ចិនដំឡើងមីស៊ីលនៅកោះមានជម្លោះ​ក្នុងសមុទ្រខាងត្បូង

របាយការណ៍មួយបង្ហាញថា ចិនបានរៀបចំដំឡើងប្រព័ន្ធមីស៊ីលប្រឆាំងនាវាមុជទឹក និងអាចបាញ់ទប់ទល់ការវាយប្រហារតាមអាកាសទៀតផង នៅលើកោះកំពុងមានជម្លោះនៅសមុទ្រចិនខាងត្បូង។​

រដ្ឋអំណាចទីក្រុងវ៉ាស៊ីនតោន​បានព្រមាន​ថា ទីក្រុងប៉េកាំង កំពុងតែបង្កបញ្ហាកើតឡើងដោយសារតែការបង្កើតភាពមិនច្បាស់លាស់ក្នុងការរៀបចំមូលដ្ឋានទ័ពនៅកន្លែងមានជម្លោះ។​

បណ្តាញព័ត៌មានរបស់អាមេរិក CNBC បានផ្សព្វផ្សាយកាលពីថ្ងៃពុធថា ចិនកំពុងតែរៀបចំដំឡើងមីស៊ីលនៅកោះស្ព្រាតលី។ ព័ត៌មាននេះក៏មានការបញ្ជាក់រដ្ឋាភិបាលរបស់វៀតណាម និងហ្វីលីពីនផងដែរ។​

បញ្ហាដែលកំពុងធ្វើឲ្យមានការព្រួយបារម្ភនោះគឺថា បើសិននេះជាព័ត៌មានពិតនោះ នឹងធ្វើឲ្យមានភាពតឹង ឬជាចំណុចចាប់ផ្តើមនៃជម្លោះជាថ្មីទៀត។​

ទោះយ៉ាងណាអ្នកនាំពាក្យក្រសួងការបរទេសចិនលោកស្រី Hua Chunying  ថ្លែងកាលពីថ្ងៃព្រហស្បតិ៍ម្សិលមិញថា នោះជាព័ត៌មានមិនពិតទេ។​

លោកស្រីថ្លែងថា ចិនកំពុងតែរៀបចំសំណង់នៅទីនោះ គឺធ្វើឡើងដោយសន្តិភាពក្នុងគោលបំណងដើម្បីការពារបូរណភាពទឹកដីតែប៉ុណ្ណោះមិនចង់បង្កភាពតានតឹងនោះទេ។

ប្រទេសកំពុងតែមានជម្លោះលេចធ្លោរជាមួយចិននៅសមុទ្រចិនខាងត្បូងរួមមាន​ដូចជា ហ្វីលីពីន ប្រុយណេ ម៉ាឡេស៊ី និង វៀតណាម​។ ក្នុងនោះវៀតណាម និង ហ្វីលីពីន​ចេញមុខខ្លាំងជាងគេក្នុងការប្រឈមជាមួយចិន។​​