សមាគមរោងចក្រកាត់ដេរកម្ពុជា បានថ្លែងអំណគុណក្រសួងសាធារណការ និងដឹកជញ្ជូន ដោយថា បានសម្របសម្រួលទាន់ពេលបញ្ចៀសបាននូវការកកស្ទះទំនិញនាំចេញ និងនាំចូល បន្ទាប់ពីសមត្ថកិច្ចចុះបង្ក្រាបរថយន្តកុងតឺន័រខុសបច្ចេកទេស ទៅតាមបញ្ជានាយករដ្ឋមន្ត្រី។
លោកនាយករដ្ឋមន្ត្រី ហ៊ុន សែន កាលពីថ្ងៃទី៩កុម្ភៈ បានប្រកាសប្រើកណ្តាប់ដៃដែក ទប់ស្កាត់រថយន្តដឹកលើសចំណុះ និងរថយន្តកែច្នៃខុសបច្ចេកទេស ឈប់ឲ្យបើកបរលើដងផ្លូវសាធារណៈ ដោយថា ដើម្បីទប់ស្កាត់គ្រោះថ្នាក់ចរាចរណ៍ និងការបំផ្លាញផ្លូវ។
GMAC តាមលិខិតចុះថ្ងៃទី១៣ ខែកុម្ភៈ បានស្នើទៅរដ្ឋាភិបាល ឲ្យពិចារណាលើវិធានការនេះ ដោយថា រថយន្តកុងតឺន័រដឹកទំនិញ ដែលអាជ្ញាធរចាប់ឃាត់ទុកប៉ុន្មានថ្ងៃមកនេះ អាចប៉ះពាល់ដល់ទៅ ៥០ភាគរយនៃសកម្មភាពនាំទំនិញចេញ និងការនាំចូលវត្ថុធាតុដើមរបស់ក្រុមហ៊ុនឯកជនក្នុងវិស័យឧស្សាហកម្មកាត់ដេរ ប្រសិនបើរដ្ឋាភិបាលគ្មានជម្រើសបណ្ដោះអាសន្នណាមួយជួយសម្របសម្រួលនោះទេ។
ប៉ុន្តែ នៅថ្ងៃម្សិលមិញនេះ លើទំព័រហ្វេសប៊ុករបស់ខ្លួន សមាគមរោងចក្រកាត់ដេរកម្ពុជា បានថ្លែងអំណរគុណដល់ក្រសួងសាធារណៈការ និងដឹកជញ្ជូន។
GMAC ថា៖ «[ក្រសួង]បានចាត់វិធានការយ៉ាងឆាប់រហ័យ ក្នុងការធ្វើការងារជាលក្ខណៈបច្ចេកទេស យ៉ាងល្អិតល្អន់ជាមួយវិស័យឯកជន ដើម្បីរកដំណោះស្រាយសមស្របមួយ ចំពោះបញ្ហារថយន្តដឹកកុងតឺន័រ ដែលមានប្រវែង[លើសច្បាប់កំណត់] ជៀសវាងការកកស្ទះដល់លំហូរនៃទំនិញនាំចេញ-នាំចូលទាំងឡាយ ជាពិសេសវិស័យកាត់ដេរ ផលិតស្បែកជើង និងកាបូប ដែលជាផលិតផ លនាំចេ ញចំបងរបស់កម្ពុជា»។
ទោះយ៉ាងណា GMAC មិនបានបញ្ជាក់ថា តើការសម្របសម្រួលរបស់ក្រសួងនោះ អនុញ្ញាតិឲ្យរថយន្តដែលអាជ្ញាធរបានឃាត់ទុក បើកបរលើផ្លូវសាធរណៈឡើងវិញរយៈពេលប៉ុន្មាននោះទេ។
ប៉ុន្តែ អគ្គនាយកនៃអគ្គនាយកដ្ឋានរដ្ឋបាលក្រសួងសាធារណការ លោក វ៉ាស៊ឹម សូរិយា អះអាងថា ក្រសួងបានអនុញ្ញាតិត្រឹមឲ្យភាគីក្រុមហ៊ុនយកកុងតឺន័រ ដែលមានប្រវែងមិនលើសពីច្បាប់កំណត់មកសាងទំនិញ ដឹកទៅតាមគោលដៅប៉ុណ្ណោះ។ លោកថា ចំណែកកុងតឺន័រ ដែលមានប្រវែងលើសច្បាប់កំណត់ រង់ចាំការសម្រេចទីថ្នាក់ដឹកនាំកំពូល។
លោកថា៖ «មិនទាន់មានដំណោះស្រាយរួមទេ ប៉ុន្តែ ខាងគាត់ [ភាគីរោងចក្រ] គាត់មានឡានច្រើន គាត់ភ័យ តែកន្លងមកយើងបានអនុគ្រោះទៅច្រើនហើយ ប៉ុន្តែ លើកនេះ គឺយើងអនុវត្តច្បាប់ផង យើងអនុវត្តបទបញ្ជាទៀត អញ្ចឹងវាអាចប៉ះពាល់»។
អ្នកស្រាវជ្រាវពីការអភិវឌ្ឍសង្គម លោកបណ្ឌិត មាស នី លើកឡើងថា ការទប់ស្កាត់រថយន្តកែច្នៃក្នុងស្រុកខុសបច្ចេកទេស ជារឿងត្រឹមត្រូវ ប៉ុន្តែ ថា បើអាជ្ញាធរឈរលើបញ្ជា ហើយទៅចាត់វិធានការលើរថយន្តកុងតឺន័រមានទ្រុងវែង ផលិតបែបបច្ចេកទេស នាំចូលពីក្រៅប្រទេស លោកថា វិធានការនេះនឹងបង្កើតភាពភ័យខ្លាចដល់អ្នកវិនិយោគ។
លោកថា៖ «ការដែលយើងធ្វើស្អីមួយ មិនបានគិតពីខ្នាតអន្តរជាតិ ចុះបើសិនជាកុងតឺន័រហ្នឹងត្រូវដឹកតាមកប៉ាល់មក ហើយត្រូវការរថយន្តវែងបានដឹកមកដល់ បានអាចទទួលយកពីកប៉ាល់មកបាន អញ្ចឹងធ្វើម៉េច យើងកាត់កុងតឺន័រ ជាពីរ ឬធ្វើម៉េច។ អាហ្នឹងសុទ្ធតែរដ្ឋាភិបាលត្រូវគិត។ ពេលខ្លះ យើងធ្វើស្អីលឿនពេក នៅស្រុកយើង តែមិនបានគិតស្អីដែលជាការវិវត្តនៅក្នុងតំបន់ អាហ្នឹងក៏វាជួបឧបស័គ្គដែរ ក្នុងការអនុវត្តច្បាប់»។
ទោះជាយ៉ាងណា របាយការណ៍នៃកិច្ចប្រជុំមួយ បានលើកឡើងថា ប្រធានសភាពាណិជ្ជកម្មកម្ពុជា លោក គិត ម៉េង បានសន្យាថា នឹងយក សំណូមពរទាំងឡាយដែលផ្នែកឯកជន និងសមាគរោងចក្រកាត់ដេរបានលើកឡើង ទៅសុំការសម្រេចពីនាយករដ្ឋមន្ត្រី៕
