ មីន ឲ្យដឹងថា ក្នុងឆ្នាំ២០១៧ ជនបរទេសចូលមកស្នាក់នៅក្នុងខេត្តព្រះសីហនុ មានចំនួន ៦ ៣៨៥នាក់ ក្នុងនោះ ជនជាតិចិនមានច្រើនជាងគេ គឺ ៤ ៤៩៨នាក់ ឥណ្ឌូណេស៊ី មាន៩០៩នាក់ ហ្វីលីពីន ១២៧នាក់ ម៉ាឡេស៊ី ១២២នាក់ និងជនជាតិផ្សេងៗទៀត។
កំណើនជនជាតិចិន បានកើនឡើងនៅក្នុងខេត្តព្រះសីហនុនេះ បន្ទាប់ពីរដ្ឋាភិបាលកម្ពុជា ការចុះកិច្ចព្រមព្រៀងជាមួយរដ្ឋាភិបាលចិន កាលពីឆ្នាំ២០១៦ ដោយថា នឹងធ្វើការអភិវឌ្ឍខេត្តព្រះសីហនុនេះ ឲ្យក្លាយជាតំបន់ទេសចរអន្ដរជាតិ និងក្លាយជាតំបន់សេដ្ឋកិច្ចពិសេស៕
