ក្រុមកម្មករ-កម្មការនី នៅរោងចក្រ ២ ក្នុងចំណោមរោងចក្រ ៤ ដែលថៅកែរត់ចោល បានអះអាងថា ពួកគេនៅមិនទាន់ទទួលបានសំណងនៅឡើយទេរហូតមកដល់ថ្ងៃនេះ បើទោះបីលោកនាយករដ្ឋមន្ត្រី ហ៊ុន សែន បានបញ្ជាទៅមន្ត្រីពាក់ព័ន្ធឲ្យដកថវិការដ្ឋយកទៅដោះស្រាយសំណងជូនកម្មករក៏ដោយ។
លោកនាយករដ្ឋមន្ត្រី ហ៊ុន សែន បញ្ជាផ្ទាល់មាត់កាលពីថ្ងៃទី២១កុម្ភៈ ទៅក្រសួងពាក់ព័ន្ធឲ្យចុះដោះស្រាយបន្ទាន់បញ្ហាកម្មករដែលថៅកែរត់ចោល ដោយថា មិនត្រូវទុកបញ្ហានេះជាជំងឺរាំរ៉ៃនោះទេ។
ប៉ុន្តែ កម្មករផ្នែកដេរនៅរោងចក្រ អ៊ីហ្វា ហ្គាមេន អ្នកស្រី សាំង យូរី ឲ្យដឹងថា រហូតមកដល់ពេលនេះ កម្មករោងចក្រនេះ និងរោងចក្រ ជីង ឡុង មិនទាន់ទទួលបានដំណោះស្រាយនៅឡើយទេ។ កម្មការិនីរូបនេះបន្ថែមថា គ្មានមន្ត្រីក្រសួងណាយកថវិកាទៅដោះស្រាយសំណងដល់ក្រុមកម្មករ-កម្មការិនីដូចបញ្ជាលោកនាយករដ្ឋមន្ត្រីនោះឡើយ។
អ្នកស្រីបន្តថា មន្រ្តីក្រសួងការងារដែលចុះដោះស្រាយនោះ បានត្រឹមសន្យា និងបង្ខំឲ្យកម្មករលក់សម្ភារៈក្រុមហ៊ុនឡៃឡុងដើម្បីទូទាត់សំណង ប៉ុន្តែ ក្រុមកម្មករអត់យល់ស្របនោះឡើយ ដោយរង់ចាំដំណោះស្រាយតាមប្រសាសន៍របស់លោក ហ៊ុន សែន។
អ្នកស្រីបន្ថែមថា៖«ពួកខ្ញុំមានផលលំបាកខ្លាំងណាស់ ទី១ ថ្លៃផ្ទះជួល ទី២ ពួកខ្ញុំត្រូវការដើររកការងារធ្វើទៀត ហើយបើនៅតែអញ្ចឹង ពួកខ្ញុំទន្ទឹងរង់ចាំរហូត ថ្ងៃនេះ ថ្ងៃនោះៗរហូត រឿងហ្នឹងដឹងដល់សម្តេចហើយ នៅតែគ្មានដំណោះស្រាយទៀត»។
កម្មករបម្រើការងារនៅរោងចក្រ យ៉ូដា ហ្គាមេន លោក ធុន ពិសិដ្ឋ ឲ្យដឹងថា ដោយសារតែរង់ចាំដំណោះស្រាយតាមប្រសាសន៍របស់នាយករដ្ឋមន្រ្តីយូរពេក ក្រុមកម្មករនៅរោងចក្រនេះ និង អេស អ អ៊ី ហ្គាមេន សម្រេចគ្នាលក់សម្ភារៈឡៃឡុងដើម្បីទូទាត់សំណង។
លោកបន្តថា សម្ភារៈក្រុមហ៊ុនដែលលក់នោះ គឺទូទាត់សំណងជូនកម្មករមិនគ្រប់ទេ ប៉ុន្តែ ដោយសារគ្មានជម្រើសទើបកម្មករសម្រេចលក់បែបនេះ។
លោកបន្ថែមថា៖«និយាយទៅការដោះស្រាយហ្នឹងដូចជាចប់ដែរហើយ ប៉ុន្តែ ផលសំណងដែលទទួលបានហ្នឹង មកបានតែ ៦០%នៃប្រាក់ខែចុងក្រោយ។ និយាយទៅ ការសម្រេចលក់នេះ ដោយសារតែកម្មករគ្មានជម្រសើ បើសិនជាពួកគាត់នៅបន្តទៀត មិនដឹងថាប្រយោជន៍អី»។
អ្នកនាំពាក្យក្រសួងការងារលោក ហេង សួរ មានប្រសាសន៍ថា ក្រសួងការងារបានដាក់សំណើរសុំថវិកាពីក្រសួងសេដ្ឋកិច្ច និងហិរញ្ញវត្ថុ ដើម្បីដោះស្រាយបញ្ហាកម្មករដែលថៅកែរត់ចោលនេះហើយ ដោយថា សប្តាហ៍ក្រោយក្រសួងនឹងចុះធ្វើការលើរឿងនេះ។
លោកបន្ថែមថា៖«សម្តេចបានផ្តល់ថវិកាបុរេប្បទានចំនួន ៤លាន ៦សែនដុល្លារ សម្រាប់ទៅដោះស្រាយបញ្ហាបៀវត្សរ៍របស់បងប្អូនកម្មករនិយោជិតថៅកែរត់ចោលទាំង ៩ហ្នឹង ហើយឥឡូវនេះ យើងកំពុងតែរៀបចំនីតិវិធីស្នើសុំថវិកាសេដ្ឋកិច្ច និងហិរញ្ញវត្ថុហើយយើងរំពឹងថា នឹងទទួលបាននៅចុងសប្តាហ៍នេះ ហើយនៅដើមសប្តាហ៍ខាងក្រោយនេះ គឺក្រសួងនឹងចាប់ផ្តើមចុះធ្វើការជាមួយនឹងរោងចក្រដែលថៅកែរត់ចោលនេះ ដើម្បីគណនាមើល និងទូទាត់សំណងជូនបងប្អូនកម្មករ»។
កម្មករប្រហែល២ពាន់នាក់នៃរោងចក្រ៤ ស្ថិតក្នុងខណ្ឌពោធិ៍សែនជ័យដែលមានថៅកែជាជនជាតិចិនតែម្នាក់នោះ បានផ្ទុះការតវ៉ាដោយដេកយាមមុខរោងចក្រតាំងពីថ្ងៃទី៨ ខែកុម្ភៈរហូតមកដល់ថ្ងៃនេះ បន្ទាប់ពីថៅកែបិទទ្វារត់ចោលដោយមិនបើកប្រាក់ឈ្នួល និងប្រាក់អត្ថប្រយោជន៍ផ្សេងៗជូនពួកគេ។
ក្រៅពីរោងចក្រទាំង៤នេះ គឺមានរោងចក្រ Benoh Apparel ស្ថិតក្នុងខណ្ឌមានជ័យ ក៏ថៅកែរត់ចោលអត់បើកប្រាក់ឈ្នួល និងប្រាក់អត្ថប្រយោជន៍ផ្សេងៗជូនកម្មករដែរ ខណៈរោងចក្រ ហ្វឹស ហ្គាវ័ន្តនៅសង្កាត់ចាក់អង្រែលើ និងរោងចក្រ ហ្គាវ័ន្ត នៅក្រុងតាខ្មៅ ត្រូវកម្មករដេករោងចក្ររយៈពេលជាង ២ខែហើយរហូតមកថ្ងៃនេះ ដោយសារឃើញថៅកែលួចដឹកឥវ៉ានចេញ៕
