កំពុងមមាញឹកមើលការខុសត្រូវបុគ្គលិកពេទ្យ និង កិច្ចការទូទៅប្រចាំថ្ងៃ ប្រធានមណ្ឌលសុខភាព ម៉ែនសំអន ត្រពាំងស្ដៅ នៃស្រុករមាសហែក ខេត្តស្វាយរៀង លោក វង្ស ពេទ្យ បានឆ្លៀតពេលបន្ដិច ដើម្បីផ្ដល់បទសម្ភាសន៍ជាមួយអ្នករាយការណ៍ព័ត៌មានវីអូឌីថា នៅមណ្ឌលសុខភាពមួយនេះ ហាក់មិនទាន់អាចឆ្លើយតបនឹងតម្រូវការប្រជាពលរដ្ឋបានទាំងស្រុងនៅឡើយ ចាប់តាំងពីបង្កើតឡើងនៅឆ្នាំ២០១៤។
លោក រៀបរាប់បន្តថា មណ្ឌលសុខភាពត្រពាំងស្ដៅ ជួបការលំបាកជាច្រើន ដូចជា មិនទាន់មានភ្លើងអគ្គិសនីប្រើប្រាស់ គ្មានបន្ទប់ថែទាំមាតានិងទារក នៅក្រោយពេលសម្រាល គ្មានរថយន្ដសង្គ្រោះបន្ទាន់ ខ្វះខាតសម្ភារៈទូទៅ ជាពិសេស គឺផ្លូវមកកាន់មណ្ឌលសុខភាព មានការលំបាកខ្លាំង។
លោកថា ជាទូទៅ ស្ដ្រីដែលសម្រាលកូនហើយ ត្រូវសម្រាកយ៉ាងតិច ៤៨ម៉ោង ឬ២ថ្ងៃ។ ប៉ុន្ដែ ដោយសារមណ្ឌលសុខភាពតូចចង្អៀតពេក និងគ្មានបន្ទប់ក្រោយសម្រាល ពួកគេត្រូវត្រឡប់ទៅផ្ទះវិញ។
លោក វង្ស ពេទ្យ ប្រធានមណ្ឌលសុខភាព ម៉ែនសំអន ត្រពាំងស្ដៅ នៃស្រុករមាសហែក ខេត្តស្វាយរៀង
ទោះបីជាគ្មានបន្ទប់ក្រោយសម្រាលក៏ដោយ ប៉ុន្ដែ លោកអះអាងថា៖
លោក វង្ស ពេទ្យ ប្រធានមណ្ឌលសុខភាព ម៉ែនសំអន ត្រពាំងស្ដៅ នៃស្រុករមាសហែក ខេត្តស្វាយរៀង
បើតាមរបាយការណ៍ នៅឆ្នាំ២០១៥ មណ្ឌលសុខភាពត្រពាំងស្ដៅ បានផ្តល់សេវាសម្រាលកូនចំនួន១៣២នាក់ ដែលចំនួននេះ បានធ្លាក់ចុះមកត្រឹម ១១២នាក់នៅឆ្នាំ២០១៦ ហើយបន្ដធ្លាក់ចុះដល់ត្រឹម ៧០នាក់ នៅឆ្នាំ២០១៧។
ងាកទៅមណ្ឌលសុខភាពមួយទៀត មានចម្ងាយប្រមាណ២០គីឡូម៉ែត្រ ពីមណ្ឌលសុខភាពត្រពាំងស្ដៅ ខណៈតាមផ្លូវធ្វើដំណើរទៅមណ្ឌលសុខភាពនោះ ពោរពេញទៅដោយដីហុយទ្រលម ឡានដឹកដី បើកបរគគ្រាក់គគ្រាំង ធ្វើឲ្យភូមិករណ៍ និងផ្ទះសម្បែងប្រជាពលរដ្ឋ ដែលនៅតាមដងផ្លូវនោះ ទៅជាឡើងពណ៌ក្រហមទុំ។
ប្រធានមណ្ឌលសុខភាពអំពិល លោក សោម ជួន ប្រាប់ថា មិនខុសពីមណ្ឌលសុខភាពដទៃទៀតនោះទេ មណ្ឌលសុខភាពមួយនេះ ប្រឈមនឹងបញ្ហាជាច្រើន ដូចជា ខ្វះសម្ភារៈបច្ចេកទេសពេទ្យ គ្មានអគ្គិសនីប្រើប្រាស់ ជាពិសេសគឺខ្វះបន្ទប់ថែទាំក្រោយពេលសម្រាល និង គ្រូពេទ្យជំនាញ ហើយផ្លូវធ្វើដំណើរ ក៏ជួបការលំបាក។
ប្រធានមណ្ឌលសុខភាពអំពិល លោក សោម ជួន
លោក សោម ជួន អំពាវនាវទៅផ្នែកពាក់ព័ន្ធទាំងអស់ ឲ្យជួយជាបន្ទប់ថែទាំសុខភាព ក្រោយពេលស្ត្រីសម្រាលកូន ដល់មណ្ឌលសុខភាពមួយនេះ ដើម្បីធានាផ្ដល់សេវាជូនប្រជាពលរដ្ឋនៅក្នុងឃុំនេះ ឲ្យកាន់តែមានប្រសិទ្ធិភាព។
នៅក្នុងស្រុករមាសហែកដដែល និងនៅមណ្ឌលសុខភាពចន្ដ្រីឯនោះវិញ ប្រធានមណ្ឌលសុខភាពនេះគឺ លោក សឿង សឿម បានឲ្យដឹងថា មណ្ឌលសុខភាពរបស់លោក ជួបការលំបាកខ្លាំងជាងគេ គឺបញ្ហាគ្មានអគ្គិសនី និងឡានសង្គ្រោះបន្ទាន់។ លោកថា ក្នុងឃុំចន្រ្ដីនេះ មិនមានភ្លើងអគ្គិសនីប្រើប្រាស់រាប់ឆ្នាំមកហើយ ខណៈមណ្ឌលសុខភាព បានប្រើជំនួសដោយអាគុយ និងផ្ទាំងសូឡា។
លោក សឿង សឿម ប្រធានមណ្ឌលសុខភាព ចន្ដ្រី
លោកសំណូមពរទៅអាជ្ញាធរខេត្តនេះ ឲ្យពន្លឿនការតភ្ជាប់បណ្ដាញអគ្គិសនី ដើម្បីបង្កលក្ខណៈងាយស្រួលក្នុងការផ្ដល់សេវាសុខភាពសាធារណៈ ជូនប្រជាពលរដ្ឋ។
បើតាមរបាយការណ៍ ក្នុងស្រុករមាសហែក ខេត្តស្វាយរៀង មានមណ្ឌលសុខភាពសរុបចំនួន១១កន្លែង ក្នុងនោះ មណ្ឌលសុខភាពតែ ៣ប៉ុណ្ណោះ មានបន្ទប់ថែទាំ ក្រោយពេលសម្រាល។ ចំណែកមណ្ឌលសុខភាព មិនទាន់មានភ្លើងអគ្គិសនីប្រើប្រាស់ មានចំនួន ៧កន្លែង ដោយមណ្ឌលសុខភាពទាំងនោះ ប្រើប្រាស់ផ្ទាំងសូឡា ឬ អាគុយជំនួសវិញ។
ក្នុងកិច្ចសម្ភាសន៍ជាមួយវិទ្យុវីអូឌី ប្រធានការិយាល័យសុខាភិបាលប្រតិបត្តិស្រុករមាសហែក លោក ភាវ សុសត្តា ពន្យល់ថា បញ្ហាគ្មានភ្លើងអគ្គិសនី និងបន្ទប់ថែទាំក្រោយសម្រាល គឺជាកត្ដារួមផ្សំ ជំរុញស្ដ្រីមកសម្រាលកូននៅតាមមណ្ឌលសុខភាពនានា មានការធ្លាក់ចុះ ក្នុងរយៈពេលប៉ុន្មានឆ្នាំចុងក្រោយ។
ប៉ុន្ដែ លោកថា ក៏មានកត្ដាផ្សេងទៀត ជំរុញឲ្យចំនួនស្ដ្រីទៅសម្រាលកូនធ្លាក់ចុះ គឺការចំណាកស្រុក កត្ដាជីវភាព ការសម្រេចចិត្តរបស់ពលរដ្ឋ និង ឥរិយាបថមិនល្អរបស់ពេទ្យ ដែលផ្ដល់សេវាសុខភាព។
ប្រធានការិយាល័យសុខាភិបាលប្រតិបត្តិស្រុករមាសហែក លោក ភាវ សុសត្តា
ចំពោះបញ្ហាអគ្គិសនី លោក សុសត្តា អះអាងថា អាជ្ញាធរខេត្តនេះបាន និងកំពុងតភ្ជាប់បណ្ដាញអគ្គិសនី ចូលទៅដល់ភូមិ-ឃុំ ក្នុងស្រុករមាសហែកទាំងមូលហើយ ប៉ុន្ដែ ត្រូវរងចាំដល់ចុងឆ្នាំ២០១៨នេះ ទើបដំណើរការពេញលេញ។ ចំណែក បញ្ហាខ្វះបន្ទប់ថែទាំ លោកថា គ្រោងសំណើសុំបន្ទប់ក្រោយសម្រាលចំនួន៣ទៀត ពីក្រសួងសុខាភិបាលនៅឆ្នាំនេះ។
លោក ភាវ សុសត្តា ប្រធានការិយាល័យសុខាភិបាលប្រតិបត្តិស្រុករមាសហែក
អ្នកសម្របសម្រួលកម្មវិធីគណនេយ្យភាពរបស់អង្គការស្ដារកម្ពុជា នៅក្នុងស្រុករមាសហែកនេះ អ្នកស្រី ជា ជ័យសុវណ្ណា មានប្រសាសន៍ថា បន្ទប់ថែទាំសម្រាប់ស្ត្រីក្រោយពេលសម្រាល មានសារៈសំខាន់ណាស់ ដើម្បីថែទាំសុខភាព និងអាយុជីវិតមាតា និងទារក ដែលទើបនឹងកើត។
អ្នកស្រី ជា ជ័យសុវណ្ណា អ្នកសម្របសម្រួលកម្មវិធីគណនេយ្យភាពរបស់អង្គការស្ដារកម្ពុជា នៅក្នុងស្រុករមាសហែក
ក្នុងស្រុករមាសហែក ខេត្តស្វាយរៀង មានប្រជាពលរដ្ឋរស់នៅប្រមាណជាង១៣ម៉ឺននាក់ ខណៈ ស្ដ្រីរំពឹងទុកថា អាចមានផ្ទៃពោះ ឬ បន្ដពូជបាន មានចំនួន៣ ៤៦២នាក់។ នេះ បើតាមរបាយការណ៍ស្ដិតិប្រជាជន របស់ការិយាល័យ សុខាភិបាលប្រតិបត្តិស្រុករមាសហែកឆ្នាំ២០១៦៕
បទយកការណ៍៖ មណ្ឌលសុខភាពមួយចំនួនក្នុងខេត្តស្វាយរៀង ខ្វះបន្ទប់ថែទាំក្រោយសម្រាល និង អគ្គិសនីប្រើប្រាស់
VOD TV