តុលាការកំពូលសម្រេចតម្កល់សាលដីការរបស់តុលាការថ្នាក់ក្រោមដែលផ្តន្ទាទោសអតីតសមាជិកព្រឹទ្ធសភា គណបក្ស សម រង្ស៊ី លោកស្រី ថាក់ ឡានី ទុកជាបានការ ជុំវិញការចោទថា លោកនាយករដ្ឋមន្រ្តី ហ៊ុន សែន ជាអ្នកសម្លាប់អ្នកវិភាគលោកបណ្ឌិត កែម ឡី។
កន្លងមកសាលាដំបូងរាជធានីភ្នំពេញ និងសាលាឧទ្ធរណ៍បានសម្រេចដូចគ្នា ដោយផ្តន្ទាទោសលោកស្រី ថាក់ ឡានី ដាក់ពន្ធនាគាររយៈ ១ឆ្នាំ ៦ខែ និងពិន័យជាប្រាក់ ៨លានរៀល ព្រមទាំងសងសំណងជំងឺចិត្តដល់លោកនាយករដ្ឋមន្ត្រី ហ៊ុន សែន ជាដើមបណ្តឹងចំនួន ១០០រៀល ពីបទបរិហាកេរ្តិ៍ជាសាធារណៈ និងញុះញង់ប្រព្រឹត្តអំពើបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។
សាលដីកាស្ថាពររបស់តុលាការកំពូលបានប្រកាសនៅថ្ងៃ២៦កុម្ភៈនេះ បន្ទាប់ពីជំនុំជម្រះលើបណ្តឹងសារទុក្ខរបស់មេធាវី សំ សុគង់ ដែលការពារក្តីឱ្យ លោកស្រី ថាក់ ឡានី។
សមាជិកព្រឹទ្ធសភាបក្សប្រឆាំងរូបនេះ ត្រូវបានលោក ហ៊ុន សែន ប្ដឹងពីបទបរិហារកេរ្តិ៍ជាសាធារណៈ និងបទញុះញង់ឲ្យប្រព្រឹត្តអំពើវឹកវរ បន្ទាប់ពីអ្នកស្រីបានថ្លែងជុំវិញករណីឃាតកម្មលើអ្នកវិភាគ លោក កែម ឡី កាលពីខែកក្កដាឆ្នាំ២០១៦៕
