អតីតនាយករដ្ឋមន្ត្រីថៃលោកស្រី យីង ឡាក់ ដែលតុលាការក្រុងបាងកកកាត់ទោសឲ្យជាប់ពន្ធនាគារ៥ឆ្នាំ ពាក់ព័ន្ធការធ្វេសប្រហែសលើគម្រោងទិញស្រូវនោះ ពេលនេះត្រូវរដ្ឋាភិបាលអង់គ្លេសផ្តល់ទិដ្ឋការរយៈពេល១០ឆ្នាំ។
តាមការចុះផ្សាយរបស់សារព័ត៌មានBBC បានឲ្យដឹងថា រដ្ឋាភិបាលអង់គ្លេសបានយល់ព្រមផ្តល់ទិដ្ឋការមិនមែនអន្តោប្រវេសន៍ឲ្យលោកស្រី យីងឡាក់ រយៈពេល១០ឆ្នាំ អាចចេញ និងចូលប្រទេសនេះដោយសេរី។ ទិដ្ឋការនោះក៏បានកំណត់ដែរថា រាល់ការចាកចេញពីប្រទេសយ៉ាងហោចណាស់ត្រឹម៦ខែ ត្រូវត្រឡប់ចូលវិញម្តង។
លោកស្រី យីងឡាក់ គឺជាប្អូនស្រីពៅ របស់លោក ថាក់ ស៊ីន ដែលលោកស្រី ត្រូវបានពួកយោធាធ្វើរដ្ឋប្រហារទម្លាក់កាលពីថ្ងៃទី២២ខែឧសភា ឆ្នាំ២០១៤ បន្ទាប់មកតុលាការកំពូលថៃកាត់ទោសឲ្យលោកស្រី ជាប់ពន្ធនាគាររយៈពេល៥ឆ្នាំ ជុំវិញគម្រោងទិញស្រូវពីកសិករដែលរងការចោទថា ធ្វើបាត់បង់ថវិការដ្ឋ។
ប៉ុន្តែនៅថ្ងៃទី២៤ខែសីហាឆ្នាំ២០១៧ លោកស្រី គេចខ្លួនចេញពីប្រទេសទៅរស់នៅជាមួយបងប្រុសដែលកំពុងរស់នៅក្នុងស្ថានភាពគេចខ្លួនដូចគ្នាដែរនេះ។