លោកនាយករដ្ឋមន្ត្រី ហ៊ុន សែន នៅថ្ងៃព្រហស្បតិ៍នេះ បន្តលើកឡើងជាសំនួរដដែលសារជាថ្មីទៀតថា ហេតុអ្វីបានជាមន្ត្រីមួយចំនួនចាំអនុវត្តន៍តែបទបញ្ជារបស់លោក មិនព្រមអនុវត្តន៍ច្បាប់ដែលមានស្រាប់។
នៅក្នុងពិធីបិទសន្និសីទថ្នាក់ជាតិស្តីពីប្រតិភូកម្មអំណាចទៅថ្នាក់ក្រោមជាតិ លោកនាយករដ្ឋមន្ត្រីហ៊ុន សែន បានក្រើនរំឭកដល់មន្ត្រីនៅតាមក្រសួងស្ថាប័ននានា ឲ្យយកចិត្តទុកដាក់ក្នុងការផ្ទេរអំណាចទៅថ្នាក់ក្រោមជាតិដោយអនុវត្តន៍តាមច្បាប់។
លោកនាយករដ្ឋមន្ត្រីលើកឡើងថា ស្ថាប័នមួយចំនួនមិនទាន់អនុវត្តន៍ច្បាប់នៅឡើយទេ។
លោកមានប្រសាសន៍ថា៖ «ការពិតច្បាប់ឲ្យស្ថាប័ននោះអនុវត្តន៍ភារកិច្ចរបស់ខ្លួន ប៉ុន្តែខ្លួនបែរជាមិនបានអនុវត្តន៍ភារកិច្ចនោះទេ លុះត្រាតែមានបទបញ្ជាពីនាយករដ្ឋមន្ត្រីបានធ្វើ។ បើដូច្នេះ មានការចាំបាច់ត្រូវបង្កើតស្ថាប័ន ឬ ក្របខណ្ឌគតិយុត្តិសម្រាប់ស្ថាប័ននិមួយៗធ្វើអ្វីទៅ?»
លោកនាយករដ្ឋមន្ត្រីរំឭកឡើងថា កាលពីសម័យសង្គ្រាមជាមួយខ្មែរក្រហមចាំបាច់ត្រូវផ្តល់អំណាចខ្លាំងដល់ថ្នាក់កណ្តាល ប៉ុន្តែលោកឆ្ងល់ថា បច្ចុប្បន្នមានការផ្លាស់ប្តូរហើយតែមន្ត្រីថ្នាក់ក្រោមមិនព្រមអនុវត្តន៍ច្បាប់នៅតែរង់ចាំបទបញ្ជា។
លោកមានប្រសាសន៍ថា៖ «ឥឡូវស្ថានភាពវាបានផ្លាស់ប្តូរហើយ ប៉ុន្តែការផ្លាស់ប្តូរនេះ ហេតុអ្វីបានជារឿងនេះរុញវាមិនទៅ?»
ក្នុងឱកាសនោះលោកនាយករដ្ឋមន្ត្រីក៏បានរំឭកឲ្យមន្ត្រីត្រូវអនុវត្តន៍ច្បាប់ឲ្យបានត្រឹមត្រូវរាល់កិច្ចការនានា កុំចាំតែអនុវត្តន៍តាមបទបញ្ជា។
នៅខែកុម្ភៈនេះ លោកនាយករដ្ឋមន្ត្រីបានលើកឡើងបន្តបន្ទាប់ ករណីមន្ត្រីមិនព្រមអនុវត្តន៍ច្បាប់ បែរជាចាំអនុវត្តន៍បទបញ្ជាពិសេសលោកលើកឡើងករណីបទល្មើសចរាចរណ៍គឺរថយន្តវែងលើសច្បាប់កំណត់ធ្វើឲ្យខូចផ្លូវនានា មិនមានមន្ត្រីចាត់វិធានការនោះទេ លុះដល់លោកចេញបញ្ជាទើបមានការអនុវត្តន៍។
