ស្នងការនគរបាលរាជធានីភ្នំពេញ បញ្ជាទៅអធិការគ្រប់ខណ្ឌទាំងអស់ ត្រូវស្រាវជ្រាវ និងទប់ស្កាត់ ឲ្យបាននូវរាល់ការប៉ុនប៉ងជួបជុំគ្នារបស់ក្រុមចលនាសង្រ្គោះជាតិ ដោយថាដើម្បីការពារសន្តិសុខសណ្តាប់ធ្នាប់សង្គម ពិសេសអំឡុងពេលបោះឆ្នោតខែកក្កដាខាងមុខ។
ក្នុងកម្មវីធីមួយកាលពីម្សិលមិញលោក ជួន សុវណ្ណថ្លែងថា កងកម្លាំងត្រូវទប់ស្កាត់រាល់ចលនាដែលក្រុមអតីតគណបក្សប្រឆាំងរៀបចំឡើង។ លោក ជួន សុវណ្ណចាត់ទុកថា ចលនាទាំងនោះជាក្រុមប៉ុនប៉ងធ្វើបដិវត្តន៍ពណ៌ផ្តួលរំលំរដ្ឋាភិបាល។
លោកថ្លែងដូចនេះថា «យើងជាអ្នកចូលរួមអនុវត្តន៍ផ្ទាល់ក្នុងការទប់ស្កាត់បដិវត្តន៍ពណ៌ ការទប់ស្កាត់ចលនាអសន្តិសុខសង្គម ដែលក្រុមគណបក្សប្រឆាំងចង់ធ្វើហើយត្រូវទប់ស្កាត់ឲ្យបានរាល់ចលនាណាមួយដែលក្រុមនេះប៉ុនប៉ងចង់ធ្វើ» ។
ជាមួយគ្នានោះ ក្នុងជំនួបសំណេះសំណាលជាមួយកម្មករនាព្រឹកថ្ងៃនេះ លោក ហ៊ុន សែន បានថ្លែងប្រហាក់ប្រហែលនិងលោក ជួន សុវណ្ណដែរ ដោយលោកអំពាវនាវទៅប្រជាពលរដ្ឋទាំងអស់កុំចូលរួមចលនាខុសច្បាប់ ដោយថា ដើម្បីកុំឲ្យប៉ះពាល់ដល់សន្តិសុខសង្គម។
លោកថ្លែងថា«ការដែលលំបាកគឺទៅគាំទ្រការធ្វើសកម្មភាពខុសច្បាប់នោះវិញទេ ទើបវាជាការលំបាក ព្រោះត្រូវប្រឈមជាមួយគុក ជាមួយច្រវ៉ាក់ ជាមួយនឹងខ្នោះ ឬរហូតបើសិនជាមានសកម្មភាពប្រដាប់អាវុធចេញ អំពើហិង្សានិងប្រឈមជាមួយបញ្ហាគ្រោះថ្នាក់នានា ដែលកើតមានឡើងជាយថាហេតុ»។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង យល់ថា បើកម្ពុជាបែកបាក់ផ្ទៃក្នុង នឹងធ្វើឲ្យប្រទេសជិតខាងជាអ្នកចំណេញ។ ករណីនេះលោកថា អ្នកនយោបាយគួរតែរកដំណោះស្រាយជជែកគ្នា ដើម្បីធ្វើឲ្យកម្ពុជាជៀសផុតពីការខាតប្រយោជន៍ទៅឲ្យប្រទេសជិតខាង។
លោកយល់ថា «ជារឿងដែលល្អ ទាំងអ្នកខាងក្នុង និងអ្នកខាងក្រៅ គឺមិនគួរណា ប្រើប្រាស់វោហាសាស្ត្រជ្រុលនិយមហួសហេតុពេកទេ គួរតែមានការនិយាយ ឬក៏ការប្រើវោហាសាស្ត្រដែលមានការគោរពគ្នាទៅវិញទៅមកដែលជាលក្ខណៈ ដែលថាយើងអាចរស់នៅជាមួយគ្នាបានទៅថ្ងៃក្រោយ យើងមិនមែនជាសត្រូវជាមួយគ្នា បានវោហាសាស្ត្រដែលយើងចំនេញ»។
ចលនាសង្គ្រោះជាតិផ្ដួចផ្ដើមដោយលោក សម រង្ស៊ី កាលពីពាក់កណ្តាលខែមករា ឆ្នាំ២០១៨នេះ ដោយលោកថាចលនានេះ បង្កើតឡើងដើម្បីរកដំណោះស្រាយមួយ លើកទឹកចិត្ត និងបំផុសបំផុលឡើងវិញនូវ កម្លាំងស្នេហាជាតិ និងកម្លាំងប្រជាធិបតេយ្យនៅកម្ពុជា។ លោកបន្តថា ចលនានេះនឹងធ្វើសកម្មភាពឈានទៅដាក់សម្ពាធដៃគូប្រកួត ឲ្យពិចារណាបើកចំហប្រជាធិបតេយ្យឡើងវិញ ក្រោយពីគណបក្សប្រឆាំងរបស់លោក ត្រូវបានរំលាយកាលពីពាក់កណ្តាល ខែវិច្ឆិកា ឆ្នាំមុន ហើយថ្នាក់ដឹកនាំ ១១៨រូបរបស់បក្សប្រឆាំងមួយនេះ ក៏ត្រូវបានដាក់ឲ្យស្ថិតក្រោមការហាមឃាត់មិនឲ្យធ្វើនយោបាយរយៈពេល ៥ឆ្នាំផងដែរ។
ប៉ុន្តែក្រុមចលនាសង្គ្រោះជាតិដែលដឹកនាំដោយលោក សម រង្ស៊ី នោះ ត្រូវបានរដ្ឋាភិបាលកម្ពុជាចាត់ទុកថា ក្រុមឧទ្ទាមក្រៅច្បាប់។ មិនតែប៉ុណ្ណោះ ថ្នាក់ដឹកនាំនៃចលនានេះ ក៏ត្រូវបានក្រសួងមហាផ្ទៃប្តឹងឲ្យតុលាការកម្ពុជាចាត់ការទៅតាមផ្លូវច្បាប់ថែមទៀត៕
