សាលាឧទ្ធរណ៍ នៅថ្ងៃព្រឹកនេះ បានសម្រេចឲ្យបន្តឃុំខ្លួនលោក កឹម សុខា ដដែល ដូចទៅនឹងសេចក្ដីសម្រេចរបស់សាលាដំបូងរាជធានី បន្ទាប់ពីលោកនាយករដ្ឋមន្ត្រី ហ៊ុន សែន ថ្លែងថា លោកមិនជឿថា តុលាការនេះនឹងសម្រេចដោះលែងមេបក្សប្រឆាំងរូបនេះនោះឡើយ។
ក្រុមមេធាវីការពារក្ដីឲ្យមេដឹកនាំអតីតគណបក្សសង្គ្រោះជាតិ លោក កឹម សុខា បានសម្រេចប្ដឹងទៅសាលាឧទ្ធរណ៍ ជំទាស់ទៅនឹងសេចក្ដីសម្រេចរបស់សាលាដំបូងរាជធានីភ្នំពេញ ដែលបានសម្រេចឲ្យបន្តឃុំខ្លួនមេដឹកនាំបក្សប្រឆាំងរូបនេះ ៦ខែបន្ថែមទៀត ក្រោយពីលោកត្រូវបានចាប់ដាក់ឃុំបណ្ដោះអាសន្នអស់រយៈពេល ៦ខែមកហើយនោះ។
សហមេធាវីការពារក្ដីលោក កឹម សុខា គឺលោកស្រី ម៉េង សុភារី មានប្រសាសន៍ថា ប្រធានក្រុមប្រឹក្សាជំនុំជម្រះសភាស៊ើបសួរសាលាឧទ្ធរណ៍ បានសម្រេចឲ្យឃុំខ្លួនកូនក្ដីលោកស្រីបន្តទៀត ដោយសម្អាងថា ការសម្រេចរបស់ចៅក្រមស៊ើបសួរសាលាដំបូងរាជធានីភ្នំពេញធ្វើឡើងតាមនីតីវិធីច្បាប់។
សវនាការរយៈពេល ២ម៉ោងនៅព្រឹកថ្ងៃនេះ ត្រូវបានធ្វើឡើងដោយពុំមានវត្តមានលោក កឹម សុខា នោះឡើយ បើទោះបីជាសាលាឧទ្ធរណ៍បានចេញបញ្ជាឲ្យខ្លួនមេបក្សប្រឆាំងរូបនេះចូលក្នុងសវនាការថ្ងៃនេះក៏ដោយ។
លោក ហែម សុជាតិ សហមេធាវីការពារក្ដីឲ្យលោក កឹម សុខា ប្រាប់អ្នកសារព័ត៌មានបន្ទាប់ចេញពីសវនាការថា លោកមិនដឹងពីមូលហេតុដែលចៅក្រមមិនយកកូនក្ដីមកចូលរួមសវនាការនោះទេ។ លោកចាត់ទុកការមិននាំខ្លួនកូនក្ដីមកចូលរួមសវនាការថា ជារឿងអយុត្តិធម៌ ខណៈដែលលោក កឹម សុខា បានបង្ហាញឆន្ទៈថា នឹងចូលរួមសវនាការនៅក្នុងថ្ងៃនេះ បើទោះបីលោកកំពុងមានជំងឺពិបាកក្នុងការធ្វើដំណើរក៏ដោយ។
លោកថា៖ «យើងចង់ឲ្យមានវត្តមានកូនក្ដី ដើម្បីឲ្យគាត់ថ្លៃងប្រាប់ទៅសភាស៊ើបសួរថា មិនគួរឃុំខ្លួនគាត់ទេ តែអាជ្ញាធរមិនដឹកមក។ យើងក៏មានការសោកស្ដាយដែរចំពោះបញ្ហាហ្នឹង»។
សេចក្ដីសម្រេចបែបនេះរបស់សាលាឧទ្ធរណ៍ បានកើតឡើងតែពីរបីម៉ោងប៉ុណ្ណោះ ក្រោយពីលោកនាយករដ្ឋមន្ត្រី ហ៊ុន សែន បានថ្លែងជាសាធារណៈថា លោកមិនជឿថា តុលាការមួយនេះ នឹងដោះលែងលោក កឹម សុខា ឲ្យនៅក្រៅឃុំនោះឡើយ ខណៈដែលលោកទម្លាយផងដែរថា លោកផ្ទាល់បានបញ្ជាឲ្យចាប់ខ្លួនមេដឹកនាំបក្សប្រឆាំងរូបនេះ។
ខណៈដែលអះអាងថា សេចក្ដីសម្រេចរបស់តុលាការជាសេចក្ដីសម្រេចដោយឯករាជ្យ លោក ហ៊ុន សែន បានថ្លែងក្នុងពិធីចែកសញ្ញាបត្រដល់និស្សិតនៅព្រឹកថ្ងៃនេះថា៖ «ខ្ញុំមិនជឿទេថា សាលាឧទ្ធរណ៍នឹងដោះលែងអាមេក្បត់ជាតិហ្នឹងទេ»។
សវនាការនៅព្រឹកថ្ងៃនេះ ត្រូវបានដំណើរការទៅក្រោមការរឹតបន្តឹងសន្តិសុខផងដែរ ដោយសមត្ថកិច្ចបានដាក់របាំងបិទកំណាត់វិថីសុធារស និងកំណាត់ផ្លូវស៊ីសុវត្ថិ មិនឲ្យចរាចរណ៍ឆ្លងកាត់នោះឡើយ ខណៈដែលក្រុមអ្នកគាំទ្របក្សប្រឆាំង និងក្រុមអ្នកឃ្លាំមើលសិទ្ធិមនុស្សជាតិ និងអន្តរជាតិ មិនត្រូវបានអនុញ្ញាតឲ្យចូលទៅក្នុងបរិវេណនៃសាលាឧទ្ធរណ៍នោះឡើយ។
នៅខាងក្រៅបរិវេណសាលាឧទ្ធរណ៍ឯណោះវិញ លោក ប៉ែន ចាន់ ជាពលរដ្ឋម្នាក់ដែលបានទៅតាមដានសវនាការនៅព្រឹកថ្ងៃនេះ ត្រូវបានមេសន្តិសុខខណ្ឌដូនពេញ លោក គឹម វុត្ថា ទះកំផ្លៀងមួយដៃ និងបង្ខំឲ្យលុបចោលសំណេរលើផ្លូវ ដែលលោក ប៉ែន ចាន់ សរសេរថា «០+0=៨»។
ប្រធានគ្រប់គ្រងផ្នែកអង្កេតនៃអង្គការលីកាដូ លោក អំ សំអាត បានលើកឡើងថា នេះមិនមែនជាករណីថ្មីនោះទេ ដែលតុលាការកម្ពុជា តែងតែបដិសេធបណ្តឹងទាស់នៅក្នុងសំណុំរឿងពាក់ព័ន្ធនឹងនយោបាយនោះ។
លោក អំ សំអាត មានប្រសាសន៍ថា៖ «តាំងពីដើមមក ករណីធំៗឬក៏រឿងអ្នកនយោបាយ ឬក៏សកម្មជនការពាសិទ្ធិមនុស្ស ការពារដីធ្លី និងបរិស្ថាននានា បើសិនជាសាលាដំបូងសម្រេចម៉េចហើយ សាលាឧទ្ធរណ៍កម្រមានការកែប្រែណាស់ គឺសាលក្រម ឬក៏សេចក្ដីសម្រេចរបស់តុលាការជាពិសេសការជំទាស់នឹងការឃុំខ្លួនហ្នឹង»។
លោក កឹម សុខា ត្រូវបានសាលាដំបូងរាជធានីភ្នំពេញ សម្រេចឲ្យបន្តឃុំខ្លួនបន្តទៀត បន្ទាប់ពីលោកត្រូវចាប់ដាក់ឃុំអស់រយៈពេលជាង ៦ខែមកហើយនោះ ចាប់តាំងពីថ្ងៃទី០៣ ខែកញ្ញាឆ្នាំមុន។
លោក កឹម សុខា ត្រូវបានរដ្ឋាភិបាលចោទថា «ក្បត់ជាតិ» និង «ឃុបឃិត»ជាមួយបរទេស ក្នុងបំណងផ្ដួលរំលំរដ្ឋាភិបាលស្របច្បាប់ ប៉ុន្តែ គណបក្សសង្គ្រោះជាតិ បានបដិសេធចំពោះការចោទប្រកាន់នេះ៕
