វិទ្យាស្ថានអន្តរជាតិមួយ នៅប្រទេសអូស្ត្រាលី បង្ហាញថា កម្ពុជាមានសន្ទស្សន៍សន្តិភាពធ្លាក់ចុះ បើធៀបទៅនឹងឆ្នាំមុន ក្នុងរយៈពេលដូចគ្នា ដោយថាបញ្ហាចំបងមកពីរំលាយគណបក្សសង្គ្រោះជាតិ។
អតីតគណបក្សសង្គ្រោះជាតិ ដែលជាបក្សប្រឆាំងធំជាងគេនៅកម្ពុជា ត្រូវបានតុលាការកំពូលប្រកាសរំលាយចោលមុនបោះឆ្នោតមកដល់ កាលពីចុងឆ្នាំ២០១៧ តាមបណ្តឹង របស់រដ្ឋាភិបាល ។
វិទ្យាស្ថានសេដ្ឋកិច្ច និងសន្តិភាព ដែលមានទីតាំងនៅទីក្រុងស៊ីដនី ប្រទេសអូស្ត្រាលី បានបង្ហាញរបាយការណ៍កម្រាស់ ៩៦ ទំព័រ ដែលសិក្សាទៅលើប្រទេសចំនួន១៦៣លើពិភពលោក រួមទាំងកម្ពុជាផងដែរ ដោយរកឃើញថា ចំណាត់ថ្នាក់សន្តិភាព របស់កម្ពុជា បានធ្លាក់ចុះ។
របាយការណ៍នេះបង្ហាញថា មូលហេតុចំបងមកពីប្រព័ន្ធដឹកនាំរដ្ឋ បានគាបសង្កាត់ ទៅលើគណបក្សសង្គ្រោះជាតិ ដែលជាគណបក្សប្រឆាំងដ៏ធំជាងគេនៅកម្ពុជា។
របាយការណ៍ដដែល បង្ហាញទៀតថា នៅឆ្នាំ២០១៨នេះ សន្ទស្សន៍សន្តិភាពរបស់កម្ពុជា ធ្លាក់ចុះរហូតដល់ចំណាត់ថ្នាក់លេខ៩៦ ពោលគឺធ្លាក់ចុះ៧លេខ ដែលកាលពីឆ្នាំ២០១៧កន្លងទៅកម្ពុជាជាប់លំដាប់ថ្នាក់៨៩។
ប៉ុន្តែអ្នកពាក្យគណបក្សប្រជាជនកម្ពុជា លោកសុខ ឥសាន បានច្រានចោលរបាយការណ៍នេះ និងបានអះអាងថា ចំណាត់ការនានាទៅលើបក្សប្រឆាំង ថាជាការអនុវត្តច្បាប់ ដើម្បីពង្រឹងនីតិរដ្ឋនៅកម្ពុជា។
អ្នកពាក្យគណបក្សប្រជាជនកម្ពុជា លោកសុខ ឥសាន
យ៉ាងនេះក្តី អ្នកវិភាគនយោបាយវ័យក្មេង លោក ហង្ស វិទូ យល់ថា ការវាយតម្លៃ របស់វិទ្យាស្ថានសេដ្ឋកិច្ច និងសន្តិភាព នៅប្រទេសអូស្ត្រាលីនេះ អាចជឿជាក់បាន ដោយថារបាយការណ៍ស្រាវជ្រាវនេះ បានវាយតម្លៃតាមស្តង់ដារអន្តរជាតិ ហើយផ្អែកទៅលើបញ្ហាសង្គ្រាម ការរំលោភសិទ្ធិមនុស្ស និងកត្តាអនុវត្តច្បាប់។
បើតាមលោក ហង្ស វិទូ របត់នយោបាយនៅកម្ពុជា កំពុងប្រឈមនឹងការបែកបាក់ជាតិ និងប្រឈមនឹងជម្លោះការទូតជាមួយលោកសេរី បើរដ្ឋាភិបាល នៅតែប្រកាន់ជំហរតឹងរឹង មិនព្រមងាករកមកស្តារស្ថានការណ៍នយោបាយឡើងវិញនោះទេ។
អ្នកវិភាគនយោបាយវ័យក្មេង លោក ហង្ស វិទូ
ទោះជាយ៉ាងណា របាយការណ៍បង្ហាញថា បើទោះជាកម្ពុជាមានសន្ទស្សន៍សន្តិភាពអាក្រក់ជាងប្រទេសសឹង្ហបូរី ជប៉ុន ម៉ាឡេស៊ី វៀតណាម និងឡាវ ក៏ដោយ តែកម្ពុជា ល្អជាងប្រទេសចិន ថៃ មីយ៉ានម៉ា ភីលីពីន និងកូរ៉េខាងជើងដែរ។