លោកនាយករដ្ឋមន្ត្រី ហ៊ុន សែន បានសម្រេចដក និងលុបឈ្មោះឧត្តមសេនីយផ្កាយបីនៃក្រសួងការពារជាតិម្នាក់ ចេញពីតំណែង បន្ទាប់ពីបានបាញ់បោះសេរី និងត្រូវបានតុលាការបញ្ជារឲ្យឃុំខ្លួនកាលពីពាក់កណ្តាលខែឧសភានេះ។
ក្នុងព្រះរាជក្រឹត្យចុះថ្ងៃទី ២៣ ឧសភា ព្រះមហាក្សត្របានសម្រេចតាមការបង្គំគាល់របស់លោក ហ៊ុន សែន ដោយត្រាស់បង្គាប់បញ្ជប់តំណែងលោក ហូ ចំរើន ចេញពីទីប្រឹក្សាផ្ទាល់លោកហ៊ុន សែន និងលុបឈ្មោះចេញពីក្របខ័ណ្ឌនៃកងយុទ្ធពលខេមរភូមិន្ទផងដែរ។
ការសម្រេចសុំការត្រាស់បង្គាប់ពីព្រះមហាក្សត្រនេះគឺបន្ទាប់ពីលោកហូ ចំរើន ត្រូវបានតុលាការចោទប្រកាន់ និងសម្រេចឃុំខ្លួនបណ្តោះអាសន្នកាលពីថ្ងៃទី ១៩ ឧសភាកន្លងមក ពាក់ព័ន្ធទៅនឹងករណីបាញ់បោះសេរីកាលពីថ្ងៃទី ២១ មេសា ឆ្នាំ២០១៨ នៅភូមិគ្រិះរបស់លោកដែលមានទីតាំងនៅភូមិព្រៃសកើត សង្កាត់ព្រៃស ខណ្ឌដង្កោ រាជធានីភ្នំពេញ៕
