ក្រុមកម្មកររោងចក្រហ្រ្គែនអននើរ នៅក្នុងខេត្តកណ្ដាល បានអះអាងថា ពួកគេទទួលបានសំណងមិនសមស្របទៅតាមគោលការណ៍ច្បាប់នោះឡើយ បន្ទាប់ពីក្រុមមន្ត្រីក្រសួងការងារចុះផ្ដល់សំណងដល់ពួកគេនៅថ្ងៃនេះ ក្រោយពីថៅកែរោងចក្រនេះ បានរត់ចោល។
អ្នកស្រី ឈុន ចាន់ថន អតីតកម្មការិនីរោងចក្រ ហ្គ្រែនអននើ បានអះអាងថា អ្នកស្រី និងក្រុមកម្មការិនី ៩៧១នាក់ទៀត ទទួលបានប្រាក់សំណងពីមន្ត្រីក្រសួងការងារនៅព្រឹកថ្ងៃនេះ បន្ទាប់ពីលោកនាយករដ្ឋមន្ត្រី ហ៊ុន សែន បានបញ្ជាឲ្យផ្ដល់ប្រាក់បុរេប្រទានដល់ក្រុមកម្មករនានា ដែលត្រូវបានថៅកែរោងចក្របិទទ្វារ និងរត់ចោល។
អ្នកស្រីបន្ថែមថា ប៉ុន្តែ ប្រាក់សំណងនោះ ត្រូវបានទូទាត់ខុសពីច្បាប់ការងារ និងអនុសាសន៍របស់លោកនាយករដ្ឋមន្ត្រី ហ៊ុន សែន។
អ្នកស្រីប្រាប់ថា៖ «ខ្ញុំមិនពេញចិត្តទេ ដោយសារលុយខ្ញុំត្រូវបាន ៥ចំណុច ប៉ុន្តែ ឥលូវ[ក្រសួង]ឲ្យតែ ៣ចំណុច»។
កម្មករម្នាក់ទៀត អ្នកស្រី ស៊ុន ម៉ាច បានប្រាប់ថា អ្នកស្រីក៏ទទួលបានប្រាក់សំណងមិនស្របតាមច្បាប់ការងារដែរ ប៉ុន្តែ អ្នកស្រីថា អ្នកស្រីមិនតវ៉ានោះឡើយ ដោយថា ជិតដល់ថ្ងៃចូលឆ្នាំថ្មីផង។
អនុប្រធានសហជីពស៊ីខៅឌូប្រចាំរោងចក្រហ្គ្រេតអននើរ លោក ស៊ឹម សំអូន បានឲ្យដឹងថា ក្រុមកម្មករពិតជាមិនពេញចិត្តនឹងទំហំសំណងដែលពួកគេទទួលបាននោះទេ ខណៈដែលការទូទាត់សំណងមិនត្រូវបានធ្វើឡើងផ្អែកតាមច្បាប់ និងអនុសាសន៍របស់លោកនាយករដ្ឋមន្ត្រីនោះឡើយ។
បើតាមមេដឹកនាំសហជីពរូបនេះ ក្រុមប្រឹក្សាអាជ្ញាកណ្ដាល និងតុលាការ បានយល់ព្រមទូទាត់សំណងឲ្យពួកគាត់ ៥ចំណុច ប៉ុន្តែ ក្រុមកម្មករទទួលបានតែ ៣ចំណុចប៉ុណ្ណោះ។
លោកថា៖ «ខ្ញុំស្ដាប់ទៅតាមប្រសាសន៍សម្ដេច គាត់ថា មិនមែនមានប្រសាសន៍ឲ្យ ៣ចំណុចទេ។ បើប្រសាសន៍គាត់ថា ក្រុមហ៊ុនទាំងអស់ បើបិទទ្វារហ្នឹង ថៅកែរត់ចោលគិតឲ្យតែ ៣ចំណុច ឬ ប្រាក់ខែចុងក្រោយ ខ្ញុំក៏ត្រេកអរនឹងទទួលយក តែសម្ដេចគាត់មានប្រសាសន៍ថា ត្រូវគិតទៅតាមច្បាប់ ហើយពួកខ្ញុំទាំងអស់មិនមែនគិតតាមច្បាប់។ ខ្ញុំមិនមែនចេះតែនិយាយច្បាប់ខ្លួនឯងទេ ព្រោះ ខាងតុលាការក៏ជាអ្នកច្បាប់ ហើយអាជ្ញាធរក៏ជាអ្នកច្បាប់ ហើយខ្ញុំយោងទៅតាមសៀវភៅការងារចេញតាំងពីឆ្នាំ១៩៩៧មកម៉្លេះ»។
អគ្គលេខាធិការរងគណៈកម្មការសម្រាប់ដោះស្រាយបញ្ហាកូដកម្ម បាតុកម្មនៅតាមគ្រប់មុខសញ្ញានៃក្រសួងការងារលោក ទេស រុក្ខាផល បានប្រាប់ថា ក្រសួងអាចផ្ដល់ប្រាក់អត្ថប្រយោជន៍ជូនកម្មករដែលត្រូវថៅកែរត់ចោលបាន ៣ចំណុចតែប៉ុណ្ណោះ ប៉ុន្តែ លោកថា ក្រុមកម្មករមានសិទ្ធិប្ដឹងទៅតុលាការ ប្រសិនបើពួកគេមិនយល់ព្រម។
លោកថា៖ «អញ្ចឹង បើគាត់ត្រូវថៅកែបណ្ដេញចេញ គឺទី១ ត្រូវជូនបាន ២ចំណុចទៀត គឺបានលុយជូនដំណឹងមុន ហើយនិងបានលុយជំងឺចិត្ត ប៉ុន្តែ ក្នុងករណីនេះ យើងអាចចាត់ទុកថា ជាករណីប្រធានសក្តិមួយដែរ ថៅកែរត់ចោលបាត់ហើយ ហើយមានជូនដំណឹងពីអង្កាល? ហើយមួយទៀត សោហ៊ុយជំងឺចិត្ត តើមានអ្នកណាសងជំងឺចិត្តឥលូវហ្នឹង? អញ្ចឹង រដ្ឋាភិបាលខំប្រឹងដោះស្រាយក្នុងលទ្ធភាពដែលខ្លួនមាន គឺដោះបាន ៣ចំណុច»។
រោងចក្រហ្រ្គែនអននើ ត្រូវបានបិទទ្វារតាំងពីឆ្នាំ២០១៦ ក្រោយពីថៅកែបានរត់ចោលក្រុមកម្មករ ហើយក្រុមកម្មករ ៩៧១នាក់ បានចេញតវ៉ាទាមទារប្រាក់អត្ថប្រយោជន៍របស់ពួកគេតាំងពីពេលនោះមក៕
