អាជ្ញាធរប៉ាគីស្ថានបានឲ្យដឹងថា មនុស្ស ២៣នាក់ ត្រូវបានសម្លាប់ ហើយ ១១នាក់ទៀត បានរងរបួស បន្ទាប់ពីការផ្ទុះឧស្ម័ននៅតំបន់រ៉ែធ្យូងថ្ម ២កន្លែង នៅភាគពាយព្យប៉ាគីស្ថាន។ នេះបើតាមការចុះផ្សាយរបស់ទីភ្នាក់ងារព័ត៌មាន AFP ដែលបានដកស្រង់សម្ដីអាជ្ញាធរប៉ាគីស្ថានកាលពីម្សិលមិញនេះ។
AFP បានចុះផ្សាយបន្តថា បំពង់ឧស្ម័នមេតានបានបង្កជាការផ្ទុះឡើង ធ្វើឲ្យបាក់រូងជីកយករ៉ែនៅភាគខាងជើងនៃទីក្រុងហ្គេតា ស្ថិតនៅជាប់ព្រំដែនប្រទេសអ៊ីរ៉ង់ និងប៉ាគីស្ថាន។
មន្ត្រីជាន់ខ្ពស់រដ្ឋាភិបាលនៅទីក្រុងហ្គេតា ត្រូវបាន AFP ដកស្រង់សម្ដីដែលបាននិយាយថា មនុស្ស ១៦នាក់ ក្នុងចំណោម ២៥នាក់នៅក្នុងអណ្ដូងរ៉ែនោះ បានស្លាប់ ហើយកម្មករអណ្ដូងរ៉ែដទៃទៀត ត្រូវបានជួយសង្គ្រោះ និងដឹកទៅកាន់មន្ទីរពេទ្យ៕
