លោកនាយករដ្ឋមន្ត្រី ព្រមានដកតំណែងលោក ចម ប្រសិទ្ធ បើរកឃើញថា រដ្ឋមន្ត្រីរូបនេះពិតជាបានរំលោភថានានុក្រម ជុំវិញការនិយាយថា ក្រុមហ៊ុនចិនរុករករ៉ែមាស ជាប់ពាក់ព័ន្ធនឹងធ្វើឲ្យទឹកព្រែកទេរ ខេត្តក្រចេះ មានជាតិពុល សម្លាប់អ្នកភូមិ ។
លោកនាយករដ្ឋមន្ត្រី ហ៊ុន សែន ក្នុងកិច្ចប្រជុំគណៈរដ្ឋមន្ត្រីនៅថ្ងៃនេះ បានស្តីបន្ទោសរដ្ឋមន្ត្រីក្រសួងឧស្សាហកម្ម និងសិប្បកម្ម លោក ចម ប្រសិទ្ធ ថាមិនគោរពថានានុក្រម ដោយនិយាយប្រាប់ក្រុមអ្នកសារព័ត៌មានមុនរបាយការណ៍ទៅដល់ដៃលោក ។
លោក ចម ប្រសិទ្ធិ កាលពីថ្ងៃទី១៧បាននិយាយប្រាប់អ្នកសារព័ត៌មានថា ទឹកក្នុងព្រែកទេរ មានសារធាតុពុលម្យ៉ាងឈ្មោះស្យានីដ មានប្រភពចេញពីក្រុមហ៊ុនរុករករ៉ែមាស ហើយថាករណីនេះលោកបានសុំគោលការណ៍ពីរដ្ឋាភិបាល ដើម្បីចាត់វិធានការ។
ប៉ុន្តែលោក ហ៊ុន សែន ស្តីបន្ទោស លោក ចម ប្រសិទ្ធ ថា ការនិយាយបែបនេះ ហាក់បានសាចទឹកដាក់ក្រសួងសុខាភិបាល ដែលរកឃើញថា ករណីនៅខេត្តក្រចេះ ជនរងគ្រោះបានផឹកស្រាស មានជាតិមេតាណុលខ្ពស់បណ្តាលឲ្យពុល និងផឹកទឹកព្រែក មានជាតិគីមីពុលសម្លាប់ស្មៅ និងសត្វល្អិត។
មេដឹកនាំរូបនេះបន្តថាការនិយាយរបស់លោក ចម ប្រសិទ្ធ គ្មានការទទួលខុសត្រូវ និងថាមិនគោរពថានានុក្រម។
លោក ហ៊ុន សែន នាយករដ្ឋមន្ត្រីកម្ពុជា
ទោះជាយ៉ាងណាលោក ហ៊ុន សែន ប្រតិកម្មបែបដាក់ជាសំនួរថា នៅពេលនេះអស់ខ្មាំងវាយហើយ តែអស់លោកចង់វាយគ្នាឯងឬយ៉ាងម៉េច ?