នាយិកាមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព សង្ឃឹមថា តុលាការនឹងរក្សាជំហរឯករាជ្យជុំវិញសំណុំរឿងប្រឆាំងលោក កឹម សុខា និងសាក្សីផ្សេងទៀត ដែលទទួលបានដីកាកោះហៅពីតុលាការ។
អ្នកស្រីបានថ្លែងបែបនេះក្រោយ ក្រោយចូលខ្លួនឆ្លើយបំភ្លឺជាសាក្សី ក្នុងសំណុំរឿងដែលតុលាការចោទមេដឹកនាំអតីតបក្សប្រឆាំង ថា «ក្បត់ជាតិ»នៅសាលាដំបូងរាជធានីភ្នំពេញនៅព្រឹកនេះ។
អ្នកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា
ជុំវិញការចូលខ្លួនឆ្លើយបំភ្លឺជាសាក្សីនៅតុលាការព្រឹកនេះ អ្នកស្រី ចក់ សុភាព ប្រាប់អ្នកសារព័ត៌មានថា តុលាការបានសាកសួរអ្នកស្រីពីរឿងមួយចំនួនទាក់ទិនមជ្ឈមណ្ឌលសិទ្ធិមនុស្សកម្ពុជាពេលដែលលោក កឹម សុខា នៅជាប្រធាន និងប្រវត្តិការងារទូទៅរបស់អ្នកស្រី។ ប៉ុន្ដែ អ្នកស្រីសុំមិនបញ្ជាក់លម្អិតអំពីការសាកសួរនេះទេ ដោយថា ដើម្បីគោរពនីតិវិធីតុលាការ។
ក្រៅពីនាយិកាមជ្ឈមណ្ឌលសិទ្ធិមនុស្សកម្ពុជា ប្រធានសមាគមធាងត្នោត លោក មាស គឹមសេង នៅថ្ងៃនេះក៏ត្រូវចូលខ្លួនបំភ្លឺនៅតុលាការក្នុងនាមជាសាក្សីក្នុងសំណុំរឿងលោក កឹម សុខា នេះដែរ។
ក្នុងដីកាចំនួន ៨ ផ្សេងគ្នា ចុះថ្ងៃទី ១៧ ឧសភា ចៅក្រមស៊ើបសួរលោក គី ឬទ្ធី បានកោះហៅបុគ្គល ៨ រូប ឲ្យចូលខ្លួនបំភ្លឺក្នុងនាមជាសាក្សី ពាក់ព័ន្ធនឹងដំណើររឿងប្រធានអតីតបក្សសង្គ្រោះជាតិលោក កឹម សុខា ដែលរងការចោទពីបទ «សន្និដ្ឋិភាពជាមួយបរទេស»។
ក្រៅពីអ្នកស្រី ចក់ សុភាព និងលោក មាស គឹមសេង ក៏មានសាក្សីផ្សេងទៀតត្រូវបានតុលាការកោះហៅផងដែរ គឺប្រធានអង្គការក្រុមការងារពិសេសសិទ្ធិលំនៅដ្ឋាន លោក សៀ ភារម្យ និងប្រធានមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ លោក ប៉ា ងួនទៀង ជាដើម៕
