សន្តិសុខត្រូវបានរឹតបន្តឹងនៅជុំវិញសាលាឧទ្ធរណ៍នៅព្រឹកថ្ងៃនេះ ខណៈដែលសវនាការសំណុំរឿងមេដឹកនាំបក្សប្រឆាំងកំពុងជាប់ឃុំ ត្រូវបានកំណត់ធ្វើឡើងនៅម៉ោង ៨ព្រឹក ទាំងគ្មានវត្តមានលោក កឹម សុខា។
កំណាត់ផ្លូវសុធារសត្រង់ម្ដុំមុខព្រះបរមរាជវាំងរហូតដល់មុខសាលមហោស្រពចតុមុខ និងកំណាត់ផ្លូវស៊ីសុវត្ថិនៅត្រង់អតីតមន្ទីររដ្ឋសភា ត្រូវបានកម្លាំងសន្តិសុខដាក់របាំងការពារ និងហាមឃាត់ការធ្វើដំណើររបស់យានយន្តគ្រប់ប្រភេទ។
ក្រុមអ្នកគាំទ្រ និងអ្នកឃ្លាំមើលសិទ្ធិមនុស្សជាតិ-អន្តរជាតិ ក៏មិនត្រូវបានអនុញ្ញាតឲ្យចូលទៅតាមដានដំណើរសវនាការក្ដីលោក កឹម សុខា ផងដែរនៅព្រឹកនេះ។
សាលាឧទ្ធរណ៍បានកំណត់បើកសវនាការលើបណ្ដឹងរបស់ក្រុមមេធាវី ដែលបានប្ដឹងជំទាស់ទៅនឹងការបន្តឃុំខ្លួនលោក កឹម សុខា បន្ទាប់ពីមេដឹកនាំបក្សប្រឆាំងរូបនេះ ត្រូវបានឃុំខ្លួនបណ្ដោះអាសន្នអស់រយៈពេល ៦ខែរួចមកហើយនោះ។
សាលាឧទ្ធរណ៍ក៏បានចេញបញ្ជាឲ្យនាំខ្លួនលោក កឹម សុខា ចូលសវនាការនៅព្រឹកនេះផងដែរ ប៉ុន្តែ វត្តមាននៃមេដឹកនាំបក្សប្រឆាំងរូបនេះ មិនត្រូវបានគេប្រទះឃើញនោះឡើយ។
អ្នកនាំពាក្យអគ្គនាយកដ្ឋានពន្ធនាគារ លោក នុត សវនា ពុំបានបញ្ជាក់ឲ្យច្បាស់ទេថា តើលោក កឹម សុខា ត្រូវបាននាំយកពីពន្ធនាគារត្រពាំងផ្លុង ចូលក្នុងសវនាការនៅព្រឹកថ្ងៃនេះ ឬយ៉ាងណានោះទេ ហើយលោកបានប្រាប់ឲ្យសួរទៅខាងសាលាឧទ្ធរណ៍។
អ្នកនាំពាក្យសាលាឧទ្ធរណ៍ លោក ទូច ថារិទ្ធិ បានប្រាប់វីអូឌីនៅព្រឹកថ្ងៃនេះថា មន្ត្រីនៃអគ្គនាយកដ្ឋានពន្ធនាគារ ពុំបាននាំខ្លួនលោក កឹម សុខា ចូលក្នុងសវនាការនៅព្រឹកថ្ងៃនេះ ដូចដែលសាលាឧទ្ធរណ៍បានចេញបញ្ជាឲ្យនាំខ្លួននោះឡើយ។
ខណៈដែលសវនាការលើមេដឹកនាំបក្សប្រឆាំងរូបនេះកំពុងដំណើរការនោះ លោកនាយករដ្ឋមន្ត្រី ហ៊ុន សែន បានថ្លែងថា លោកមិនជឿថា តុលាការមួយនេះ នឹងដោះលែងលោក កឹម សុខា នោះឡើយ បើទោះបីជាលោកបានអះអាងអំពីអំណាចនៃការសម្រេចចិត្តដោយឯករាជ្យរបស់តុលាការក៏ដោយ។
នៅក្នុងពិធីចែកសញ្ញាបត្រដល់និស្សិតសាកលវិទ្យាល័យឯកជនមួយនៅក្នុងរាជធានីភ្នំពេញនៅព្រឹកថ្ងៃនេះ លោក ហ៊ុន សែន បានថ្លែងថា៖ «ខ្ញុំមិនជឿទេថា សាលាឧទ្ធរណ៍នឹងដោះលែងអាមេក្បត់ជាតិហ្នឹងទេ»។
លោក កឹម សុខា ត្រូវបានសាលាដំបូងរាជធានីភ្នំពេញ សម្រេចឲ្យបន្តឃុំខ្លួនបន្តទៀត បន្ទាប់ពីលោកត្រូវចាប់ដាក់ឃុំអស់រយៈពេលជាង ៦ខែមកហើយនោះ ចាប់តាំងពីថ្ងៃទី០៣ ខែកញ្ញាឆ្នាំមុន។
លោក កឹម សុខា ត្រូវបានរដ្ឋាភិបាលចោទថា «ក្បត់ជាតិ» និង «ឃុបឃិត»ជាមួយបរទេស ក្នុងបំណងផ្ដួលរំលំរដ្ឋាភិបាលស្របច្បាប់ ប៉ុន្តែ គណបក្សសង្គ្រោះជាតិ បានបដិសេធចំពោះការចោទប្រកាន់នេះ។
