កូរ៉េខាងជើងបាននិយាយកាលពីថ្ងៃម្សិលមិញថា បំណងរំសាយកម្មវិធីនុយក្លេអ៊ែររបស់ខ្លួនដែលត្រូវបានលាតត្រដាងឲ្យដឹងនៅអំឡុងជំនួបកំពូលកូរ៉េទាំងពីរកន្លងមកនោះ មិនមែនបណ្ដាលមកពីទណ្ឌកម្ម និងសម្ពាធរបស់អាមេរិកនោះឡើយ ដោយព្រមានទៅអាមេរិកកុំឲ្យបំភាន់សាធារណៈមតិ។ នេះបើតាមការចុះផ្សាយរបស់ទីភ្នាក់ងារព័ត៌មានរ៉យទ័រ។
រ៉យទ័របានចុះផ្សាយបែបនេះ ដោយបានដកស្រង់សេចក្ដីរាយការណ៍របស់ទីភ្នាក់ងារព័ត៌មានរដ្ឋកូរ៉េខាងជើង KCNA ដែលចុះផ្សាយថា ក្រុងវ៉ាស៊ីងតោនបានបំភាន់សាធារណៈមតិ ដោយអះអាងថា ការសន្យារំសាយកម្មវិធីនុយក្លេអ៊ែរ គឺជាលទ្ធផលនៃទណ្ឌកម្ម និងសម្ពាធ។
បើតាមរ៉យទ័រ ទីភ្នាក់ងារព័ត៌មាន KCNA បានចុះផ្សាយបែបនេះ ដោយបានដកស្រង់សម្ដីអ្នកនាំពាក្យក្រសួងការបរទេសកូរ៉េខាងជើង ដែលនិយាយថា អាមេរិកមិនគួរបង្កហេតុដាក់កូរ៉េខាងជើង តាមរយៈការដាក់ពង្រាយសម្ភារៈយុទ្ធសាស្ត្រនៅកូរ៉េខាងត្បូង និងលើកឡើងពីបញ្ហាសិទ្ធិមនុស្សនោះឡើយ។
កូរ៉េខាងជើងបានរងទណ្ឌកម្មជាបន្តបន្ទាប់ពីអង្គការសហប្រជាជាតិ បន្ទាប់ពីរដ្ឋឯកោមួយនេះបានសាកល្បងគ្រាប់បែកនុយក្លេអ៊ែរ និងគ្រាប់មីស៊ីលជាច្រើនលើកច្រើនសារមកនោះ។
ប៉ុន្តែ មេដឹកនាំកូរ៉េខាងជើង លោក គីម ជុងអ៊ុន នៅអំឡុងជំនួបជាមួយប្រធានាធិបតីកូរ៉េខាងត្បូង លោក មូន ជែអ៊ីន កាលពីចុងខែមេសាកន្លងមកនេះ បានសន្យារំសាយកម្មវិធីនុយក្លេអ៊ែរចោល៕
