មន្ត្រីសាលាដំបូងខេត្តមណ្ឌលគិរី អះអាងថា តុលាការកំពុងស្រាវជ្រាវ ដើម្បីរកអ្នកពាក់ព័ន្ធបន្ថែមទៀត ករណី បាញ់សម្លាប់មន្ត្រីអភិរក្សព្រៃឈើ៣រូប កាលពីថ្ងៃទី៣០ ខែមករាកន្លងមក បន្ទាប់ពីសមត្ថកិច្ចចាប់បានជនសង្ស័យចំនួន ៦ នាក់រួចមក។
អ្នកនាំពាក្យសាលាដំបូងខេត្តមណ្ឌលគិរីលោក ម៉ម វ៉ាន់ដា ប្រាប់វីអូឌីនៅថ្ងៃនេះថា ជនសង្ស័យទាំង៦ នាក់ ត្រូវបានសមត្ថកិច្ចបញ្ជូនទៅឃុំខ្លួននៅពន្ធនាគារខេត្ត ដើម្បីឲ្យចៅក្រមសួរចម្លើយពួកគេបន្ថែម ក្នុងការស្រាវជ្រាវរកអ្នកជាប់ពាក់ព័ន្ធផ្សេងទៀត។
លោកថា៖ «ឥឡូវនៅចៅក្រមស៊ើបអង្កេត ហើយគាត់កំពុងស៊ើបរកមើលក្រែមានអ្នកនៅពីក្រោយ គាត់នឹងចុះទៅកន្លែងកើតហេតុ»។
កាលពីថ្ងៃទី៣០ ខែមករាកន្លងមក មន្ត្រីអាវុធហត្ថលោក សេក វឌ្ឍនា មន្ត្រីឧទ្យានុរក្សនៃមន្ទីរបរិស្ថាន លោក តឺន សុខណៃ និងបុគ្គលិកនៃសមាគមអភិរក្សធនធានធម្មជាតិ WCS លោក ថុល ខ្នា ត្រូវបានបាញ់សម្លាប់នៅពេលចុះល្បាតក្នុងតំបន់ដែនជម្រកសត្វព្រៃកែវសីមាស្ថិតក្នុងស្រុកអូររាំងខេត្តមណ្ឌលគិរី។
ក្រោយពីមានហេតុការណ៍បាញ់សម្លាប់នេះ មានជនសង្ស័យទាំង ៦ នាក់ ដែលត្រូវបានសមត្ថកិច្ចឃាត់ខ្លួន ក្នុងនោះ ឈ្មោះ ផល ពេញ ជានាយនគរបាលប៉ុស្ដិ៍អូររលែនៃវរការពារព្រំដែនលេខ ៦២១ ឈ្មោះ កើត វេតា ជាទាហានការពារព្រំដែន ឈ្មោះ ឡាយ សាវី ជាទាហានការពារព្រំដែន ឈ្មោះ ទន់ ធារ៉ា ជាមន្ដ្រីនគរបាលប៉ុស្ដិ៍អូរលែ ឈ្មោះ ឈាង វ៉ាន់និត ប្អូនថ្លៃ ផល ពេញ និងឈ្មោះ កើត វេហា៕
