សង្គម

តៃវ៉ាន់ធ្វើសមយុទ្ធយោធា ខណៈមានសម្ពាធពីចិន

លោក ស៊ុន សុខេន
| ០៧ មិថុនា ២០១៨
ម៉ោង ១៧:២៨

ក្រុងប៉េកាំងក៏បានបង្កើនសម្ពាធការទូតលើទីក្រុងតៃប៉ិនិងបានបញ្ចុះបញ្ចូល ៤ ប្រទេសផ្សេងទៀត ឱ្យផ្លាស់ប្តូរភក្ដីភាពពីតៃវ៉ាន់ទៅប្រទេសចិនចាប់តាំងពី Tsai បានឡើងកាន់តំណែង (រូបភាព៖ AFP)

តៃវ៉ាន់បានធ្វើសមយុទ្ធយោធានៅថ្ងៃនេះ ខណៈដែលមានសម្ពាធពីរដ្ឋាភិបាលក្រុងប៉េកាំងទាំងផ្នែកយោធានិងការទូត។

យោងតាមការចុះផ្សាយរបស់សារព័ត៌មាន Channel News Asia ទាហានតៃវ៉ាន់ប្រមាណជាជាង៤០០០នាក់បានចូលរួមធ្វើសមយុទ្ធនេះ។

ប្រធានាធិបតីតៃវ៉ាន់ អ្នកស្រី Tsai Ing-wen ដែលធ្វើជាអធិបតីនិងមើលការធ្វើសមយុទ្ធនោះបាននិយាយដោយមោទនភាព ថា កងទ័ពតៃវ៉ាន់ពិតជាមានសមត្ថភាពពិតប្រាកដក្នុងការប្រយុទ្ធតតាំងសត្រូវដែលចង់ឈ្លានពានខ្លួន។

ទំនាក់ទំនងចិននិងតៃវ៉ាន់កាន់តែអាក្រក់ទៅៗ នៅពេលដែលអ្នកស្រី Tsai Ing-wen ឡើងកាន់ដំណែងជាប្រធានាធិបតីតៃវ៉ាន់នៅឆ្នាំ២០១៦។ ក្រោយឡើងកាន់តំណែងភ្លាមៗ អ្នកស្រីបានប្រកាសបដិសេធថាតៃវ៉ាន់មិនមែនជាខេត្តមួយរបស់ចិនទេ។

ក្នុងរយៈពេលប៉ុន្មានខែចុងក្រោយនេះចិនបានដាក់សម្ពាធយ៉ាងខ្លាំងទៅតៃវ៉ាន់ទាំងផ្នែកយោធានិងការទូត។ ប្រទេសមួយចំនួនដែលធ្លាប់តែមានទំនាក់ទំនងផ្អែមល្ហែមជាមួយតៃវ៉ាន់បានងាកទៅរកចិនហើយកាត់ផ្ដាច់ទំនាក់ទំនងជាមួយ តៃវ៉ាន់។ ជុំវិញរឿងនេះ តៃវ៉ាន់ បានចោទចិនថាបានប្រើប្រាស់ប្រាក់ដើម្បីទាក់ចិត្តប្រទេសទាំងនោះឲ្យរកទៅខ្លួន ហើយបោះបង់ចោលតៃវ៉ាន់។

ចិន, តៃវ៉ាន់

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។