មនុស្សម្នាក់ស្លាប់ និង៨នាក់ទៀតរងរបួសស្រាល ក្រោយពីមានករណីផ្ទុះធុងហ្គាសក្នុងរោងជាងក្រឡឹង ស្ថិតនៅខេត្តព្រះសីហនុ។ នេះបើយោងតាមការលើកឡើងរបស់មន្ត្រីនគរបាលខេត្តព្រះសីហនុ។
ក្នុងគេហទំព័ររបស់អគ្គស្នងការដ្ឋាននគរបាលជាតិ បានដកស្រង់សម្តីរបស់ស្នងការខេត្តព្រះសីហនុ លោក ជួន ណារិន ចុះផ្សាយកាលពីថ្ងៃទី៧ ខែមិថុនានេះថា តាមរបាយការណ៍បឋម គ្រូបង្រៀនផ្នែកបច្ចកទេសក្រឡឹងនិងផ្សារនៅរោងជាងក្រឡឹងបានស្លាប់ និងកូនសិស្ស៨នាក់ទៀតរងរបួសស្រាល ដោយសារក្បាលមាន់ផ្សារប៉ះជាមួយធុងខ្យល់ផ្សារ ធ្វើឲ្យធុងខ្យល់រីកមាឌ បណ្តាលឲ្យផ្ទុះ នៅវេលាម៉ោង១៣និង៤០នាទី ស្ថិតនៅសាលាបច្ចេកទេសដុនបូស្កូ ក្នុងក្រុមទី១៨ ភូមិ៥ សង្កាត់៤ ក្រុងព្រះសីហនុ។
បើតាមលោក ជួន ណារិន ក្រោយពីកើតហេតុភ្លាម សមត្ថកិច្ចបានពិនិត្យសាកសព្វ ហើយបញ្ជូនទៅឲ្យក្រុមគ្រួសារធ្វើបុណ្យតាមប្រពៃណី ខណៈអ្នករងរបួស៨នាក់ ត្រូវបានបញ្ជូនទៅសម្រាកព្យាបាលនៅគ្លីនិកសេតេ ក្នុងសង្កាត់២ ក្រុងព្រះសីហនុ។
ទោះជាបែបនេះក្តី VOD មិនអាចសុំការបំភ្លឺពីបន្ថែមពីស្នងការ ខេត្តព្រះសីហនុ លោក ជួន ណារិន បានទេនៅថ្ងៃនេះ៕
