សង្គម

លោក ស ខេង ៖ រដ្ឋាភិបាលបន្ថែមសកម្មភាពការពារពលករពីការកេងប្រវ័ញ្ចគ្រប់រូបភាព

ដោយ វីអូឌី
| ២៣ ឧសភា ២០១៨
ម៉ោង ១៦:០៤

រដ្ឋមន្ត្រីក្រសួងមហាផ្ទៃ លោក ស ខេង កាលពីកន្លងទៅ

រដ្ឋមន្ត្រីក្រសួងមហាផ្ទៃថ្លែងថា ពេលនេះ រដ្ឋាភិបាលកំពុងតែធ្វើសកម្មភាពបន្ថែមទៀត ខិតខំការពារពលករខ្មែរមិនឲ្យមានការកេងប្រវ័ញ្ចនិងរំលោភបំពានលើគ្រប់រូបភាពទាំងអស់។

នៅក្នុងពិធីផ្សព្វផ្សាយរបាយការណ៍បូកសរុបលទ្ធផលការងារប្រយុទ្ធប្រឆាំងអំពើជួញដូរមនុស្សឆ្នាំ២០១៧ និងលើកទិសដៅឆ្នាំ២០១៨ ដែលប្រព្រឹត្តទៅកាលពីម្សិលមិញ លោក ស ខេង លើកឡើងថា រដ្ឋាភិបាលបានផ្តល់ភាពស្របផ្តល់ភាពស្របច្បាប់ដល់ពលករកំពុងធ្វើការនៅប្រទេសថៃ និងបើកឲ្យមានការធ្វើលិខិតឆ្លងដែននៅតាមបណ្តាខេត្តមួយចំនួនទៀត ដើម្បីជៀសវាងការកេងប្រវ័ញ្ចឬ ជួញដូរពលករខ្មែរនៅក្រៅប្រទេស។

លោក ស ខេង បញ្ជាក់ទៀតថា រដ្ឋាភិបាលក៏បានសហការជាមួយដៃគូពាក់ព័ន្ធរួមទាំងរដ្ឋាភិបាលបរទេស និងអង្គការសង្គមស៊ីវិលក្នុងការការពារសិទ្ធិពលករខ្មែរ។

មន្ត្រីកម្មវិធីនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL)លោក ឌីថេ ហូយ៉ា ធ្វើការផ្នែកការពារសិទ្ធិពលករនៅក្រៅប្រទេសលើកឡើងថា នៅពេលដែលពលករទទួលបានភាពស្របច្បាប់កាន់តែច្រើនក៏កាន់តែកាត់បន្ថយការជួញដូរពលករ។

នៅពេលដែលគាត់ទទួលបានភាពស្របច្បាប់កាន់តែច្រើន ការកេងប្រវ័ញ្ច ការជួញដូរថយចុះដែរ។ ប៉ុន្តែវាមិនមែនថយចុះច្រើនណាស់ណាទេ គឺវាអាស្រ័យ លើប្រព័ន្ធការពាររបស់រដ្ឋទៀត។

លោក ឌីថេ ហូយ៉ា មន្ត្រីកម្មវិធីនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL)

លោកហូយ៉ា បន្តថា ពលករស្របច្បាប់ហើយខ្វះប្រពន្ធការពារនិងប្រព័ន្ធដោះស្រាយនៅតែប្រឈមបញ្ហា។

យើងមើលដូចករណីនៅម៉ាឡេស៊ី កម្មករស្របច្បាប់ដែរ ប៉ុន្តែយើងយកទៅដាក់ចោលឲ្យ Agency ហើយ Agency យកទៅលក់ចំណែកពលករខ្លួនឯងអត់ដឹងគេយកទៅលក់ទេ។ ចំណែករដ្ឋយើងក៏អត់ដឹងថា គាត់ធ្វើការនៅផ្ទះណាខ្លះទេ ហើយពេលមានបញ្ហាថា គាត់មានលេខHotline ទាក់ទងទូត ហើយមានលេខទំនាក់ទំនងគណៈកម្មការដោះស្រាយវិវាទ ហើយត្រូវចុះទៅដោះស្រាយយ៉ាងម៉េច? យើងអត់មាន ការពិតទាំងអស់ហ្នឹងយើងត្រូវតែមាន។

លិខិតជូនដំណឹង របស់អគ្គនាយកដ្ឋានអត្តសញ្ញាណកម្មនៃក្រសួងមហាផ្ទៃ ចុះថ្ងៃទី១៧ខែឧសភា លើកឡើងថា រដ្ឋាភិបាលសម្រេចដាក់ឲ្យដំណើរការសាខាផ្តល់សេវាលិខិតឆ្លងដែនធម្មតាគំរូថ្មីបីកន្លែងបន្ថែមទៀតរួមមាន នៅឃុំអន្លង់វិល ខេត្តបាត់ដំបង សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ និងសង្កាត់ដងទង់ ក្រុងខេមរភូមិន្ទ ខេត្តកោះកុង។

ស ខេង

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។