ជនជាតិភាគតិចនៅភូមិចំនួនក្នុងខេត្តកោះកុងស្វែងរកកិច្ចអន្តរាគមន៍ពីរដ្ឋាភិបាល ឲ្យជំរុញទៅស្ថាប័នពាក់ព័ន្ធពន្លឿនចុះបញ្ជីអត្តសញ្ញាណដីសហគមន៍ពួកគេស្របតាមច្បាប់ជាតិ និងច្បាប់អន្តរជាតិ។
ជនជាតិជងតំណាងឲ្យអ្នកភូមិប្រឡាយ និងភូមិជំនាប់ ស្រុកថ្មបាំង ខេត្តកោះកុង ស្ថិតនៅតំបន់អារ៉ែង លោក គេល គូន បានថ្លែងប្រាប់អ្នកសារព័ត៌មានបន្ទាប់ពីដាក់ញត្តិទៅក្រសួងអភិវឌ្ឍន៍ជនបទ ខុទ្ទកាល័យនាយករដ្ឋមន្ត្រី និងអង្គការសហប្រជាជាតិថា ដើមចមដែលនាំឲ្យពួកគេឡើងមករាជធានីភ្នំពេញដាក់ញត្តិនៅថ្ងៃនេះ ដោយសារពួកគេព្រួយបារម្ភបាត់បង់អត្តសញ្ញាណ និងទំនៀមទម្លាប់ ប្រពៃណី។
លោកថ្លែងថា«យើងវាមានវប្បធម៌ប្រពៃណីយឲ្យបានច្បាប់ជាតិនិងអន្តរជាតិទទួលស្គាល់ពីចំណុចជនជាតិដើម បើមានដូចព្រៃអ្នកតា ចំការវិលជុំ ធម្មតាក្រុមហ៊ុនផ្សេងៗទៀតចង់ទៅវិនិយោគនៅទីនោះ»។
តំណាងជនជាតិជងម្នាក់ទៀត អ្នកស្រី ហម ង៉ែត បានព្រមានថា នឹងឡើងមករកកិច្ចអន្តរាគមន៍បន្តទៀតទៅស្ថាប័នជាតិនិងអន្តរជាតិ ដោយថាបើអាជ្ញាធរមិនដោះស្រាយបញ្ហានេះជូនពួកគេឲ្យបានឆាប់។
អ្នកស្រីព្រមានថា«បើអត់មានដំណោះស្រាយពួកខ្ញុំនឹងរ៉ៃលុយមកទៀត ដើម្បីឲ្យគាត់[រដ្ឋាភិបាល] ទទួលស្គាល់សិទ្ធិពួកខ្ញុំជាជនជាតដើមជងភាគតិច»។
មន្ត្រីក្រសួងអភិវឌ្ឍន៍ជនបទ ខុទ្ទកាល័យនាយករដ្ឋមន្ត្រី និងមន្ត្រីអង្គការសហប្រជាជាតិដែលចេញមកទទួលយកញត្តិពីជនជាតិដើមភាគតិចជង បានអះអាងប្រហាក់ប្រហែលគ្នាថា នឹងយកលិខិតនេះបញ្ជូនទៅថ្នាក់លើនៃស្ថាប័នរបស់ខ្លួនពិនិត្យ និងដោះស្រាយជូននៅពេលក្រោយ ដោយមិនបានបញ្ជាក់ពីពេលវេលាច្បាស់លាស់នោះទេ។
មន្ត្រីប្រឹក្សាច្បាប់ លោក ហួរ អ៊ីម ដែលតាមដានករណីនេះ អះអាងថា មូលហេតុដែលនាំឲ្យជនជាតិដើមភាគតិចជងទាំងនោះឡើងរកកិច្ចអន្តរាគមន៍ពីរដ្ឋាភិបាល ទំនងជាពួកគេ អស់ជំនឿលើអាជ្ញាធរមូលដ្ឋាន ហើយអាជ្ញាធរអាចពាក់ព័ន្ធទំនាស់ផលប្រយោជន៍ជាដើម។
លោកមានប្រសាសន៍ថា«យើងគិតថាប្រហែលជាអាចពាក់ព័ន្ធទំនាស់ផលប្រយោជន៍អ្វីមួយ ដែលថាអាជ្ញាធរខេត្តព្រងើយកន្តើយមិនទទួលស្គាល់ពួកគាត់ដែលជាជនជាតិដើមភាគតិច ប្រហែលជាមានផលប្រយោជន៍ពាក់ព័ន្ធនៅកន្លែងហ្នឹង ដែលពួកគាត់មិនព្រមទទួលស្គាល់»។
បើតាមជនជាតិដើមភាគតិចជងមកពីភូមិប្រឡាយ ឃុំប្រឡាយ និងភូមិជំនាប់ ឃុំជំនាប់ ស្រុកថ្មបាំង ខេត្តកោះកុង បានអះអាងថា បច្ចុប្បន្ននេះ មានប្រជាពលរដ្ឋប្រហែល១២០គ្រួសារនិងមនុស្សជាង៤០០នាក់ កំពុងប្រកបមុខរបរបង្កបង្កើនផលចិញ្ចឹមជីវិតលើដីចំការវិលជុំបន្តពីដូនតា ខណៈដីនោះពួកគេថារដ្ឋាភិបាលមិនទាន់ចុះបញ្ជីស្វ័យអត្តសញ្ញាណជនជាតិដើមភាគតិចជងនៅតំបន់អារ៉ែងនៅឡើយ៕
