សារព័ត៌មានអន្តរជាតិបានចុះផ្សាយថា រដ្ឋមន្ត្រីមហាផ្ទៃប៉ាគីស្ថាន លោក អាសាន អ៊ីក្បា ត្រូវបានខ្មាន់កាំភ្លើងបាញ់ឲ្យរងរបួស ដែលត្រូវបានគេសង្ស័យថា ការករណីប៉ុនប៉ងធ្វើឃាតលើរូបលោកនៅមុនការបោះឆ្នោតជាតិនាពេលខាងមុខនេះ។
សារព័ត៌មានអង់គ្លេស BBC បានរាយការណ៍ថា រដ្ឋមន្ត្រីមហាផ្ទៃប៉ាគីស្ថានរូបនេះ បានត្រូវបានខ្មាន់កាំភ្លើងបាញ់ប្រហារអំឡុងពេលលោកចូលរួមពិធីជួបជុំមួយនៅទីក្រុងបញ្ចាប នៅថ្ងៃនេះ។
សារព័ត៌មានដដែលនេះ បានឲ្យដឹងបន្ថែមថា លោក អាសាន មិនគ្រោះថ្នាក់ដល់អាយុជីវិតនោះឡើយ គ្រាន់តែរងរបួសដៃ ហើយត្រូវបានបញ្ជូនទៅសង្គ្រោះនៅឯមន្ទីរពេទ្យ។
ចំណែកឯខ្មាន់កាំភ្លើង ត្រូវបានសមត្ថកិច្ចប៉ាគីស្ថានចាប់ខ្លួនបានភ្លាម និងនាំយកទៅសួរចម្លើយ ប៉ុន្តែ មូលហេតុនៃការបាញ់ប្រហារនេះ នៅមិនទាន់ត្រូវបានគេដឹងនៅឡើយទេ។
ទោះជាយ៉ាងណា ការបាញ់ប្រហារនេះបានកើតឡើង នៅមុនពេលដែលប្រទេសប៉ាគីស្ថានត្រូវរៀបចំការបោះឆ្នោតនៅថ្ងៃទី១៥ ខែកក្កដាខាងមុខនេះ៕
