គណៈកម្មការជាតិបានពិនិត្យនិងសម្រេចស្នើព្រះមហាក្សត្របន្ធូរបន្ថយ និងលើកលែងទោសដល់ទណ្ឌិត ៥០ នាក់នៅក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរខាងមុខនេះ។
អ្នកនាំពាក្យក្រសួងយុត្តិធម៌លោក ជីន ម៉ាលីន ប្រាប់វិអូឌីនៅថ្ងៃនេះថា គណៈកម្មការបានពិនិត្យលើលក្ខខណ្ឌពីរគឺ អ្នកបន្ធូរបន្ថយត្រូវអនុវត្តទោសបាន១ភាគ៣ និងអ្នកទទួលបានការលើកលែងត្រូវឆ្លងកាត់ការអនុវត្តទោស២ភាគ៣នៃទោសសរុប។ លោកបន្តថា ក្រៅពីលក្ខខណ្ឌអនុវត្តទោស គឺគណៈកម្មការក៏ពិនិត្យលើចំណុចអ្នកទោសទាំងនោះខិតខំកែប្រែខ្លួនដែរ។
លោកថា៖«មិនមែនជាលក្ខខណ្ឌកំណត់តែមួយទេ មិនមែនឲ្យតែបាន ១ ភាគ ៣ បន្ធូរបន្ថយ ទោសទេ ២ភាគ៣លើកលែងទេ គូបផ្សំទៅនឹងការវាយតម្លៃទៅលើការកែប្រែ របស់ទណ្ឌិតមួយទៀត ហើយការវាយ ហ្នឹង គឺមានគណៈកម្មការវាយតម្លៃតាំងពីនៅក្នុងពន្ធនាគារមកម្លេះ រហូតដល់គណៈកម្មការថ្នាក់ខេត្ត ដល់ថ្នាក់ជាតិ វាយតម្លៃ ទៅលើសកម្មភាព អតិចរិក ការកែប្រែខ្លួននៅក្នុងពន្ធនាគារ»។
លោកជីន ម៉ាលីន បញ្ជាក់ថា នៅកម្ពុជាមិនមានអ្នកទោសនយោបាយ ឬ អ្នកទោសមនសិការទេ ដូច្នេះក្នុងចំណោម៥០នាក់នោះ មិនមានអ្នកទោសនយោបាយឬ អ្នកទោសមនសិការឡើយ។
កន្លងមកអង្គការជាតិ និងអន្តរជាតិតែងលើកឡើងថា អ្នកជាប់ទោសជា សកម្មជនធ្លី អ្នកការពារបរិស្ថាន និងសកម្មជនគណបក្សនយោបាយជាដើម ជាអ្នកទោសមនសិកា និងជាអ្នកទោសនយោបាយ ដែលគួរត្រូវបានលើកលែងដើម្បីផ្សះផ្សាជាតិ។
មន្ត្រីស៊ើបអង្កេតជាន់ខ្ពស់នៃសមាគមការពារសិទ្ធិអាដហុកលោក ស៊ឹង សែនករុណា យល់ឃើញថាក្រសួងមិនលើកលែងទោសឲ្យសកម្មជនដីធ្លីនិង សកម្មជននយោបាយ ដែលកំពុងជាប់ឃុំនេះ មិនមែនជា រឿង ថ្មីនោះទេ សម្រាប់អនុវត្តប្រព័ន្ធយុត្តិធម៌នៅក្នុងប្រទេសកម្ពុជា។
លោកថា៖«អ្នកទាំងអស់នេះ បើសិនជាស្ថានការណ៍នយោបាយធូរស្រាល ស្ថានការណ៍នយោបាយមាន ភាពល្អប្រសើរ ខ្ញុំជឿជាក់ថាមិនចាំបាច់មានពិធីបុណ្យចឹង បានលើកលែងទោសទេ គឺពួកគាត់អាចមានសេរី ភាពបាន អានេះ យើងសម្គាល់កាលពីកន្លងមក។ អញ្ចឹងហើយបានយើងគិតថា ករណីរបស់ពួកគាត់ បើសិនជាស្ថានការណ៍នយោបាយ នៅតែតានតឹង ហើយនៅតែមានស្ថានភាពបែបនេះ ខ្ញុំគិតថាពួកគាត់ ពិបាកនឹងមានសេរីភាព ក្នុងការជួបជុំក្រុមគ្រួសារណាស់»។
ជាទូទៅព្រះមហាក្សត្រតែងតែធ្វើពិធីលើកលែងទោស និងបន្ធូរបន្ថយទោសដល់ទណ្ឌិតក្នុងមួយឆ្នាំចំនួន ៣ដង គឺនៅក្នុងពិធីបុណ្យចូលឆ្នាំខ្មែរម្តង បុណ្យវិសាខបូជា និងពិធីបុណ្យអុំទូក។
បើតាមរបាយការណ៍របស់ក្រសួងមហាផ្ទៃ បានឱ្យដឹងថា ឆ្នាំ២០១៧កន្លងមក ព្រះមហាក្សត្របានបន្ធូរបន្ថយ និងលើកលែងទោសដល់ទណ្ឌិតសរុបចំនួន ១៥៧នាក់ ក្នុងនោះ ស្រី ២០នាក់ ក្នុងពិធីបុណ្យចូលឆ្នាំប្រពៃណីខ្មែរចំនួន ៧២នាក់ បុណ្យពិសាខបូជាចំនួន ៣៥នាក់ និងបុណ្យអុំទូក ៥០នាក់។
