ក្រុមអ្នករៀបចំបាតុកម្មគ្រប់គ្រងអាវុធ ដែលសុទ្ធតែជានិស្សិត និងទាក់ទាញមនុស្សរាប់ម៉ឺននាក់ឲ្យចុះផ្លូវនៅអាមេរិកនោះ បានប្ដេជ្ញានៅថ្ងៃនេះថា នឹងមិនមានមនុស្សស្លាប់ទៀតទេ។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។
AFP ចុះផ្សាយបន្តថា បាតុកម្មទូទាំងប្រទេសកាលពីថ្ងៃម្សិលមិញនេះ គឺជាយុទ្ធការប្រមូលផ្ដុំមនុស្សធំបំផុតមិនធ្លាប់មាននៅក្នុងរយៈពេលជិត ២ទសវត្សរ៍ចុងក្រោយនេះ ជាផ្នែកមួយនៃការជជែកគ្នាអំពីច្បាប់គ្រប់គ្រងអាវុធ បន្ទាប់ពីការបាញ់សម្លាប់យ៉ាងរង្គាលកាលពីខែមុននៅឯសាលារៀនមួយនៅរដ្ឋផ្លរីដា។
រដ្ឋបាលរបស់ប្រធានាធិបតី ដូណាល់ ត្រាំ កំពុងតែបង្កើនជំនួយទៅកាន់រដ្ឋនានា ដែលចង់បំពាក់អាវុធដល់បុគ្គលិកអប់រំនៅតាមសាលារៀន ដោយគាំទ្រតិចតួចដល់ច្បាប់កែលម្អលើការគ្រប់គ្រងអាវុធរបស់ក្រុមឈ្មួញជួញដូរអាវុធ ហើយបានប្រកាសបង្កើតគណៈកម្មការសុវត្ថិភាពសាលារៀន នៅក្នុងចំណោមវិធានការដទៃទៀត។
ជានិស្សិតម្នាក់មកពីសាលា Stoneman Douglas យុវជន Cameron Kasky បានប្រាប់ថា លោកមិនគាំទ្រទាល់តែសោះទៅនឹងវិធានការរបស់រដ្ឋបាលលោក ត្រាំ ដោយថា វិហារ ក្លឹបកម្សាន្ត រោងភាពយន្ត ព្រមទាំងសាលារៀន សុទ្ធតែជាគោលដៅនៃការបាញ់ប្រហាររបស់ខ្មាន់កាំភ្លើង។
យុវនិស្សិតរូបនេះ និងនិស្សិតដទៃទៀត ចង់ឲ្យមានការហាមឃាត់លើការលក់អាវុធ និងហាងលក់អាវុធទំនើបៗ ព្រមទាំងកំហិតទៅលើមនុស្សអាយុចាប់ពី ២១ឆ្នាំឡើង ទើបអាចទិញអាវុធបាន៕
